.jpg)
ទូរស័ព្ទស្មាតហ្វូនដែលត្រូវបានដាក់តំាងបង្ហាញនៅក្នុងហាងលក់ទូរស័ព្ទមួយក្នុងទីក្រុងភ្នំពេញនាពេលកន្លងមក។ ហេង ជីវ័ន
ភ្នំពេញៈ ការប្រែក្លាយឆ្ពោះទៅរកសេដ្ឋកិច្ចផ្នែកឌីជីថលស្របពេលការរីកចម្រើននៃបដិវឌ្ឍឧស្សាហកម្មទី៤ (ឧស្សាហកម្ម ៤.០) អាចនឹងក្លាយជាក្បាលម៉ាស៊ីនថ្មីមួយសម្រាប់ជំរុញកំណើនសេដ្ឋកិច្ចកម្ពុជា ដើម្បីសម្រេចបានផែនការប្រែក្លាយកម្ពុជាជាប្រទេសចំណូលខ្ពស់នាពេលខាងមុខ។ នេះបើតាមការលើកឡើងរបស់អ្នកជំនាញផ្នែកសេដ្ឋកិច្ច។
ថ្លែងក្នុងសនិ្នសីទចក្ខុវិស័យកម្ពុជាឆ្នាំ ២០១៩ ដែលជាព្រឹត្តិការណ៍ប្រចាំឆ្នាំរៀបចំដោយ វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ក្រោមប្រធានបទ «ប្រែក្លាយផ្នែកឌីជីថលឆ្ពោះទៅកាន់ឧស្សាកម្ម ៤.០» លោក ម៊ីកល្យាណ ប្រធានក្រុមប្រឹក្សាភិបាល CDRI បានលើកឡើងថា ការពិភាក្សាស្តីអំពីបច្ចេកវិទ្យា ឌីជីថលនៅកម្ពុជាបានកើនឡើងគួរឲ្យកត់សម្គាល់។ គ្រាន់តែដើមឆ្នាំ ២០១៩ នេះ មានសន្និសីទចំនួន ៣ រួចទៅហើយដែលរៀបចំឡើងដើម្បីពិភាក្សាអំពីបច្ចេកវិទ្យាឌីជីថល។
លោកថ្លែងថា៖ «ជាមួយនឹងការរីកចម្រើនឧស្សាហកម្ម ៤.០ ការប្រែក្លាយផ្នែកឌីជីថលអាចជាក្បាលម៉ាស៊ីនជំរុញកំណើនថ្មីមួយ ដែលកម្ពុជាត្រូវការ ដើម្បីសម្រេចចក្ខុវិស័យរយៈពេលវែងក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងចំណូលខ្ពស់នៅឆ្នាំ ២០៥០ និងដើម្បីធ្វើសមាហរណកម្មកាន់តែជ្រាលជ្រៅចូលទៅក្នុងតំបន់ និងពិភពលោក»។
សន្និសីទចក្ខុវិស័យប្រទេស កម្ពុជា ឆ្នាំ ២០១៩ មានគោលដៅជាទូទៅដើម្បីប្រមូលមតិយោបល់របស់អ្នកដឹកនាំពីស្ថាប័នរដ្ឋាភិបាល វិស័យឯកជន សហគមន៍ស្រាវជ្រាវ និងភាគីពាក់ព័ន្ធ ស្តីពីការប្រែក្លាយឆ្ពោះទៅឧស្សាហកម្ម៤.០ ដើម្បីជួយដល់កម្ពុជាក្នុងការសម្រេចបានកំណើន និងការអភិវឌ្ឍក្នុងរយៈពេលវែង។
ការផ្តោតលើកម្រិតជឿនលឿនផ្នែកបច្ចេកវិទ្យា នវានុវត្តន៍ និងគុណភាពអប់រំ បានកើនឡើងក្នុងដំណាក់កាលជាបន្តបន្ទាប់នៃយុទ្ធសាស្រ្តចតុកោណរបស់រដ្ឋាភិបាល។ សកម្មភាពសំខាន់ៗមកទល់សព្វថ្ងៃរួមមានការកសាងផែនការមេនៃបច្ចេកវិទ្យាគមនាគមន៍ និងព័ត៌មាន (ICT) កម្ពុជាឆ្នាំ ២០២០ ការតាក់តែងផែនការមេនៃរដ្ឋាភិបាលអេឡិចត្រូនិកកម្ពុជា ការបង្កើតមជ្ឈមណ្ឌលគ្រប់គ្រងទិន្នន័យ និងការលើកកម្ពស់ក្របខ័ណ្ឌច្បាស់សម្រាប់ប្រព័ន្ធអេកូឌីជីថល។
លោកនាយករដ្ឋមន្រ្តី ហ៊ុន សែន បានចូលរួម ក្នុងពិធីបើកសន្និសីទនេះកាលពីម្សិលមិញ។ លោកបានលើកឡើងថា បច្ចេកវិទ្យាឌីជីថលអាចជួយជំរុញកំណើន និងប្រសិទ្ធភាព។ បច្ចេកវិទ្យាឌីជីថលរួមមានទូរស័ព្ទស្មាតហ្វូន បច្ចេកវិទ្យាពពក (Cloud Computing) បច្ចេកវិទ្យាប្រើរ៉ូបូត បច្ចេកវិទ្យា Block Chain ជាដើម បានកំពុងផ្តល់លទ្ធភាពខ្ពស់ក្នុងការបង្កើនការតភ្ជាប់រវាងមនុស្ស និងមនុស្ស បង្កើតឡើងនូវធុរកិច្ចថ្មីៗ ជាមួយនឹងគំនិតថ្មីៗ សម្រួលដល់ការធ្វើពាណិជ្ជកម្ម កាត់បន្ថយរបាំងចូលទីផ្សារ បង្កើតឱកាសសម្រាប់សកម្មភាពច្នៃប្រឌិតថ្មីៗ និងបង្កើតសកម្មភាពសហគ្រិន។
លោកថ្លែងថា៖ «រចនាសម្ព័ន្ធសេដ្ឋកិច្ចកម្ពុជាកំពុងផ្លាស់ប្តូរពីប្រទេសដែលពឹងផ្អែកលើវិស័យកសិកម្មទៅប្រទេសដែលពឹងផ្នែកសំខាន់លើវិស័យឧស្សាកម្ម និងសេវាកម្ម»។
លោកបានបន្តថា៖ «ដើម្បីទាញយកអត្ថប្រយោជន៍ពីសេដ្ឋកិច្ចឌីជីថលឱបានគ្រប់ជ្រុងជ្រោយកម្ពុជាត្រូវខិតខំប្រឹងប្រែងបន្ថែមទៀត ដើម្បីជំរុញឲ្យមានកំណើនសេដ្ឋកិច្ចខ្ពស់ និងរឹងមាំសម្រាប់រយៈពេលវែង»។
លោកនាយករដ្ឋមន្រ្តីបានបញ្ជាក់ថា នៅដើមឆ្នាំ ២០១៩ នេះ លោកបានណែនាំដល់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (ឧត្តមក្រុមប្រឹក្សាសេដ្ឋកិច្ចជាតិ) ឲ្យបង្កើតក្រុមការងាររៀបចំក្របខ័ណ្ឌគោលសេដ្ឋកិច្ចឌីជីថល ក្នុងគោលបំណងចាប់យកឱកាសពីវិទ្យាសាស្រ្ត និងបច្ចេកវិទ្យាសម្រាប់ការអភិវឌ្ឍសង្គម សេដ្ឋកិច្ចដោយផ្តោតលើកត្តាសំខាន់ៗដូចជា ហេដ្ឋារចនាសម្ព័ន្ធគាំទ្រវិស័យឌីជីថល ការបង្កើតថ្នាលឌីជីថល និងការអភិវឌ្ឍប្រព័ន្ធធុរកិច្ចឌីជីថល និងការលើកកម្ពស់ឌីជីថលូបនីយកម្មរដ្ឋាភិបាល សហគ្រិនភាព និងទិន្នន័យបើកចំហ៕
