ភ្នំពេញៈ សហគ្រាសសេដាក គ្រោងបង្កើនការនាំចេញអង្ករសរីរាង្គបន្ថែមនៅ ឆ្នាំ២០១៥ ខណៈតួលេខនាំចេញសរុបកាលពីឆ្នាំមុនដែលបានកើនប្រមាណ ២០ ភាគរយ។
លោក ស៊ូ សារ៉ន អ្នកគ្រប់គ្រងលើការនាំចេញអង្ករសរីរាង្គរបស់សហគ្រាសសេដាក បានឲ្យដឹងកាលពីម្សិលមិញថា សហគ្រាសសេដាក ជាអ្នកនាំចេញអង្ករសរីរាង្គឈានមុខគេនៅកម្ពុជាដោយបាននាំចេញអង្ករក្រអូបសរីរាង្គសរុប ៥៤០ តោនទៅកាន់ទីផ្សារអន្តរជាតិនៅ ២០១៤ កើនប្រហែល ២០ ភាគរយធៀបនឹង ឆ្នាំ២០១៣។
លោកថ្លែងថា៖ «យីហោអង្ករសរីរាង្គរបស់យើងបានរីករាលដាលខ្លាំងនៅក្នុងរយៈពេលប៉ុន្មានឆ្នាំចុងក្រោយនេះ បូករួមនឹងការឈ្នះពានរង្វាន់ជាអង្ករល្អបំផុតរបស់ពិភពលោករយៈពេល ៣ ឆ្នាំជាប់ៗគ្នា បានធ្វើឲ្យពិភពលោកកាន់តែស្គាល់អង្ករកម្ពុជា។ យើងគ្រោងនឹងបង្កើនការនាំចេញឲ្យបានពី ៩០០ ទៅ ១០០០ តោននៅឆ្នាំនេះបន្ថែមទៀតដើម្បីបំពេញតម្រូវការក្នុងទីផ្សារអន្តរជាតិ»។
លោកបន្តថា បណ្ដាប្រទេសសហភាពអឺរ៉ុប អាមេរិក និងហុងកុង ជាប្រទេសនាំចូលអង្ករសរីរាង្គពីកម្ពុជា ខណៈបណ្ដាប្រទេសអារ៉ាប់ គឺជាទីផ្សារដ៏មានសក្ដានុពលនៅពេលអនាគត។
លោកស្នើឲ្យរដ្ឋាភិបាលបង្កើតផែនការយុទ្ធសាស្ដ្រដើម្បីជំរុញការផលិត និងការនាំចេញអង្ករសរីរាង្គ បន្ថែមពីលើការជំរុញលើការផលិត និងនាំចេញអង្ករទូទៅ ដែលនឹងផ្តល់តម្លៃកាន់តែខ្ពស់សម្រាប់កសិករ និងសេដ្ឋកិច្ចផងដែរ។
ក្រុមហ៊ុន អេមរូ រ៉ាយស៍ អ្នកនាំចេញអង្ករមានឈ្មោះមួយក្នុងទីផ្សារ កាលពី ខែកញ្ញា ឆ្នាំមុនបានចុះហត្ថលេខាលើកិច្ចព្រមព្រៀងមួយជាមួយសហករណ៍កសិករ ៨ នៅក្នុង ខេត្តព្រះវិហារ ដើម្បីទិញស្រូវក្រអូបសរីរាង្គ ២ ៥០០ តោនដើម្បីនាំចេញទៅកាន់ទីផ្សារអឺរ៉ុប និងអាមេរិក។
លោក សុង សារ៉ន នាយកប្រតិបត្តិក្រុមហ៊ុន អេមរូ រ៉ាយស៍ បានប្រាប់ ភ្នំពេញ ប៉ុស្ដិ៍ កាលពីម្សិលមិញថា ក្រុមហ៊ុនលោកនឹងនាំចេញអង្ករសរីរាង្គលើកដំបូងដោយចាប់ផ្ដើមនៅក្នុង ខែកុម្ភៈ នេះ។
លោកលើកឡើងថា៖ «យើងនឹងនាំចេញនៅឆ្នាំនេះ ១ ៥០០ តោន និងបង្កើនដល់ ២ ៥០០ តោនក្នុង ឆ្នាំ២០១៦ បន្ទាប់មកនឹងបង្កើនដល់ទៅ ៤០០០ តោននៅ ឆ្នាំ២០១៧»។ កសិករនៃសហករណ៍ទាំង ៨ នឹងទទួលបានតម្លៃបន្ថែម ២០ ភាគរយពីតម្លៃទីផ្សារក្នុងមួយតោនសម្រាប់ស្ដង់ដារស្រូវក្រអូបសរីរាង្គ។
តួលេខនាំចេញអង្ករសរីរាង្គសរុបមានចំនួនតិចជាង ១ ភាគរយនៃតួលេខនាំចេញអង្ករសរុបរបស់កម្ពុជា កាលពី ឆ្នាំ២០១៤ ដែលមានចំនួនប្រមាណជាង ៣៨ ម៉ឺនតោន។
លោក វ៉ាន់ ដេវិដ ទីប្រឹក្សាជាន់ខ្ពស់នៅសហព័ន្ធអង្ករកម្ពុជា ថ្លែងកាលពីម្សិលមិញថា ដោយសារការកំណត់ទីតាំងដីសម្រាប់ការដាំដុះស្រូវស្របតាមលក្ខខណ្ឌសរីរាង្គ ដំណើរការត្រួតពិនិត្យរយៈពេលវែង និងនីតិវិធីបញ្ជាក់ពីសរីរាង្គជាហេតុធ្វើឲ្យការផលិតអង្ករសរីរាង្គនៅកម្ពុជាមានកម្រិតនៅឡើយ។
លោកថ្លែងថា៖ «ច្បាស់ណាស់ថា «អង្ករសរីរាង្គ» នឹងទាមទារឲ្យមានគុណភាពកាន់តែខ្ពស់នៅក្នុងទីផ្សារអន្តរជាតិ ប៉ុន្តែដោយសារនីតិវិធីជាប់ទាក់ទងនឹងការផលិតដូចនោះមានរយៈពេលវែង កសិករភាគច្រើននឹងរួញរានៅក្នុងការធ្វើវា ហើយសេដាក បានចំណាយពេលជាច្រើនឆ្នាំនៃដំណើរការអប់រំដើម្បីបញ្ចុះបញ្ចូលកសិករមួយចំនួនឲ្យចុះកិច្ចព្រមព្រៀងក្នុងការបង្កបង្កើនផល»។
លោកបន្ថែមថា៖ «វានឹងនៅតែត្រូវការពេលវេលាមួយចំនួនមុនពេលកម្ពុជាអាចបង្កើនចំនួនអង្ករសរីរាង្គកាន់តែច្រើន ប៉ុន្តែផ្ដោតលើការផលិតអង្ករចម្រុះមានតម្លៃខ្ពស់គឺពិតជាគោលដៅដ៏សំខាន់ដើម្បីធ្វើឲ្យផលិតផលរបស់យើងមានភាពផ្សេងៗគ្នាជាមួយនឹងដៃគូប្រកួតប្រជែងជិតខាងរបស់យើងរយៈពេលវែង»៕
