The Phnom Penh Post Search

Search form

Logo of Phnom Penh Post newspaper Phnom Penh Post - សួន​កម្សាន្ត​ថ្មី​របស់​លោក​លី យ៉ុងផាត់​នឹង​បើក​ដើម​ឆ្នាំ​ក្រោយ

សួន​កម្សាន្ត​ថ្មី​របស់​លោក​លី យ៉ុងផាត់​នឹង​បើក​ដើម​ឆ្នាំ​ក្រោយ

សួន​កម្សាន្ត​ថ្មី​របស់​លោក​លី យ៉ុងផាត់​នឹង​បើក​ដើម​ឆ្នាំ​ក្រោយ

ភ្នំពេញៈ សួន​សត្វ​កម្សាន្ត​ Safari​ World ​ដ៏​ធំ​នៅ​ជាយ​ក្រុង​​ភ្នំពេញ​ របស់​សមាជិក​ព្រឹទ្ធ​សភា​មក​ពី​គណបក្ស​ប្រជា​ជន​កម្ពុជា​គឺ​ឧកញ៉ា​ លី ​យ៉ុង​ផាត់​ នឹង​បើក​ដំណើរ​ការ​នៅ​ដើម​​ឆ្នាំ​២០១៧ ​ខណៈ​អ្នក​នៅ​ក្នុង​​ឧស្សាហ​កម្ម​ទេសចរណ៍​អះអាង​ថា​ វា​នឹង​ផ្តល់​អត្ថ​ប្រយោជន៍​បន្ថែម​សម្រាប់​អ្នក​នៅ​ជុំវិញ​តំបន់​នោះ​។

លោក​ លី ​យ៉ុងផាត់ ​ប្រធាន​ក្រុម​ហ៊ុន ​LYP​ បាន​ប្រាប់​ភ្នំពេញ ប៉ុស្ដិ៍ ​ពី​ថ្ងៃ​ម្សិល​មិញ​ថា ​សួន​កម្សាន្ត​ដ៏​ធំ​នេះ​នឹង​បើក​ដំណើរ​ការ​នៅ​មុន​ចូល​ឆ្នាំ​ខ្មែរ​ ដើម្បី​ទាក់​ទាញ​ភ្ញៀវ​ទេសចរ​ក្នុង​ស្រុក។

ក្រុម​ហ៊ុន​បាន​សម្រេច​បង្វែ​រមក​បង្កើត​សួន​សត្វ​កម្សាន្ត ​Safari​ World​ នេះ​នៅ​​ភ្នំពេញ​វិញ ​បន្ទាប់​វា​ត្រូវ​បាន​ដំណើរ​ការ​នៅ​ខេត្ត​កោះ​កុង​ជា​ច្រើន​ឆ្នាំ​នឹង​មិន​ជោគ​ជ័យ​មក​។

លោក ​លី​ យ៉ុង​ផាត់ បាន​ឲ្យ​​​ដឹង​ថា៖​ «​​ពី​ដំបូង​ប៉ាន់ស្មាន​ថា​ធ្វើ​នៅ​កោះកុង​អាច​អូស​ទាញ​ភ្ញៀវ​ទេសចរ​​ពី​ថៃ​ផង និង​កម្ពុជា​ផង​តែ​ដល់​ពេល​ធ្វើ​ទៅ​មិន​ជោគ​ជ័យ​​ដូច​​ការ​គិត»។

លោក​បន្ត​ថា​ សម្រាក់​អ្នក​ទេសចរ​​ក្នុង​ស្រុក​វិញ​វាពិត​ជា​មាន​ទីតាំង​ឆ្ងាយ​ដែល​ពួកគេ​មិន​មាន​​ឱកាស​ក្នុង​ការ​ទៅ​លេង​កម្សាន្ត​នោះ​ទេ​។ លោក​រំពឹង​ថា ​ការប្តូរ​មក​តាំង​នៅ​ភ្នំ​ពេញ​នឹង​ទាក់​ទា​ញ​​ទេសចរ​ក្នុង​ស្រុក​កាន់​តែ​ច្រើន​។​

​លោក​ទទួល​ស្គាល់​ថា​ការ​ធ្វើ​សួន​សត្វ​នៅ​កោះ​កុង​គឺមាន​ទីតាំង​ឆ្ងាយ​ពេក​ពី​ទីប្រ​ជុំជន​ ផ្លូវ​កោង​ ឡើង​ភ្នំ ដែល​ធ្វើ​ឲ្យ​ពល​រដ្ឋ​ពិបាក​ធ្វើ​ដំណើរ​ទៅ​ដល់​ទីនោះ​។ ​

លោក​ថ្លែង​ថា៖ «ការប្តូរ​ទីតាំង​ មក​ដាក់​នៅ​រាជ​ធានី​ភ្នំពេញ​នឹង​មាន​ពលរដ្ឋ​ជាច្រើន​ចូល​រួម​ដើរ​កម្សាន្ត​ច្រើន​។ អ្វី​​ក៏​ដោយ​ធ្វើ​នៅ​ទីក្រុង​ម៉េច​ក៏​គ្រាន់​ជាង​ខេត្ត ព្រោះ​ទីក្រុង​ភ្នំពេញ​ភ្ញៀវ​ទេសចរ​មកពី​គ្រប់​ទិស​ ឬ​មកពី​ព្រំ​ដែន​ថៃ ឬ​​វៀត​ណាម​ក៏បាន ​ហើយ​ជិះ​យន្ត​ហោះ​មកពី​ណា​ក៏មាន និយាយ​រួម​អាច​ទាក់​ទាញ​ភ្ញៀវ​ទេ​ស​ចរ​​បាន​ច្រើន»។

​លោក ​លី យ៉ុង​ផាត់ ​បដិសេធ​បង្ហាញ​ពី​ការ​វិនិយោគ​លើ​សួន​សត្វ​កម្សាន្ត​ថ្មី​នេះ ​ប៉ុន្តែ​លោក​បាន​ឲ្យ​ដឹង​ថា តម្លៃ​សំ​បុត្រ​ចូល​ទស្សនា​ដូច​គ្នា​កាល​ពី​នៅ​កោះ​កុង​ដែរ ​ក្នុង​នោះ​៥​ដុល្លារ​​ភ្ញៀវ​ក្នុង​ស្រុក​ និង​៧ ​ទៅ ​១០​ ដុល្លារ​សម្រាប់​ជន​បរទេស​។

សួន​សត្វ​កម្សាន្ត​ថ្មី​នេះ​មាន​ទីតាំង​នៅ​ទល់​មុខ​ស្ថានីយ​ទូរទស្សន៍ ​PNN ​ក្នុង​ខណ្ឌ​ជ្រោយ​ចង្វារ ​និង​នៅ​លើ​ផ្ទៃ​ដី​ទំហំ​​៨០​ហិកតា។

យោង​តាម​ហ្វេស​ប៊ុក​របស់ មន្ទីរ​សាធារណ​ការ​ និង​ដឹក​ជញ្ជូន​រាជ​ធានី​ភ្នំពេញ ​សួនក​ម្សាន្ត​ថ្មី​នេះ​មាន​ឈ្មោះ​ថា ​«​សួន​សត្វ ​Phnom Penh Safari World ដែល​តាម​គម្រោង​នឹង​មាន ​សាល​សម្ដែង​សត្វ​ស្វា សត្វ​បក្សី សត្វ​ខ្លា​ សត្វ​ក្រពើ ​សួន​សត្វ​គ្រប់​ប្រភេទ សួន​ទឹក ​សួនផ្កា ​ស្មៅ ​រុក្ខជាតិ ​និង​អគារ​អាហារ​ដ្ឋាន​ជាដើម។

​លោក ​លី យ៉ុង​ផាត់ ប្រាប់​ភ្នំពេញ​ប៉ុស្តិ៍​​ថា ​​សត្វ​ទាំង​អស់​នឹង​ត្រូវ​នាំ​យក​ពី​ខេត្ត​កោះ​កុង ​មក​ដាក់​នៅ​សួន​សត្វ​នៅ​ភ្នំពេញ​វិញ​។

​អ្នក​នៅ​ក្នុង​ឧស្សាហកម្ម​ទេសចរណ៍​បាន​​ស្វាគមន៍​ចំពោះ​វត្តមាន​សួន​កម្សាន្ត​ដ៏​ធំ​នេះ​ ហើយ​ថា​អ្នក​ពាក់​ព័ន្ធ​ក្នុង​​វិស័យ​ទេសចរណ៍​ក្នុង​តំបន់​នេះ​នឹង​បាន​អត្ថ​ប្រយោជន៍​បន្ថែម។

​លោក ​ហូ ​វណ្ឌី ​អនុ​ប្រធាន​សមាគម​សម្ព័ន្ធ​ទេសចរណ៍​ជាតិ​កម្ពុជា ​មើល​ឃើញ​ថា​នឹង​ទាក់​ទាញ​ភ្ញៀវ​ទេសចរ​បន្ថែម​ទៀត ​ជា​ពិសេស​បង្កើន​ចំណូល​ដល់​អ្នក​រស់​​នៅក្បែរ​នោះ។​

លោក​បន្ត​ថា៖«ជា​រឿង​ល្អ​ព្រោះ​ឃើញថា​គម្រោង​នេះ​​ជា​ទំហំ​ដ៏​ធំធេង ហើយ​នេះ​ជា​ផលិតផល​កែច្នៃ​លំដាប់​ទេសចរណ៍​ដ៏​ធំ អាច​ទាក់ទាញ​ទេសចរ​​ជាតិ និង​អន្តរ​ជាតិ»​។ ​

លោក​​បន្ត​ថា៖​ «​វា​អាច​បង្កើន​ប្រាក់​ចំណូល​ដល់​អ្នក​ពាក់​ព័ន្ធ​ជា​ពិសេស​ដល់​ក្រុម​ហ៊ុន​ដឹក​ជញ្ជូន​ អ្នក​​រត់​រ៉ឺម៉ក​ ម៉ូតូ​ឌុប ​ស៊ីក្លូ​ជា​ដើម ​មួយ​ទៀត​នៅ​ពេល​ដែល​ចាប់​ផ្តើម​ដំណើរ​ការ ​រដ្ឋាភិ​បាល​នឹង​បាន​ទទួល​ពន្ធ​ពី​អ្នក​វិនិ​យោគ​នោះ»។

បើ​តាម​លោក​ឧកញ៉ា​លី ​យ៉ុង​ផាត់ សួន​កម្សាន្ត​ថ្មី​នេះ​ នឹង​ផ្តល់​ការងារ​ដល់​ប្រជាជន​ក្នុង​ស្រុក​ប្រមាណ​ពី​៣០០ ទៅ​៤០០​នាក់​៕

អត្ថបទគួរចាប់អារម្មណ៍