The Phnom Penh Post Search

Search form




Logo of Phnom Penh Post newspaper Phnom Penh Post - សេដាក​បង្កើត​សេវា​ធានា​រ៉ាប់រង​សម្រាប់​កសិករ

សេដាក​បង្កើត​សេវា​ធានា​រ៉ាប់រង​សម្រាប់​កសិករ

កសិករ​កំពុង​ស្ទូង​កាល​ពី​រដូវ​បង្ក​បង្កើន​ផល​ពី​ឆ្នាំ​ទៅ។ CEDAC ផ្តល់​សេវា​ធានា​រ៉ាប់​រង​ដល់​កសិករ​ដើម្បី​ការពារ​ហានិភ័យ​។
កសិករ​កំពុង​ស្ទូង​កាល​ពី​រដូវ​បង្ក​បង្កើន​ផល​ពី​ឆ្នាំ​ទៅ។ CEDAC ផ្តល់​សេវា​ធានា​រ៉ាប់​រង​ដល់​កសិករ​ដើម្បី​ការពារ​ហានិភ័យ​។ ភ្នំពេញ ប៉ុស្តិ៍

សេដាក​បង្កើត​សេវា​ធានា​រ៉ាប់រង​សម្រាប់​កសិករ

ភ្នំពេញៈ ក្រុមហ៊ុន​ធានា​រ៉ាប់រង​សហករណ៍​កសិកម្ម​កម្ពុជា (CACIC) ដែល​ជា​គំនិត​ផ្តូច​ផ្ដើម​របស់​អង្គការ​សេដាក​បាន​ប្រកាស​កាលពី​ម្សិលមិញ​ថា​នឹង​ចាប់​ផ្ដើម​ផ្តល់​ការ​ធានា​រ៉ាប់រង​ខ្នាត​តូច​លើ​សេវា​កសិកម្ម​ដើម្បី​ជួយ​ដល់​កសិករ​ក្នុង​ការ​បង្ក​បង្កើន​ផល​ស្រូវ​ឲ្យ​កាន់​តែ​ល្អ​ប្រសើរ​ឆ្លើយ​តប​នឹង​ការ​ផ្លាស់​ប្តូរ​អាកាសធាតុ។

កសិករ​ដែល​ជា​សមាជិក​របស់ CACIC នឹង​បង់​ថ្លៃ​ធានា​រ៉ាប់រង ដែល​ខុស​គ្នា​ទៅ​តាម​ទំហំ​ដី និង​រួម​ទាំង​កម្រិត​ហានិភ័យ។ ជា​ថ្នូរ ពួក​គេ​ទទួល​បាន​ការ​ពិគ្រោះ​យោបល់​ស្ដីពី​បច្ចេកទេស​ធ្វើ​កសិកម្ម​ដែល​ធន់​នឹង​ការ​ប្រែប្រួល​អាកាសធាតុ ហើយ​នឹង​ទទួល​បាន​ការ​ផ្ដល់​ហិរញ្ញប្បទាន​នៅ​ពេល​ដំណាំ​កសិកម្ម​របស់​ពួក​គេ​រង​ការ​ខូត​ខាត​ដោយ​សារ​ទឹក​ជំនន់ ឬ​ភាព​រាំង​ស្ងូត។ នេះ​បើ​យោង​តាម​លោក យ៉ង សាំងកុមារ ប្រធាន​របស់ CEDAC ។

លោក​លើក​ឡើង​ថា៖ «កសិករ​នៅ​ពេល​នេះ​ប្រឈម​នឹង​បញ្ហា​ពិបាក​ដោយ​សារ​តែ​ទឹក​ជំនន់ និង​ភាព​រាំង​ស្ងូត​ដែល​មិន​អាច​គិត​ទុក​ជា​មុន​ដោយ​សារ​តែ​ការ​ប្រែប្រួល​ធាតុ​អាកាស។ មិន​ដែល​មាន​ប្រព័ន្ធ​ធានា​រ៉ាប់រង​សម្រាប់​កសិករ​មាន​ដើម​ទុន​តិច​តួច​ដើម្បី​ស្ដារ​ការ​ដាំ​ដុះ​ពី​គ្រោះ​មហន្តរាយ​នោះ​ទេ ដែល​បង្ខំ​ឲ្យ​ពួក​គេ​យក​ប្រាក់​កម្ចី​ពី​គ្រឹះស្ថាន​ហិរញ្ញវត្ថុ​ដែល​មាន​អត្រា​ការ​ប្រាក់​ខ្ពស់»។

លោក​ថ្លែង​ថា៖ «ការ​ធានា​រ៉ាប់រង​នេះ​នឹង​ជា​មូលនិធិ​ដែល​ត្រូវ​បាន​បម្រុង​ទុក​សម្រាប់​កសិករ។ វា​នឹង​ជួយ​កាត់​បន្ថយ​ក្នុង​ករណី​ដែល​កសិករ​លក់​ដី​ដំណាំ​ដើម្បី​សង​ប្រាក់​ដែល​មាន​ការ​ប្រាក់​ខ្ពស់ ការ​ធ្វើ​ចំណាក​ស្រុក​ដើម្បី​រក​ការងារ​ធ្វើ​នៅ​បរទេស និង​ដើម្បី​ឲ្យ​ពួក​គេ​ក្លាយ​ជា​កសិករ​មាន​ជំនាញ​វិជ្ជាជីវៈ ឬ​ពាណិជ្ជកម្ម​ក្នុង​ការ​បង្ក​បង្កើន​ផល​ប្រកប​ដោយ​និរន្តរភាព»។

CACIC ត្រូវ​បាន​បង្កើត​ឡើង​ដែល​មាន​មូលនិធិ ៩៦ ០០០ ដុល្លារ​អាមេរិក​បាន​ពី​មូលនិធិ Achmea របស់​ប្រទេស​ហូឡង់ ហើយ​នឹង​ត្រូវ​បាន​អនុវត្ត​ដោយ CEDAC ក្នុង​រយៈពេល​៥​ឆ្នាំ​ដែល​កំណត់​ទិសដៅ​រួម​មាន ខេត្ត​តាកែវ កំពត កំពង់ឆ្នាំង ព្រៃវែង និង​កំពង់ស្ពឺ មុន​ពេល​ការ​ពង្រីក​យ៉ាង​ទូលំ​ទូលាយ​ទូទាំង​ប្រទេស។

នៅ​ក្នុង​រយៈពេល ២​ខែ មាន​កសិករ​ប្រហែល ៦០ នាក់​បាន​ចុះ​ហត្ថលេខា​ជាមួយ CACIC ដែល​មាន​ផ្ទៃ​ដី​វាល​ស្រែ​សរុប​ជាង ៦០ ហិកតា ដោយ​រក​បាន​ប្រាក់​ប្រហែល ២,៧ លាន​រៀល ឬ ៦៥០ ដុល្លារ​អាមេរិក។

លោក​សាំងកុមារ រំពឹង​ថា​ចំនួន​នេះ​នឹង​កើន​ឡើង​ដល់ ១០០ នាក់​ត្រឹម​ដំណាច់​ឆ្នាំ​នេះ។

លោក មាស ឆឹល កសិករ​មក​ពី​ខេត្ត​កំពង់ស្ពឺ​ដែល​បាន​ចុះ​ហត្ថលេខា​រួច​រាល់​ហើយ​សម្រាប់​ការ​ធានា​រ៉ាប់រង​នេះ បាន​ថ្លែង​កាលពី​ម្សិលមិញ​ថា ការ​ចុះ​ហត្ថលេខា​លើ​ការ​ធានា​រ៉ាប់រង​នេះ​បាន​ជួយ​ឲ្យ​រូប​លោក​មាន​អារម្មណ៍​ទទួល​បាន​ការ​ការពារ​កាន់​តែ​ច្រើន​អំពី​ការ​ផ្ដល់​មូលនិធិ​សម្រាប់​វាល​ស្រែ​របស់​លោក​នៅ​ពេល​ដែល​ខេត្ត​របស់​លោក​បាន​ទទួល​រង​ផល​ប៉ះពាល់​ដោយ​ភាព​រាំង​ស្ងូត​អស់​រយៈពេល ៣ ​ឆ្នាំ​ជាប់ៗ​គ្នា។

លោក​បញ្ជាក់​ថា៖ «ចាប់​តាំង​ពី​ឆ្នាំ​ ២០១២ មិន​មាន​ទឹក​គ្រប់​គ្រាន់​នោះ​ទេ។ ស្រូវ​ត្រូវ​បាន​បំផ្លាញ។ ខ្ញុំ​តែង​តែ​ពឹង​លើ​ប្រាក់​កម្ចី​ដើម្បី​ស្ដារ​ការ​ដាំ​ដុះ​ស្រូវ​ឡើង​វិញ។ ការ​ធានា​រ៉ាប់រង​នេះ​នឹង​ជា​ជម្រើស​មួយ​សម្រាប់​ការ​ផ្ដល់​មូលនិធិ​ដល់​រូប​ខ្ញុំ»៕PB

អត្ថបទគួរចាប់អារម្មណ៍

  • អាមេរិក​ផ្តល់​ជំនួយ ​៤២ ​ម៉ឺន​ដុល្លារ​ទៀត ​ដើម្បី​ស្រាវជ្រាវ​សំណល់​គ្រាប់​បែក​ចង្កោម

    ភ្នំពេញៈ រដ្ឋាភិបាល​អាមេរិក​បាន​សម្រេច​ផ្ដល់​ជំនួយ​ជាង​ ៤២​ ម៉ឺន​ដុល្លារ​បន្ថែម​ទៀត ដល់​មជ្ឈមណ្ឌល​កំចាត់​មីន​កម្ពុជា ហៅ​កាត់​ថា CMAC ដើម្បី​ស្រាវជ្រាវ​​សំណល់​គ្រាប់​បែក​ចង្កោម​ដែល​

  • ប្រាក់ចំណេញ​សុទ្ធ Qantas ធ្លាក់ ៦,៥ ​ភាគរយ

    ក្រុងស៊ីដនីៈ ក្រុមហ៊ុន​អាកាសចរណ៍ Qantas Airways កាលពី​ថ្ងៃ​ព្រហស្បតិ៍​បាន​ចេញ​ផ្សាយ​ការធ្លាក់ចុះ​ប្រាក់​ចំណេញ​សុទ្ធ​ប្រចាំ​ឆ្នាំ ៦,៥ ភាគរយ ដោយសារ​ការធ្លាក់ចុះ​ប្រាក់​ចំណេញ​ក្នុង​គ្រា​ដែល​ប្រេង​ឆៅ​មាន​តម្លៃ​កាន់តែ​ខ្ពស់ និង​ការធ្លាក់​ថ្លៃ​ប្រាក់​ដុល្លារ​អូស្ត្រាលី​កាន់តែ​ខ្លាំង​។

  • តោខៀវ​ឲ្យ Roma ខ្ចី​ជើង​ខ្សែការពារ Zappacosta

    ក្រុងមីឡានៈ ក្លិប Roma បានប្រកាស​កាលពី​ថ្ងៃ​ពុធ​ថា ខ្សែការពារ Davide Zappacosta នៅ​ក្លិប Chelsea បាន​ចូលរួម​ក្លិប Roma ក្នុង​លក្ខខណ្ឌ​ខ្ចី​ជើង ៦ ​ខែ ប៉ុន្តែ​អាច​បន្ត​រហូតដល់​ចុងរដូវកាល​នេះ​ក៏បាន​ដែរ​។ ​

  • កូរ៉េ​ខាងជើង​មិន​ចរចា​ពី​បញ្ហា​នុយក្លេអ៊ែរ​ទេ បើសិន​ US ​នៅតែ​បន្ត​វិធានការ​យោធា​បង្ក​អារិភាព​នោះ

    ក្រុងសេអ៊ូលៈ កូរ៉េ​ខាងជើង​បាន​ថ្លែង​កាលពី​ថ្ងៃ​ព្រហស្បតិ៍​ថា​ខ្លួន​ «​មិន​ចាប់អារម្មណ៍​» ​នៅក្នុង​ការចរចា​នោះទេ លុះណា​តែ​ក្រុង​វ៉ាស៊ីនតោន​ឈប់​ «​វិធានការ​យោធា​បង្ក​អរិភាព​កាន់តែ​ខ្លាំង​ឡើង​ជាមួយ​ខ្លួន​នោះ​» ខណៈ​ប្រេសិត​ពិសេស​ជាន់ខ្ពស់​អាមេរិក​ម្នាក់​បាន​ទស្សនកិច្ច​ទៅកាន់​ក្រុង​សេអ៊ូល​ដោយ​ផ្តោត​ទៅ​លើ​ការធ្វើឲ្យ​កិច្ចចរចា​ពី​បញ្ហា​នុយក្លេអ៊ែរ​ជាមួយ​ក្រុង​ព្យុងយ៉ាង ដំណើរការ​ឡើងវិញ​។