ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គ្រោងនឹងបញ្ជូនសេចក្តីព្រាងច្បាប់ស្តីពីសហគ្រាសធុនតូច និងមធ្យម ទៅកាន់ក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យ និងផ្តល់ធាតុចូលបន្ថែមទៀត បន្ទាប់ពីក្រុមការងារបច្ចេកទេសក្រសួងឧស្សាហកម្មបានបញ្ចប់សេចក្តីព្រាងច្បាប់នេះ។
លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យមនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានប្រាប់ ភ្នំពេញ ប៉ុស្តិ៍ថា សេចក្តីព្រាងច្បាប់ស្តីពីសហគ្រាសធុនតូច និងមធ្យម ត្រូវបានក្រុមការងាររៀបចំបញ្ចប់សេចក្តីព្រាងរួចរាល់ហើយ។ ក្រុមការងារនេះដឹកនាំដោយលោក គីម ទូច រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោកបន្ថែមថា សេចក្តីព្រាងច្បាប់នេះនឹងដាក់ឆ្លងរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ១ លើកទៀត ដើម្បីពិនិត្យ និងសម្រេចចុងក្រោយមុននឹងដាក់ជូនក្រសួងសេដ្ឋកិច្ច និងហិរញ្ញវត្ថុដែលជាប្រធានគណៈកម្មាធិការសកម្មភាពគោលនយោបាយលើកស្ទួយសហគ្រាសធុនតូច និងមធ្យម។
លោកថ្លែងថា៖ «យើងនៅរង់ចាំដាក់ជូនសេចក្តីព្រាងទៅក្រសួងសេដ្ឋកិច្ច និងហិរញ្ញវត្ថុ ហើយនៅពេលទៅដល់ដៃក្រសួងសេដ្ឋកិច្ច គាត់នឹងអញ្ជើញក្រសួង និងស្ថាប័នពាក់ព័ន្ធមកប្រជុំផ្តល់ធាតុចូលបន្ថែម»។
លោកបានបញ្ជាក់ថា៖ «ក្រុមការងារបច្ចេកទេសក្រសួងបានពិភាក្សាឆ្លង ១ កម្រិតហើយ នៅតែឆ្លងយោបល់ និងរង់ចាំការផ្តល់អនុសាសន៍ណែនាំពីឯកឧត្តម ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ១ ជំហានទៀតទើបយើងនឹងដាក់ជូនក្រសួងសេដ្ឋកិច្ច និងហិរញ្ញវត្ថុ»។
លោកប្រាប់ទៀតថា ច្បាប់នេះត្រូវបានបង្កើតឡើងក្នុងគោលបំណងដើម្បីសម្របសម្រួល និងជំរុញការគាំទ្រដល់សហគ្រាសធុនតូច និងមធ្យមទទួលបានឱកាសទីផ្សារឱ្យបានទូលំទូលាយជាងមុន។
លោកនិយាយថា៖ «ច្បាប់នេះក៏នឹងជួយកាត់បន្ថយនូវការប្រកួតប្រជែងមិនស្មើភាព កាលណាយើងមានច្បាប់នេះ។ ពិសេសគោលដៅរបស់យើងជំរុញទីផ្សារ និងខ្សែចង្វាក់ផលិតកម្មដោយជំរុញបង្កើនផលិតកម្មឱ្យប្រើប្រាស់វត្ថុធាតុដើមក្នុងស្រុកឱ្យអស់ពីលទ្ធភាព»។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ បានគាំទ្រចំពោះការបង្កើតច្បាប់នេះ ដោយលោកជឿថា ច្បាប់នេះនឹងជួយលើកកម្ពស់ដល់អាជីវកម្មសហគ្រាសធុនតូច និងមធ្យមនៅកម្ពុជា។
លោកប្រាប់ថា៖ «សព្វថ្ងៃសហគ្រាសធុនតូច និងមធ្យមយើងចាំបាច់ត្រូវការមានច្បាប់ និងគោលនយោបាយក្នុងការអភិវឌ្ឍ និងតម្រង់ទិសពួកគេដើរលើខ្សែបន្ទាត់មួយដ៏ត្រឹមត្រូវទៅតាមស្តង់ដាជាតិ និងអន្តរជាតិ»។
សហគ្រាសធុនតូច និងមធ្យមត្រូវបានរដ្ឋាភិបាលកំណត់ទិសដៅនៅត្រឹមឆ្នាំ ២០២៥ ដោយសហគ្រាស ធុនតូច និងមធ្យម ៨០ ភាគរយ និង ៩៥ ភាគរយរៀងគ្នានឹងត្រូវបានចុះបញ្ជីជាផ្លូវការ ហើយសហគ្រាសធុនតូច និងមធ្យម ៥០ ភាគរយ និង ៧០ ភាគរយរៀងគ្នានឹងមានបញ្ជិកាគណនេយ្យ និងតារាងតុល្យការត្រឹមត្រូវ ដើម្បីពង្រឹងអភិបាលកិច្ចអាជីវកម្ម បង្កើនលទ្ធភាពទទួលបានហិរញ្ញប្បទាន និងជាមូលដ្ឋានវាយតម្លៃសម្រាប់ទទួលបានការគាំទ្រផ្នែកបច្ចេកទេស ឬការលើកទឹកចិត្តផ្សេងៗពីរដ្ឋាភិបាល។
នេះបើតាមសេចក្តីព្រាងរបាយការណ៍ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ របស់ទីស្តីការគណៈរដ្ឋមន្ត្រីដែលបានផ្សាយកាលពីខែ សីហា ឆ្នាំ ២០២០៕ LA