The Phnom Penh Post Search

Search form




Logo of Phnom Penh Post newspaper Phnom Penh Post - សេចក្តី​ព្រាង​ច្បាប់​កៅស៊ូ​អាច​បញ្ចប់​នៅ​ចុង​ឆ្នាំ​នេះ

សេចក្តី​ព្រាង​ច្បាប់​កៅស៊ូ​អាច​បញ្ចប់​នៅ​ចុង​ឆ្នាំ​នេះ

កម្មករ​កំពុង​ចាក់​ជ័រ​កៅស៊ូ​ស្រស់​ទៅ​ក្នុង​ធុង​ធំ​បន្ទាប់​ពី​ចៀរ​ជ័រ​រួច​នៅ​ចម្ការ​កៅស៊ូ​ជុប ខេត្ត​កំពង់ចាម កន្លង​មក​។
កម្មករ​កំពុង​ចាក់​ជ័រ​កៅស៊ូ​ស្រស់​ទៅ​ក្នុង​ធុង​ធំ​បន្ទាប់​ពី​ចៀរ​ជ័រ​រួច​នៅ​ចម្ការ​កៅស៊ូ​ជុប ខេត្ត​កំពង់ចាម កន្លង​មក​។ ភ្នំពញ ប៉ុស្តិ៍

សេចក្តី​ព្រាង​ច្បាប់​កៅស៊ូ​អាច​បញ្ចប់​នៅ​ចុង​ឆ្នាំ​នេះ

ភ្នំពេញៈ ក្រសួង​កសិកម្ម​ នឹង​ពន្យារ​ពេល​ការ​ត្រួត​ពិនិត្យ​បញ្ចប់​សេចក្តី​ព្រាង​ច្បាប់​ស្តីពី​កៅស៊ូ នៅ​ពេល​តម្លៃ​កៅស៊ូ​ធ្លាក់​ចុះ​ដោយ​លើក​ឡើង​ថា​ នៅ​ពេល​ដែល​ច្បាប់​នេះ​ត្រូវ​បាន​អនុម័ត​នោះ​នឹង​តម្រូវ​ឲ្យ​ក្រុម​ហ៊ុន​ផលិត​កៅស៊ូ​អនុវត្ត​តាម​ស្តង់ដារ​ឧស្សាហកម្ម​កាន់​តែ​ខ្ពស់​។ នេះ​បើ​យោង​តាម​មន្ត្រី​ជាន់​ខ្ពស់​នៅ​ក្រសួង​កសិកម្ម រុក្ខាប្រមាញ់ ​និង​នេសាទ​។

សេចក្តី​ព្រាង​ច្បាប់​ ដែល​មាន​បំណង​លើក​កម្ពស់​ស្តង់​ដារ​ឧស្សាហកម្ម​តាំង​ពី​ការ​ជ្រើស​រើស​ពូជ​កៅស៊ូ​ រហូត​ដល់​ការ​ហាម​ឃាត់​នាំ​ចេញ​កៅស៊ូ​ធម្មជាតិ​ឆៅ​ដើម្បី​ជំរុញ​ការ​វិនិយោគ​ក្នុង​ការ​កែ​ច្នៃ​កៅស៊ូ​ដើម្បី​ធ្វើ​ឲ្យ​ឧស្សាហកម្ម​នេះ​ រីក​ចម្រើន ​ត្រូវ​បាន​រំពឹង​ថា​នឹង​ត្រូវ​បញ្ចប់​ដើម្បី​បញ្ជូន​ទៅ​គណៈ​រដ្ឋ​មន្ត្រី​និង​រដ្ឋ​សភា​អនុម័ត​ កាល​ពី​ឆ្នាំ​ ២០១៤។

លោក ​លី ​ផល្លា​ អនុ​រដ្ឋ​លេខាធិការ​ក្រសួង​កសិកម្ម​ រុក្ខា​ប្រមាញ់ ​និង​នេសាទ​ បាន​ឲ្យ​ដឹង​ថា៖​ «​យើង​គិត​ថា​វា​មិន​ទាន់​ដល់​ពេល​សម​ស្រប​ដើម្បី​បង្កើត​ច្បាប់​ ឬ​លក្ខ​ខណ្ឌ​បន្ថែម​ទៀត​សម្រាប់​អ្នក​ដាំ​ដុះ​កៅស៊ូ​ឲ្យ​អនុវត្ត​តាម ​ដោយ​សារ​តម្លៃ​កៅស៊ូ​កំពុង​ធ្លាក់​ចុះ ដូច្នេះ​យើង​នឹង​រង់ចាំ​រហូត​ដល់​តម្លៃ​ស្ទុះ​ងើប​ឡើង​វិញ​ដើម្បី​អនុម័ត​ច្បាប់​នេះ​»​។​

លោក​បន្ថែម​ថា៖ ​«​សេចក្ដី​ព្រាង​ច្បាប់​នេះ​ ក្រោយ​ពី​អនុម័ត​នឹង​តម្រូវ​ឲ្យ​អ្នក​ផលិត​ជ្រើស​រើស​ពូជ​ល្អ​ៗ​សម្រាប់​ដាំ ​និង​អនុញ្ញាត​ឲ្យ​នាំ​ចេញ​កៅស៊ូ​ដែល​កែច្នៃ​រួច​ប៉ុណ្ណោះ។​ នេះ​គឺ​ដើម្បី​ធ្វើ​ឲ្យ​ប្រាកដ​ថា ប្រទេស​កម្ពុជា​នឹង​ផលិត​តែ​កៅស៊ូ​ដែល​មាន​គុណភាព​ល្អ»​។

តម្លៃ​កៅស៊ូ ​បាន​ធ្លាក់​ចុះ​ពី​តម្លៃ​មធ្យម ​៤ ៥០០ ​ដុល្លារ​ក្នុង​មួយ​តោន​កាល​ពី​ឆ្នាំ​ ២០១១​ មក​នៅ​ត្រឹម​ចន្លោះ​ពី ​១ ៨០០​ ដុល្លារ ទៅ​ ២០០០​ ដុល្លារ​ក្នុង​មួយ​តោន​នៅ​ឆ្នាំ​ ២០១៣ ​រហូត​ដល់​ពេល ​បច្ចុប្បន្ន។​ តម្លៃ​ដែល​កំពុង​ធ្លាក់​ចុះ​នេះ​ គឺ​ដោយ​សារ​ការ​ធ្លាក់​ចុះ​តម្រូវ​ការ​កៅស៊ូ​ទូទាំង​ពិភព​លោក​ ជា​ពិសេស​នៅ​ប្រទេស​ចិន។

ការ​ធ្លាក់​ចុះ​តម្លៃ​កៅស៊ូ​ធម្មជាតិ​ កាល​ពី​ឆ្នាំ​មុន​ បាន​ជំរុញ​ឲ្យ​រដ្ឋាភិបាល​ថៃ ​ឥណ្ឌូនេស៊ី ​និង​ម៉ាឡេស៊ី ​ដោយ​មាន​ជំនួយ​បន្ថែម​ពី​ប្រទេស​កម្ពុជា ​ឡាវ ​មីយ៉ាន់ម៉ា ​និង​វៀតណាម ​ចាត់​វិធាន​ការ​រួម​គ្នា​ដើម្បី​កាត់​បន្ថយ​ការ​ផ្គត់​ផ្គង់​កៅស៊ូ​។

ប្រទេស​ទាំង​៧ ដែល​ផ្គត់​ផ្គង់​កៅស៊ូ​ប្រមាណ​ជាង​ ៧០ ​ភាគ​រយ​នៃ​ទិន្ន​ផល​កៅស៊ូ​ធម្មជាតិ​ពិភព​លោក ​បានជួ​ប​ប្រជុំគ្នា​កាល​ពី​ខែ​តុលា​ឆ្នាំ​មុន​ ដើម្បី​ពិភាក្សា​ពី​ការ​កាត់​បន្ថយ​ការ​នាំ​ចេញ​កៅ​ស៊ូ​។​​ កិច្ច​ប្រជុំ​ប្រចាំ​តំបន់​មួយ​ទៀត​ស្តីពី​វិធាន​ការ​កាត់​បន្ថយ​ការ​ផ្គត់​ផ្គង់​កៅ​ស៊ូ​​ក្នុង​ចំណោម​ប្រទេស​ផលិត​កៅស៊ូ​ចំនួន​ ១១ ​អាច​នឹង​រៀប​ចំឡើង​នៅ​ខេត្ត​សៀម​រាប​ នៅ​ខែ​តុលា​ឆ្នាំ​នេះ ​ដោយ​រំពឹង​ថា​នឹង​ដាក់​ចេញ​នូវ​យុទ្ធសាស្រ្ត​មួយ​ចំនួន ​ដើម្បី​ធ្វើ​ឲ្យ​តម្លៃ​កៅស៊ូ​ដែល​កំពុង​ធ្លាក់​ចុះ​នេះ​ស្ទុះ​ងើប​ឡើង​​វិញ។​ នេះ​បើ​​​តាម​លោក​ លី​ ផល្លា។

លោក​បញ្ជាក់​ថា ​សេចក្តី​ព្រាង​ច្បាប់​នេះ ​អាច​នឹង​ត្រូវ​សិក្សា​បញ្ចប់​ ហើយ​បញ្ជូន​ទៅ​គណៈ​រដ្ឋមន្ត្រី​ បន្ទាប់​មក​បញ្ជូន​ទៅ​រដ្ឋ​សភា​ដើម្បី​អនុ​ម័ត ​បន្ទា​ប់​ពីកិច្ច​ប្រជុំនៅ​ខែ​តុលា ​ហើយ​ច្បាប់​នេះ​​អាច​នឹង​ត្រូវ​អនុ​ម័ត​នៅ​២០១៦។

លោក​ ម៉ែន ​សុភ័ក្រ្ត ​អគ្គ​នាយក​រង​ចម្ការ​កៅស៊ូ​ជុប​នៅ​ខេត្ត​កំពង់ចាម​បាន​ស្វាគមន៍​គំនិត​នេះ​។ ប៉ុន្តែ​បាន​ស្នើ​ឲ្យ​មាន​ការ​ប្រមូល​ធាតុ​ចូល​បន្ថែម​ទៀត​ពី​ វិស័យ​ឯកជន​ នៅ​មុន​ពេល​សេចក្តី​ព្រាង​ច្បាប់​នេះ​ត្រូវ​អនុម័ត​ឲ្យ​ប្រើ​ប្រាស់​ដើម្បី​ឲ្យ​ការ​អនុវត្ត​មាន​ភាព​ជាក់​ស្តែង និង​ប្រាកដ​និយម​។ ​

លោក​ថ្លែង​ថា៖​ «​វា​ល្អ​ហើយ​ដែល​យើង​មាន​បទប្បញ្ញត្តិ​ដើម្បី​ជំរុញ​ស្តង់​ដារ​ក្នុង​ឧស្សាហកម្ម​នេះ។​ ប៉ុន្តែ​ដើម្បី​ឧស្សាហកម្ម​នេះ​លូត​លាស់​បាន​ យើង​ត្រូវ​តែ​ធ្វើ​ឲ្យ​ប្រាកដ​ថា ច្បាប់​នេះ​នឹង​មិន​ក្លាយ​ទៅ​ជា​ការ​ដាក់​កម្រិត​ឬជា​ឧបសគ្គ​សម្រាប់​អ្នក​នៅ​ក្នុង​វិស័យ​ឯក​ជន​នោះ​ទេ។​ ប្រសិន​បើ​អាច ​គួរ​តែ​មាន​កិច្ច​ប្រជុំ ​រវាង​​រដ្ឋាភិបាល ​និង​វិស័យ​ឯកជន ​ដើម្បី​ពិភាក្សា ​បន្ថែម​ទៀត​លើ ច្បាប់​នេះ ​មុន​ពេល​ដែល​វា​ត្រូវ​បាន​អនុម័ត ​ដើម្បី​ឲ្យ​ប្រាកដ​ថា ​ច្បាប់​នេះ​បម្រើ​ផល​ប្រយោជន៍​នៃ​ឧស្សាហកម្ម​នេះ​»៕ BP

អត្ថបទគួរចាប់អារម្មណ៍

  • អាមេរិក​ផ្តល់​ជំនួយ ​៤២ ​ម៉ឺន​ដុល្លារ​ទៀត ​ដើម្បី​ស្រាវជ្រាវ​សំណល់​គ្រាប់​បែក​ចង្កោម

    ភ្នំពេញៈ រដ្ឋាភិបាល​អាមេរិក​បាន​សម្រេច​ផ្ដល់​ជំនួយ​ជាង​ ៤២​ ម៉ឺន​ដុល្លារ​បន្ថែម​ទៀត ដល់​មជ្ឈមណ្ឌល​កំចាត់​មីន​កម្ពុជា ហៅ​កាត់​ថា CMAC ដើម្បី​ស្រាវជ្រាវ​​សំណល់​គ្រាប់​បែក​ចង្កោម​ដែល​

  • ប្រាក់ចំណេញ​សុទ្ធ Qantas ធ្លាក់ ៦,៥ ​ភាគរយ

    ក្រុងស៊ីដនីៈ ក្រុមហ៊ុន​អាកាសចរណ៍ Qantas Airways កាលពី​ថ្ងៃ​ព្រហស្បតិ៍​បាន​ចេញ​ផ្សាយ​ការធ្លាក់ចុះ​ប្រាក់​ចំណេញ​សុទ្ធ​ប្រចាំ​ឆ្នាំ ៦,៥ ភាគរយ ដោយសារ​ការធ្លាក់ចុះ​ប្រាក់​ចំណេញ​ក្នុង​គ្រា​ដែល​ប្រេង​ឆៅ​មាន​តម្លៃ​កាន់តែ​ខ្ពស់ និង​ការធ្លាក់​ថ្លៃ​ប្រាក់​ដុល្លារ​អូស្ត្រាលី​កាន់តែ​ខ្លាំង​។

  • តោខៀវ​ឲ្យ Roma ខ្ចី​ជើង​ខ្សែការពារ Zappacosta

    ក្រុងមីឡានៈ ក្លិប Roma បានប្រកាស​កាលពី​ថ្ងៃ​ពុធ​ថា ខ្សែការពារ Davide Zappacosta នៅ​ក្លិប Chelsea បាន​ចូលរួម​ក្លិប Roma ក្នុង​លក្ខខណ្ឌ​ខ្ចី​ជើង ៦ ​ខែ ប៉ុន្តែ​អាច​បន្ត​រហូតដល់​ចុងរដូវកាល​នេះ​ក៏បាន​ដែរ​។ ​

  • កូរ៉េ​ខាងជើង​មិន​ចរចា​ពី​បញ្ហា​នុយក្លេអ៊ែរ​ទេ បើសិន​ US ​នៅតែ​បន្ត​វិធានការ​យោធា​បង្ក​អារិភាព​នោះ

    ក្រុងសេអ៊ូលៈ កូរ៉េ​ខាងជើង​បាន​ថ្លែង​កាលពី​ថ្ងៃ​ព្រហស្បតិ៍​ថា​ខ្លួន​ «​មិន​ចាប់អារម្មណ៍​» ​នៅក្នុង​ការចរចា​នោះទេ លុះណា​តែ​ក្រុង​វ៉ាស៊ីនតោន​ឈប់​ «​វិធានការ​យោធា​បង្ក​អរិភាព​កាន់តែ​ខ្លាំង​ឡើង​ជាមួយ​ខ្លួន​នោះ​» ខណៈ​ប្រេសិត​ពិសេស​ជាន់ខ្ពស់​អាមេរិក​ម្នាក់​បាន​ទស្សនកិច្ច​ទៅកាន់​ក្រុង​សេអ៊ូល​ដោយ​ផ្តោត​ទៅ​លើ​ការធ្វើឲ្យ​កិច្ចចរចា​ពី​បញ្ហា​នុយក្លេអ៊ែរ​ជាមួយ​ក្រុង​ព្យុងយ៉ាង ដំណើរការ​ឡើងវិញ​។