.jpg)
សកម្មភាពនៃការលើកដាក់កុងតឺន័រ នៅកំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ ចក្ខុវិស័យសេដ្ឋកិច្ចរបស់ប្រទេស កម្ពុជា នៅតែរឹងមាំក្នុងរយៈពេលមធ្យម ទោះបីជាប្រទេសនេះនឹងប្រឈមហានិភ័យខាងក្រៅកាន់តែធំ និងលទ្ធភាពបាត់បង់សិទ្ធិពាណិជ្ជកម្មទៅកាន់ទីផ្សារសំខាន់ក៏ដោយ។
ក្រុមការងាររបស់មូលនិធិរូបិយវត្ថុអន្តរជាតិ (IMF) នៅដើមខែនេះបានធ្វើទស្សនកិច្ចមកកាន់ទីក្រុងភ្នំពេញ និងបានជួបលោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ (MEF) របស់កម្ពុជា ដើម្បីធ្វើការពិភាក្សាអំពីការវិវឌ្ឍថ្មីៗ និងចក្ខុវិស័យសេដ្ឋកិច្ចរបស់ប្រទេស កម្ពុជា។
យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ចឲ្យដឹងថា មូលនិធិ IMF ព្យាករថា កំណើនសេដ្ឋកិច្ចរបស់កម្ពុជានឹងរក្សាបានចន្លោះពី ៦,៥ ភាគរយទៅ ៧ ភាគរយនៅរយៈពេលខ្លី និងរយៈពេលមធ្យម ដោយសារលទ្ធផលសារពើពន្ធកាន់តែប្រសើរ។
ទោះជាយ៉ាងណា ក្រុមបេសកកម្មនេះបានឲ្យដឹងថា ប្រទេស កម្ពុជា ជាកម្មវត្ថុក្នុងការប្រឈមនឹងហានិភ័យខ្ពស់ជាងពីមុន ដែលអាចប៉ះពាល់ដល់កំណើនសេដ្ឋកិច្ច ដែលហានិភ័យទាំងនោះ រួមមានការបាត់បង់សិទ្ធិពាណិជ្ជកម្មពីកម្មវិធីអ្វីៗគ្រប់យ៉ាងលើកលែងតែអាវុធ (EBA) របស់សហភាពអឺរ៉ុប ផលប៉ះពាល់ដែលរីករាលដាលដោយសង្គ្រាមពាណិជ្ជកម្មរវាងអាមេរិក និងប្រទេស ចិន និងការសម្រេចចិត្តរបស់ចក្រភពអង់គ្លេសក្នុងការចាកចេញពីសហភាពអឺរ៉ុប (Brexit)។
សេចក្ដីប្រកាសព័ត៌មានរបស់ក្រសួងសេដ្ឋកិច្ច បានឲ្យដឹងថា៖ «[បុគ្គលិករបស់ IMF] ក៏បង្ហាញការបារម្ភរបស់ពួកគេផងដែរអំពីការកើនឡើងការចំណាយមូលធន និងការកើនឡើងជាបន្តនូវឥណទានក្នុងការសាងសង់ និងវិស័យអចលនទ្រព្យ ដែលអាចឈានទៅរកហានិភ័យជាប្រព័ន្ធដល់វិស័យហិរញ្ញវត្ថុ»។
សេចក្ដីប្រកាសព័ត៌មាននេះបន្ថែមថា ក្រុមបេសកកម្មនេះវាយតម្លៃខ្ពស់ដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការដោះស្រាយបញ្ហា តាមរយៈការដាក់ចេញនីតិវិធីមួយចំនួន ដូចជាការបន្ទាបតម្លៃអគ្គិសនី ការកែតម្រូវប្រាក់ឈ្នួលអប្បបរមា និងការកាត់បន្ថយថ្ងៃឈប់សម្រាកប្រចាំឆ្នាំជាដើម។
ដោយដឹងពីលទ្ធភាពនៃការបាត់បង់ EBA ពីសហភាពអឺរ៉ុប លោក អូន ព័ន្ធមុនីរ័ត្ន បានឲ្យដឹងថា រដ្ឋាភិបាលបានដាក់បញ្ហានៃការបាត់បង់សិទ្ធិពាណិជ្ជកម្មនេះទៅក្នុងការព្យាករសេដ្ឋកិច្ច និងបានដាក់ចេញកំណែទម្រង់ជាបន្តបន្ទាប់ ដើម្បីទប់ស្កាត់ហានិភ័យ និងដើម្បីរក្សាកំណើនសេដ្ឋកិច្ចយ៉ាងហោចណាស់ឲ្យបាន ៦,៥ ភាគរយ។
លោកនាយករដ្ឋមន្ដ្រី ហ៊ុន សែន កាលពីចុងខែមុន បានប្រកាសកំណែទម្រង់ទ្រង់ទ្រាយធំមួយ ដោយបានដាក់ចេញយុទ្ធសាស្ដ្រ ១៧ ចំណុច ដើម្បីជំរុញកំណើនសេដ្ឋកិច្ច ដែលលោកបានឲ្យដឹងថា អាចជួយវិស័យឯកជនសន្សំប្រាក់បានរហូតដល់ ៤០០ លានដុល្លារក្នុង ១ ឆ្នាំ។
យុទ្ធសាស្ដ្រនេះបានដាក់បញ្ចូលនូវគំនិតផ្ដួចផ្ដើមការសន្សំប្រាក់សំខាន់ៗមួយចំនួនសម្រាប់ក្រុមហ៊ុនឯកជន ដែលរួមមានទាំងការកាត់បន្ថយការចំណាយលើការដឹកជញ្ជូន កម្រៃសេវាកំពង់ផែ និងតម្លៃអគ្គិសនី ព្រមទាំងការកែទម្រង់លើការគ្រប់គ្រងប្រតិបត្តិការផ្លូវដែកផងដែរ។
លោកនាយករដ្ឋមន្ត្រីបានឲ្យដឹងថា កំណែទម្រង់ទាំងនេះនឹងអាចឲ្យប្រទេស កម្ពុជា បន្តមានភាពប្រកួតប្រជែងជាមួយការនាំចេញរបស់ខ្លួន ប្រសិនបើសហភាពអឺរ៉ុបដកលទ្ធភាពទទួលបានសិទ្ធិពាណិជ្ជកម្មរបស់កម្ពុជាពីកម្មវិធីអ្វីៗគ្រប់យ៉ាងលើកលែងតែអាវុធ។
ធនាគារអភិវឌ្ឍន៍អាស៊ី (ADB) បានព្យាករកាលពីដើមខែនេះថា សេដ្ឋកិច្ចកម្ពុជានឹងមានកំណើន ៧ ភាគរយនៅឆ្នាំនេះ ធ្លាក់ចុះបន្តិចពី ៧,៣ ភាគរយដែលសម្រេចបានកាលពីឆ្នាំ២០១៨ ដោយសារតែកត្តាខាងក្រៅ៕ LA
