.jpg)
ទីក្រុងប៉េកាំងៈ ទិន្នន័យផ្លូវការបានបង្ហាញកាលពីថ្ងៃចន្ទឱ្យដឹងថា សេដ្ឋកិច្ចចិន មានកំណើន ៤,៩ ភាគរយ ក្នុងត្រីមាសទី ៣ ធៀបនឹងរយៈពេលដូចគ្នានៃឆ្នាំមុនដែលធ្វើឱ្យការងើបឡើងវិញរបស់ប្រទេសចិន បន្ទាប់ពីការបិទប្រទេសបណ្តាលមកពីជំងឺកូវីដ ដែលឈានកាន់តែជិតដល់កម្រិតនៅមុនការរីករាលដាល។
ប៉ុន្តែប្រទេសដែលមានសេដ្ឋកិច្ចធំបំផុតទី ២ របស់ពិភពលោកនេះកើនឡើងទាបជាងបន្តិចធៀបនឹងការរំពឹងទុកក្នុងត្រីមាសទី ៣ ពីខែកក្កដាដល់ខែកញ្ញាដែលព្រមានពីភាពមិនប្រាកដប្រជានៅពេលខាងមុខ ដោយសារ «បរិយាកាសអន្តរជាតិនៅតែស្មុគស្មាញ»។ នេះបើយោងតាមទិន្នន័យពីការិយាល័យជាតិស្ថិតិ (NBS)។
យោងតាមការព្យាកររបស់មូលនិធិរូបិយវត្ថុអន្តរជាតិ (IMF) ការងើបឡើងវិញរបស់ចិនរហូតមកទល់ពេលនេះបានធ្វើឱ្យចិនស្ថិតនៅលើវិថីដើម្បីក្លាយជាប្រទេសរីកចម្រើនសេដ្ឋកិច្ចធំតែមួយគត់នៅឆ្នាំនេះ ខណៈពេលដែលប្រទេសជាច្រើនជុំវិញពិភពលោក បន្តត្រដាបត្រដួសជាមួយការបិទប្រទេស និងរលកថ្មីនៃការឆ្លងវីរុស»។
អ្នកវិភាគដែលស្ទង់មតិដោយ AFP កាលពីមុននេះបានចង្អុលចំណុចដែលនាំឱ្យមានកំណើនប្រចាំត្រីមាសទី ៣ ក្នុងប្រទេសចិនដែលវីរុសកូរ៉ូណាកើតមានដំបូងមានចំនួន ៥,២ ភាគរយធៀបនឹងត្រីមាសដូចគ្នានៃឆ្នាំមុន និងកើនពី ៣,២ ភាគរយក្នុងត្រីមាសទី ២ កន្លងទៅ។
NBS បានបង្ហាញថា ការលក់រាយកើនឡើងយ៉ាងរហ័សជាងការរំពឹងទុកក្នុងខែកញ្ញាមានចំនួន ៣,៣ ភាគរយ កើនពី ០,៥ ភាគរយធៀបនឹងខែសីហា។
ប៉ុន្តែកំណើននេះនៅតែយឺតជាងកំណើនទិន្នផលឧស្សាហកម្មដែលមានល្បឿនលឿនជាងការរំពឹងទុកនៅ ៦,៩ ភាគរយធៀបនឹងខែកញ្ញាដូចគ្នានៃឆ្នាំមុន។
អ្នកដឹកនាំបក្សកុម្មុយនីស្ដចិនបានកោតសរសើរការដោះស្រាយបញ្ហាវីរុសរបស់ខ្លួនដែលផ្តល់នូវវ៉ាក់សាំងពិសោធន៍ដល់ប្រជាពលរដ្ឋរាប់សែននាក់ ពេលដែលខ្លួនស្វែងរកដើម្បីឆ្លុះបញ្ចាំងប្រភពដើមនៃការរីករាលដាល។
ប្រជាជនក្នុងប្រទេសចិនបានត្រឡប់ទៅទិញអីវ៉ាន់ ធ្វើដំណើរ និងការបរិភោគ ដែលផ្ទុយស្រឡះពីប្រជាជនជាច្រើនក្នុងពិភពលោក។
ប៉ុន្តែការព្រួយបារម្ភរយៈពេលវែងជុំវិញការងារ និងការកើតឡើងវិញនៃវីរុសក្នុងប្រទេសចិន កំពុងទាញទម្លាក់ទំនុកចិត្តអ្នកប្រើប្រាស់ ទោះបីរដ្ឋាភិបាលមានបំណងបង្កើនតម្រូវការក្នុងប្រទេសរបស់ខ្លួនក្តី។
លោក Lu Ting ប្រធានអ្នកសេដ្ឋកិច្ចនៅធនាគារវិនិយោគ Nomura បានលើកឡើងថា៖ «ប្រទេសចិនបានកសាងការងើបឡើងវិញយ៉ាងឆាប់រហ័សរបស់ខ្លួនតាមរយៈការបិទប្រទេស ការធ្វើតេស្តទ្រង់ទ្រាយធំ ការតាមដានចំនួនប្រជាជន និងការជំរុញសារពើពន្ធ»។
លោកបានបន្ថែមថា៖ «កត្តាផ្សេងៗទៀត ដូចជា កំណើននាំចេញ និងការងើបឡើងតម្រូវការបន្ទាប់ពីទឹកជំនន់ក៏ជំរុញសកម្មភាពក្នុងខែកញ្ញាដែរ»។
ប៉ុន្តែចិនមិនមែនរួចផុតទាំងស្រុងពីហានិភ័យនៃរលកទី ២ នៃជំងឺកូវីដ១៩នោះទេ ដែលអាចបណ្តាលឱ្យតម្រូវការទំនងជាបាត់បង់ខ្លះ ហើយភាពតានតឹងរវាងអាមេរិក និងចិនអាចធ្វើឱ្យរាំងស្ទះដល់ការនាំចេញរបស់ចិន និងការវិនិយោគ។
អ្នកនាំពាក្យនៃការិយាល័យស្ថិតិជាតិអ្នកនាង Liu Aihua បាននិយាយកាលពីថ្ងៃចន្ទថា ទោះបីជាសេដ្ឋកិច្ចចិនបានបន្តងើបឡើងវិញក៏ដោយ រូបភាពសកលនៅតែស្រអាប់នៅឡើយជាមួយអស្ថិរភាព និងភាពមិនច្បាស់លាស់។
អ្នកនាងបានបញ្ជាក់ថា សម្ពាធដ៏ខ្លាំងក្នុងការទប់ស្កាត់ករណីវីរុសឆ្លងពីបរទេស និងការការពារពីការកើតឡើងវិញវីរុសនៅក្នុងប្រទេស។
ទន្ទឹមនឹងនោះ អត្រាគ្មានការងារធ្វើនៅតំបន់ទីក្រុងបានធ្លាក់ចុះបន្ថែមទៀតដល់ ៥,៤ ភាគរយក្នុងខែកញ្ញា ទោះបីជាកំណើនវិនិយោគងាកទៅរកសញ្ញាវិជ្ជមានជាលើកដំបូងក្នុងឆ្នាំ ២០២០ ក្ដី៕ RR
