ក្រុងម៉ានីលៈ ធនាគារអភិវឌ្ឍន៍អាស៊ី (ADB) ព្យាករថា កំណើនសេដ្ឋកិច្ចប្រទេសថៃអាចនឹងកើនឡើងដល់ ៤ ភាគរយក្នុងឆ្នាំនេះ និង ៤,១ ភាគរយនៅឆ្នាំក្រោយដែលត្រូវបានជំរុញដោយកំណើនវិនិយោគសាធារណៈ និងឯកជន និងតម្រូវការប្រើប្រាស់ក្នុងស្រុក។
ក្នុងរបាយការណ៍មួយស្តីពីនិន្នាការសេដ្ឋកិច្ច និងចក្ខុវិស័យដែលមានឈ្មោះថា «ការអភិវឌ្ឍអាស៊ី៖ តំបន់អាស៊ីអាគ្នេយ៍» ធនាគារ ADB បានឲ្យដឹងថា ការវិនិយោគសាធារណៈអាចនឹងស្ទុះងើបឡើងវិញ បន្ទាប់ពីលទ្ធផលការងារមិនសូវល្អកាលពីឆ្នាំមុនដោយសារគម្រោងហេដ្ឋារចនាសម្ព័ន្ធតម្លៃ ៩០០ ពាន់លានបាត (ប្រហែល ២៨,៨៦ ពាន់លានដុល្លារ) ស្ថិតក្រោមផែនការសកម្មភាពហេដ្ឋារចនាសម្ព័ន្ធដឹកជញ្ជូនឆ្នាំ ២០១៧ សម្រាប់ការអភិវឌ្ឍផ្លូវដែកទៅវិញទៅមកការពង្រីកបណ្តាញដឹកជញ្ជូនយ៉ាងឆាប់រហ័ស និងការពង្រីកផ្លូវហាយវ៉េ។
ភាគច្រើននៃគម្រោងអភិវឌ្ឍន៍ដែលចំណាយប្រាក់ច្រើនត្រូវបានរំពឹងថានឹងត្រូវអនុវត្តក្នុងឆ្នាំ ២០១៨ និង ២០១៩។ ការវិនិយោគសាធារណៈដែលបានកើនឡើង ២៨,៤ ភាគរយនៅឆ្នាំ ២០១៥ និង ៩,៥ ភាគរយនៅឆ្នាំ ២០១៦ បានធ្លាក់ចុះ ១,២ ភាគរយកាលពីឆ្នាំមុន ដោយសារច្បាប់លទ្ធកម្មថៃរបស់រដ្ឋាភិបាលបានបង្កឲ្យមានការពន្យារពេលដំណើរការលទ្ធកម្ម និងការអនុវត្តគម្រោងអភិវឌ្ឍន៍។
សេចក្តីរាយការណ៍ដដែលនេះបានបន្តឲ្យដឹងថា គម្រោងធំៗចំនួន ៥ នៅច្រករបៀងសេដ្ឋកិច្ចភាគខាងកើត (EEC) ដែលត្រូវបានជ្រើសរើសសម្រាប់ការសាងសង់ផ្លូវដែកល្បឿនលឿននឹងអាចត្រូវអនុម័តនៅចុងឆ្នាំនេះដោយមានការអនុវត្តភ្លាមៗតាមរយៈភាពជាដៃគូសាធារណៈ និងឯកជន (PPP)៕ BP