.jpg)
លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម ថ្លែងនាពេលកន្លងមក។ រូបថត ក្រសួងព័ត៌មាន
ភ្នំពេញៈ មន្ត្រីជាន់ខ្ពស់ក្រសួងពាណិជ្ជកម្មបានប្រាប់ថា ការពិភាក្សាលើសេចក្តីព្រាងអនុក្រឹត្យស្តីពីការរៀបចំ និងប្រព្រឹត្តទៅនៃគណៈកម្មការជាតិការពារអ្នកប្រើប្រាស់ នឹងត្រូវបញ្ជូនទៅទីស្តីការគណៈរដ្ឋមន្រ្តីនៅខែក្រោយ។
គណៈកម្មការនេះ មានតួនាទីអនុវត្តច្បាប់ស្តីពីកិច្ចការពារអ្នកប្រើប្រាស់ដែលច្បាប់នេះបង្កើតឡើងក្នុងគោលបំណងធានាឲ្យមានកិច្ចការពារអ្នកប្រើប្រាស់ និងលើកកម្ពស់ការប្រកួតប្រជែងដោយសុចរិត។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម ប្រាប់ភ្នំពេញប៉ុស្តិ៍ថា អគ្គនាយកដ្ឋាននឹងប្រជុំពិភាក្សាលើសេចក្តីព្រាងអនុក្រឹត្យស្តីពីការរៀបចំ និងប្រព្រឹត្តទៅនៃគណៈកម្មការជាតិការពារអ្នកប្រើប្រាស់នេះម្តងទៀតនៅថ្ងៃអង្គារសប្តាហ៍ក្រោយ ដើម្បីពិនិត្យកែលម្អបន្ថែម។ លោកបន្តថា ក្រោយពីពិនិត្យរួចរាល់ ឯកសារនឹងត្រូវដាក់ជូនរដ្ឋមន្ត្រីធ្វើការពិនិត្យ មុននឹងបញ្ចូនទៅទីស្តីការគណៈរដ្ឋមន្ត្រី ដើម្បីបើកកិច្ចប្រជុំពិនិត្យ និងអនុម័ត។
លោកថ្លែងថា៖ «ការជជែកពិភាក្សាផ្ទៃក្នុងរបស់យើងគ្រោងនឹងបញ្ចប់នៅថ្ងៃទី ១៩ ខែឧសភា ហើយយើងគ្រោងនឹងស្នើសុំរៀបចំកិច្ចប្រជុំអន្តរក្រសួងនៅទីស្តីការគណៈរដ្ឋមន្ត្រីក្នុងសប្តាហ៍ទី១ ឬទី២ ក្នុងខែមិថុនា»។
លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្មបានប្រាប់ថា សេចក្តីព្រាងអនុក្រឹត្យនេះត្រូវបានកែចំណុចមួយចំនួនរួចរាល់ហើយ។ គណៈកម្មការនេះមានសមាសភាព ១០ រូប។
ច្បាប់ស្តីពីកិច្ចការពារអ្នកប្រើប្រាស់ត្រូវបានប្រកាសឲ្យប្រើប្រាស់កាលពីថ្ងៃទី ២ ខែវិច្ឆិកា ឆ្នាំ ២០១៩ ដែលមាន ១១ ជំពូក និង ៥១ មាត្រា។
ច្បាប់នេះមានគោលដៅកំណត់វិធានការ និងយន្តការដើម្បីរួមចំណែកបង្កើតបរិយាកាសនៃការធ្វើពាណិជ្ជកម្មរួមមានសិទ្ធិ និងផលប្រយោជន៍របស់អ្នកប្រើប្រាស់ត្រូវបានការពារ ការធ្វើពាណិជ្ជកម្មមានការប្រកួតប្រជែងដោយសុចរិត និងអ្នកប្រើប្រាស់ និងពាណិជ្ជករធ្វើសកម្មភាពជាមួយគ្នាដោយមានទំនុកចិត្ត៕LA
