.jpg)
ក្រដាសប្រាក់ដុល្លារសិង្ហបុរីទើបដកពីម៉ាស៊ីនអេធីអឹម។ រូបថត AFP
សិង្ហបុរីៈ ធនាគារកណ្តាលសិង្ហបុរីបានបន្ធូរគោលនយោបាយរូបិយវត្ថុកាលពីថ្ងៃចន្ទ នៅពេលប្រទេសដែលគេដឹងថារីកចម្រើនដោយសារពាណិជ្ជកម្មសកលលោកមួយនេះកំពុងមានសេដ្ឋកិច្ចដាំក្បាលចុះកាន់តែជ្រៅដោយសារការរីករាលដាលវីរុសកូរ៉ូណា។
ការបន្ទន់គោលនយោបាយនេះបន្ថែមលើការសម្រេចដែលបានធ្វើឡើងដោយប្រទេសជាច្រើនទៀត និងបន្ទាប់ពីទិន្នន័យកាលពីសប្តាហ៍មុនបានបង្ហាញថា ទីក្រុងរដ្ឋមួយនេះទទួលរងនូវការធ្លាក់ចុះសេដ្ឋកិច្ចដ៏រហ័សក្នុងត្រីមាសដំបូងនេះ ចាប់តាំងពីវិបត្តិហិរញ្ញវត្ថុសកលមក។
អាជ្ញាធររូបិយវត្ថុសិង្ហបុរី (MAS) បាននិយាយថា ខ្លួនបានកែសម្រួលគោលនយោបាយរូបិយវត្ថុដែលប្រាក់ដុល្លារសិង្ហបុរីត្រូវបានអនុញ្ញាតឲ្យដោះដូរធៀបទៅនឹងរូបិយប័ណ្ណនៃដៃគូពាណិជ្ជកម្មសំខាន់ៗរបស់ខ្លួន ដែលធ្វើឲ្យអង្គភាពមូលដ្ឋានចុះខ្សោយជាងមុន។
ជំនួសឲ្យការប្រើប្រាស់អត្រាការប្រាក់ប្រទេសសិង្ហបុរីដែលពឹងផ្អែកលើវិស័យពាណិជ្ជកម្មនោះរៀបចំគោលនយោបាយរូបិយវត្ថុ ដោយអនុញ្ញាតឲ្យប្រាក់ដុល្លារខ្លួនឯងឡើងថ្លៃ ឬធ្លាក់ថ្លៃធៀបនឹងរូបិយប័ណ្ណនៃប្រទេសដៃគូពាណិជ្ជកម្មរបស់ខ្លួន។
ធនាគារកណ្តាលសិង្ហបុរីបានឲ្យដឹងថា៖ «ភាពមិនប្រាកដប្រជាចម្បងៗនៅតែមាន។ ការងើបឡើងវិញនៃសេដ្ឋកិច្ចសកលនឹងអាស្រ័យលើកម្រិតនៃមេរោគរាតត្បាត និងប្រសិទ្ធភាពនៃការឆ្លើយតបផ្នែកនយោបាយ»។
MAS ត្រូវបានគេសន្មតថានឹងចេញសេចក្តីថ្លែងការណ៍គោលនយោបាយបន្ទាប់របស់ខ្លួននៅក្នុងខែមេសា ប៉ុន្តែបាននាំវាឆ្ពោះទៅមុខ នៅពេលដែលប្រទេសនេះរងផលប៉ះពាល់ពីឥទ្ធិពលសេដ្ឋកិច្ចនៃវីរុស។
សិង្ហបុរីជាមជ្ឈមណ្ឌលហិរញ្ញវត្ថុដែលមានសេដ្ឋកិច្ចបើកចំហខ្លាំងបំផុតរបស់ពិភពលោក ហើយជាធម្មតាទទួលរងការវាយប្រហារខ្លាំងបំផុត និងមុនគេបំផុត អំឡុងពេលការភ័យខ្លាចពិភពលោកម្តងៗ។
យោងតាមការព្យាករមុនត្រីមាសដែលចេញផ្សាយកាលពីសប្តាហ៍កន្លងទៅដោយក្រសួងពាណិជ្ជកម្មសិង្ហបុរី ផលិតផលក្នុងស្រុកសរុបរបស់ប្រទេសនេះបានធ្លាក់ចុះ ២,២ ភាគរយក្នុងត្រីមាសទី ១ ធៀបនឹងរយៈពេលដូចគ្នាកាលពីឆ្នាំមុនដែលជាការធ្លាក់ចុះអាក្រក់បំផុតចាប់តាំងពីវិបត្តិហិរញ្ញវត្ថុឆ្នាំ ២០០៩។
ក្រសួងនេះបានទម្លាក់នូវការព្យាករកំណើនរបស់ខ្លួនដោយរំពឹងថា GDP របស់ប្រទេសនេះនឹងធ្លាក់ចុះរហូតដល់ ៤ ភាគរយក្នុងឆ្នាំនេះ។
លោក Song Seng Wun អ្នកសេដ្ឋកិច្ចតំបន់នៃធនាគារឯកជន CIMB បាននិយាយថា ជាមួយតម្រូវការធ្លាក់ចុះដែលបណ្តាលមកពីការបិទអាជីវកម្ម ការបញ្ឈប់ការធ្វើដំណើរតាមផ្លូវអាកាស និងវិធានការដទៃទៀតដើម្បីទប់ស្កាត់វីរុស ការកែសម្រួលគោលនយោបាយរបស់សិង្ហបុរីកាន់តែបញ្ជាក់ឲ្យឃើញពីបរិយាកាសសេដ្ឋកិច្ចបច្ចុប្បន្នជាងការគាំទ្រចំពោះការនាំចេញ។
លោកនិយាយថា៖ «អ្នកមិនអាចមានដុល្លារសិង្ហបុរីដ៏រឹងមាំបានទេពេលសេដ្ឋកិច្ចតំបន់ និងសេដ្ឋកិច្ចពិភពលោកធ្លាក់ចុះកាន់តែជ្រៅ»៕ RR
