ភ្នំពេញ: ប្រទេសកម្ពុជា និងសិង្ហបុរី កំពុងសិក្សារួមគ្នាលើសេចក្តីព្រាងកិច្ចព្រមព្រៀងក្របខ័ណ្ឌសម្រាប់អភិវឌ្ឍមជ្ឈមណ្ឌលភ័ស្តុភារកម្មភ្នំពេញ ដែលជាកិច្ចខិតខំប្រឹងប្រែងរបស់រដ្ឋាភិបាលក្នុងការកាត់បន្ថយថ្លៃដើមក្នុងខ្សែចង្វាក់ផលិតកម្មដើម្បីជំរុញការនាំចេញ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនរួមជាមួយថ្នាក់ដឹកនាំជាន់ខ្ពស់នៃក្រសួងស្ថាប័នពាក់ព័ន្ធរបស់កម្ពុជា និងសិង្ហបុរីរួមជាមួយនឹងថ្នាក់ដឹកនាំក្រុមហ៊ុន YCH និងក្រុមហ៊ុន IA កាលពីព្រឹកថ្ងៃព្រហស្បតិ៍បានធ្វើការពិភាក្សាតាមប្រព័ន្ធវីដេអូពីចម្ងាយលើសេចក្តីព្រាងកិច្ចព្រមព្រៀងក្របខ័ណ្ឌនេះក្នុងគោលបំណងពិភាក្សាដើម្បីប្រមូលធាតុចូលបន្ថែមពីគ្រប់ស្ថាប័នពាក់ព័ន្ធសំដៅឱ្យកិច្ចព្រមព្រៀងនេះមានខ្លឹមសារជាគតិយុត្តគ្រប់ជ្រុងជ្រោយអាចទទួលយកបានពីគ្រប់ភាគី។
លោក ស៊ុន ចាន់ថុល មានប្រសាសន៍ថាមជ្ឈមណ្ឌលភ័ស្តុភារកម្មភ្នំពេញគឺជាមជ្ឈមណ្ឌលដ៏មានសក្ដានុពលក្នុងការលើកស្ទួយវិស័យដឹកជញ្ជូនឱ្យកាន់តែមានប្រសិទ្ធភាព និងមានលក្ខណៈប្រកួតប្រជែងជាមួយនឹងប្រទេសក្នុងតំបន់ និងសកលលោកទាំងតម្លៃ និងសេវាកម្មជួយជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើន និងសម្រេចឱ្យបាននូវចក្ខុវិស័យរបស់រាជរដ្ឋាភិបាលក្នុងការអភិវឌ្ឍប្រទេសទៅជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសចំណូលខ្ពស់នៅឆ្នាំ ២០៥០។
លោកបានថ្លែងបន្តទៀតថា៖ «ដើម្បីជំរុញឱ្យគម្រោងនេះមានដំណើរការកាន់តែរលូន និងឆ្ពោះទៅមុខតាមផែនការ ក្រសួងកំពុងស្វែងរកដៃគូអភិវឌ្ឍន៍ ហើយធ្វើរបាយការណ៍ជូនថ្នាក់ដឹកនាំ ដើម្បីទទួលបានការណែនាំ និងចង្អុលបង្ហាញបន្ថែមមុនចាប់ផ្តើមកិច្ចប្រជុំលើកក្រោយ»។
អគ្គនាយកនៃអគ្គនាយកដ្ឋានភ័ស្តុភារកម្មនៃក្រសួងសាធារណការ និងដឹកជញ្ជូនបានអះអាងមកភ្នំពេញប៉ុស្តិ៍កាលពីខែមុនថា ការសិក្សាលទ្ធភាពបឋម (pre-feasibility study) ការបង្កើតមជ្ឈមណ្ឌលប្រមូលផ្តុំប្រព័ន្ធភ័ស្តុភារកម្មភ្នំពេញឡូជីស្ទិកបង្ហាញពីលទ្ធផលវិជ្ជមានដែលអាចធ្វើពាណិជ្ជកម្មបាន។
គម្រោងភ្នំពេញឡូជីស្ទីកមានទីតាំងស្ថិតនៅសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញលើផ្ទៃដី ៩៨ ហិកតាដែលជាទីតាំងយុទ្ធសាស្ដ្រមួយតភ្ជាប់កំពង់ផែសមុទ្រទឹកជ្រៅក្នុងខេត្តព្រះសីហនុ និងខ្សែផ្លូវដែកភាគខាងជើងក្រុងប៉ោយប៉ែតភ្ជាប់ទៅនឹងព្រំដែនថៃ។
វាជាទីតាំងនៅជិតព្រលានយន្តហោះអន្តរជាតិផ្លូវជាតិលេខ ៤ និងផ្លូវជាតិលេខ ៣ ព្រមទាំងទីតាំងស្ដុកទំនិញនៅស្ថានីយរថភ្លើង និងតំបន់សេដ្ឋកិច្ចពិសេសភ្នំពេញ។
លោករដ្ឋមន្ត្រីក៏បានលើកឡើងផងដែរថា សេចក្តីព្រាងកិច្ចព្រមព្រៀងក្របខ័ណ្ឌនេះគឺដើម្បីរៀបចំកិច្ចព្រមព្រៀង នេះឱ្យមានសង្គតភាព ស្របតាមបរិបទច្បាប់ សង្គម និងសេដ្ឋកិច្ចកម្ពុជានាពេលបច្ចុប្បន្ន និងអនាគត ហើយលោកក៏បានណែនាំឱ្យក្រុមការងារចំពោះកិច្ចធ្វើការងារនេះឱ្យបានជិតស្និទ្ធជាមួយភាគីពាក់ព័ន្ធ និងក្រុមហ៊ុនវិនិយោគ ដើម្បីជំរុញឱ្យគម្រោងនេះដំណើរការរលូនស្របតាមកាលវិភាគ ដែលបានគ្រោងទុក៕