ក្រុងតូក្យូៈ កំណើនសេដ្ឋកិច្ចជប៉ុនបានថមថយល្បឿនយ៉ាងខ្លាំងនៅត្រីមាសទី ៣ ឆ្នាំនេះ ដែលបណ្ដាលឲ្យមានការបារម្ភអំពីសុខភាពសេដ្ឋកិច្ចរបស់ប្រទេសមានសេដ្ឋកិច្ចធំជាងគេទី ៣ របស់ពិភពលោកមួយនេះ។ នេះបើយោងតាមទិន្នន័យរដ្ឋាភិបាលដែលចេញផ្សាយកាលពីថ្ងៃព្រហស្បតិ៍។
សេដ្ឋកិច្ចជប៉ុនបានកើនឡើង ០,១ ភាគរយ នៅក្នុងរយៈពេលពីខែកក្កដា និងខែកញ្ញាដែលធ្លាក់ចុះពីកំណើន ០,៤ ភាគរយដែលបានមើលឃើញកាលពីអំឡុងត្រីមាសទី ២ និងទាបជាងខ្លាំងធៀបនឹងការព្យាកររបស់ក្រុមសេដ្ឋវិទូ។
រដ្ឋាភិបាលឲ្យដឹងថា ការធ្លាក់ចុះការនាំចេញក្នុងគ្រាដែលបន្តភាពតានតឹងពាណិជ្ជកម្មពិភពលោកបានដាក់សម្ពាធលើកំណើនតម្រូវការក្នុងស្រុក។
ក្រុមអ្នកវិភាគបានរំពឹងថា កំណើនសេដ្ឋកិច្ចនៅត្រីមាសទី ៣ នឹងមានកម្រិតល្បឿនខ្លាំងជាងនេះ ដោយសារតែអតិថិជនបានប្រញាប់ប្រញាល់ទិញទំនិញមុនពេលមានការបង្កើនពន្ធលើទំនិញប្រើប្រាស់ពី ៨ ភាគរយដល់ ១០ ភាគរយនៅថ្ងៃទី ១ ខែតុលា។
យោងតាមទិន្នន័យផ្លូវការដែលចេញផ្សាយកាលពីសប្ដាហ៍មុន ការចំណាយគ្រួសាររបស់ជប៉ុនបានកើនឡើង ៩,៥ ភាគរយកាលពីខែកញ្ញាធៀបនឹងរយៈពេលដូចគ្នាកាលពីឆ្នាំមុន ខណៈអតិថិជនប្រញាប់ប្រញាល់ក្នុងការបញ្ចប់ការទិញគ្រឿងសង្ហារិម និងទំនិញមានតម្លៃខ្ពស់ផ្សេងទៀតមុនពេលមានការដំឡើងពន្ធលើទំនិញប្រើប្រាស់។
ប៉ុន្តែលោក Kentaro Arita សេដ្ឋវិទូជាន់ខ្ពស់ប្រចាំវិទ្យាស្ថានស្រាវជ្រាវ Mizuho បានប្រាប់ទីភា្នក់ងារព័ត៌មាន AFP ថា៖ «ការទិញទំនិញច្រើនឡើងៗមុនពេលពន្ធកើនឡើង មិនខ្លាំងនោះទេ ដែលបង្ហាញថាសេដ្ឋកិច្ចជប៉ុនមិនខ្លាំងគ្រប់គ្រាន់ដើម្បីរក្សាការស្ទុះងើបឡើងវិញប្រកបដោយស្ថិរភាពឡើយ»។
លោកបានព្យាករថា កំណើនសេដ្ឋកិច្ចជប៉ុននឹងដើរបញ្ច្រាស់ពីនេះវិញនៅត្រីមាសទី ៤ ដោយសារតែការប្រើប្រាស់យឺត បន្ទាប់ពីការបង្កើនពន្ធ។
លោក Arita ព្យាករថា ការនាំចេញខ្សោយមួយផ្នែកបានឆ្លុះបញ្ចាំងឲ្យឃើញពីក្តីបារម្ភជុំវិញសង្គ្រាមពាណិជ្ជកម្មរវាងអាមេរិក និងប្រទេសចិន ប៉ុន្តែប្រសិនបើការដំឡើងពន្ធនាំចូលជុំទី ៤ (ដោយអាមេរិក) ត្រូវបានពន្យារពេលដូចដែលបានរំពឹងទុកនោះ ការនាំចេញនឹងទំនងជាកើនឡើង។
ការធ្លាក់ចុះក្នុងវិស័យបច្ចេកវិទ្យាព័ត៌មានវិទ្យាកំពុងស្ថិតក្នុងដំណើរការនៃការធ្លាក់ចុះដល់កម្រិតទាបខ្លាំងមុនស្ទុះងើបឡើងវិញ ដែលអាចផ្ដល់ភាពខ្លាំងដល់សេដ្ឋកិច្ចនៅត្រីមាសទី ៤។
រដ្ឋាភិបាលរបស់លោក ស៊ីនហ្សូ អាបេ បានពន្យាពេលពីរដងរួចមកហើយក្នុងការដំឡើងពន្ធលើទំនិញប្រើប្រាស់នេះដោយសារក្តីបារម្ភថា វាអាចប៉ះពាល់ដល់កំណើនសេដ្ឋកិច្ចដែលផុយស្រួយរបស់ប្រទេសនេះ។
ប៉ុន្តែបើទោះជាមានការរំពឹងថានឹងមានការពន្យារពេលដំឡើងពន្ធលើទំនិញប្រើប្រាស់នេះក្តី ក៏ការដំឡើងនេះនៅតែធ្វើឡើងទៅតាមផែនការនៅថ្ងៃទី ១ ខែតុលា។
មានការភ័យខ្លាចដែលថា វិធានការដំឡើងពន្ធនេះអាចបង្កឲ្យសេដ្ឋកិច្ចដើរថយក្រោយនោះ បានថយចុះក្នុងរយៈពេលប៉ុន្មានខែថ្មីៗនេះ ហើយរដ្ឋាភិបាលជប៉ុនទទូចថា ការដំឡើងពន្ធនេះមានភាពចាំបាច់ដើម្បីផ្តល់មូលនិធិដល់អាទិភាពគោលនយោបាយសំខាន់ៗ។
ប៉ុន្តែបើក្រឡេកមើលប្រវត្តិសាស្ត្រវិញ ការដំឡើងពន្ធបានប៉ះពាល់ខ្លាំងដល់សេដ្ឋកិច្ចរបស់ជប៉ុន។
ការដំឡើងពន្ធលើទំនិញប្រើប្រាស់ថ្មីបំផុតពី ៣ ភាគរយដល់ ៥ ភាគរយក្នុងឆ្នាំ ១៩៩៧ និងក្រោយដល់ ៨ ភាគរយនៅឆ្នាំ ២០១៤ បានបង្កឲ្យមានការដើរថយក្រោយនៃសេដ្ឋកិច្ចបន្ទាប់ពីការដំឡើងពន្ធនេះម្តងៗ។
ទោះបីជាយ៉ាងណាលោក Naoya Oshikubo សេដ្ឋវិទូជាន់ខ្ពស់ប្រចាំក្រុមហ៊ុន Sumitomo Mitsui Trust Asset Management បានព្យាករថា សេដ្ឋកិច្ចរបស់ជប៉ុននឹងចាកចេញពីព្យុះភ្លៀងនេះនៅឆ្នាំក្រោយ ខណៈពេលដែលប្រទេសនេះទំនងជាទទួលបានការជំរុញពីកីឡាអូឡាំពិកនៅទីក្រុងតូក្យូ៕ LA