បន្ទាប់ពីការឡើងកាន់តំណែងរបស់លោក Joe Biden ជាប្រធានាធិបតីទី ៤៦ របស់សហរដ្ឋអាមេរិក វាអាចជាការផ្លាស់ប្តូរសម្រាប់ការវិនិយោគធំៗមួយចំនួន ខណៈដែលលោកបានហៅការប្រែប្រួលអាកាសធាតុថាជាបញ្ហា ទី ១ ដែលមនុស្សជាតិកំពុងប្រឈម និងបានប្រកាសផែនការកាត់បន្ថយការបញ្ចេញកម្ដៅឱ្យបានដល់កម្រិតសូន្យនៅឆ្នាំ ២០៥០។
ប្រការនេះអាចជាដំណឹងល្អសម្រាប់ក្រុមហ៊ុនផ្ដោតលើបរិស្ថាន ហើយអាចជាសុទិដ្ឋិនិយមផងដែរសម្រាប់វិស័យប្រេងនៅឆ្នាំនេះ បន្ទាប់ពីប្រទេសផលិតប្រេងភាគច្រើនបានចំណាយពេលពេញ ១ ឆ្នាំ ២០២០ កន្លងមកនេះ ផ្តោតលើការកាត់បន្ថយថ្លៃដើមដើម្បីបន្តអាជីវកម្មនៅពេលតម្លៃប្រេងមានកម្រិតទាប។
ឆ្នាំ ២០២១ បានចាប់ផ្តើមជាមួយនឹងភាពល្អប្រសើរជាងមុនសម្រាប់ប្រទេសផលិតប្រេង។ យោងតាមគេហទំព័រ Nasdaq តម្លៃប្រេងបានកើនឡើងជាង ១០ ភាគរយពោលគឺកើនឡើងលើសពី ៥០ ដុល្លារក្នុងមួយបារ៉ែលជាលើកដំបូងចាប់តាំងពីខែកុម្ភៈឆ្នាំមុន។ ការឡើងថ្លៃនេះអាចគ្រាន់តែជាការចាប់ផ្តើមប៉ុណ្ណោះ បើពិនិត្យមើលពីសារៈសំខាន់នៃតម្លៃ ៥០ ដុល្លារសម្រាប់ប្រទេសផលិតប្រេងមួយចំនួន។ ទោះជាយ៉ាងណា តម្លៃប្រេងបានធ្លាក់ចុះ ១.០៣ ភាគរយដល់ ៥១.៨៧ ដុល្លារក្នុង ១ បារ៉ែលនៅព្រឹកថ្ងៃចន្ទនៅអាស៊ី បន្ទាប់ពីបានធ្លាក់ចុះច្រើនបំផុតក្នុងរយៈពេលជិត ៤ សប្តាហ៍ ដោយសារតែប្រាក់ដុល្លារឡើងថ្លៃ ទិន្នន័យសេដ្ឋកិច្ចមិនល្អរបស់សហរដ្ឋអាមេរិក និងចំនួននៃអ្នកឆ្លងជំងឺកូវីដ១៩កើនឡើងជាលំដាប់មិនធ្លាប់មាននៅលើពិភពលោក។
នៅក្នុងសប្តាហ៍នេះ ប្រេងឆៅអាចមាននិន្នាការនៃការកើនឡើងតម្លៃខ្លះមកវិញ បន្ទាប់ពីការឡើងកាន់តំណែងរបស់លោក Biden នៅថ្ងៃពុធ។ ដូច្នេះវិនិយោគិនគួររង់ចាំទិញប្រេងឆៅក្នុងតម្លៃ ៥០.៥០ ដុល្លារ ទៅ ៥១ ដុល្លារក្នុង ១ បារ៉ែល និងទទួលបានប្រាក់ចំណេញក្នុងតម្លៃ ៥២.៥០ ដុល្លារជាមួយនឹងការខាតនៅត្រឹមតម្លៃ ៤៩,៨០ ដុល្លារ។
សម្រាប់អ្នកជួញដូរវិញ ពួកគេអាចរង់ចាំលក់ប្រេងឆៅក្នុងតម្លៃ ៥៣,៧០ ដុល្លារក្នុង ១ បារ៉ែល និងទទួលបានចំណេញក្នុងតម្លៃ ៥២,៣០ ដុល្លារ ជាមួយនឹងការខាតក្នុងតម្លៃ ៥៥ ដុល្លារក្នុង ១ បារ៉ែល៕