.jpg)
ក្រុងបាងកកៈ កំណើនសេដ្ឋកិច្ចរបស់ប្រទេស ថៃ ត្រូវបានរំពឹងថា នឹងកើនឡើង ៤ ភាគរយនៅឆ្នាំនេះ បន្ទាប់ពីការស្ទុះងើបឡើងវិញជាបន្ត ក្នុងការ- ប្រើប្រាស់ និងការវិនិយោគ ប៉ុន្តែសមត្ថភាពប្រកួតប្រជែង និងការទទួលយកការផ្លាស់ប្តូរឌីជីថលរបស់ប្រទេសនេះ នៅតែជាបញ្ហាប្រឈមទៅថ្ងៃមុខ។ នេះបើយោងតាមឧបនាយករដ្ឋមន្ដ្រី លោក Somkid Jatusripitak ។
លោកថ្លែងក្នុងអំឡុងសុន្ទរកថាបើកកម្មវិធីក្នុងពិព័រណ៍ (Money Expo) លើកទី ១៨ ឆ្នាំ២០១៨ ថា៖ «ខ្ញុំមានទំនុកចិត្តថា កំណើនផលិតផលក្នុងស្រុកសរុប (GDP) នឹងកើនឡើងដល់ ៤ ភាគរយនៅឆ្នាំនេះ ដែលនឹងជាលើកដំបូងក្នុងរយៈពេល ១ ទសវត្សរ៍ ដែលសេដ្ឋកិច្ចរបស់ប្រទេសកើនឡើងដល់ ៣ ដងនេះ»។
លោកថ្លែងថា៖ «យើងកំពុងស្ថិតក្នុងអំឡុងពេលអន្តរកាល ហើយរដ្ឋាភិបាលនឹងធ្វើអ្វីៗគ្រប់យ៉ាងសម្រាប់អន្តរកាលនេះដោយរលូន។ សេដ្ឋកិច្ចកំពុងកើនឡើងបណ្ដើរៗ ទោះបីជាកំណើន GDP មិនអាចកើនឡើងដល់កម្រិតខ្ពស់ក៏ដោយ ប៉ុន្តែចក្ខុវិស័យកំណើនសេដ្ឋកិច្ច ៤ ភាគរយ នឹងជួយលើកកម្ពស់ និងជំរុញប្រទេសថៃឆ្ពោះទៅមុខ»។
លោកបន្តថា៖ «ការស្ទុះងើបឡើងវិញ បានបង្ហាញតាមរយៈកំណើនក្នុងសូចនាករសេដ្ឋកិច្ចមួយចំនួន ដូចជាការប្រើប្រាស់ និងការវិនិយោគឯកជន ខណៈសន្ទស្សន៍ផ្សារហ៊ុនថៃ នៅតែមានចក្ខុវិស័យកំណើនដ៏ល្អ ទោះបីជាការកែតម្រូវនៅពេលថ្មីៗក៏ដោយ។
លោកបញ្ជាក់ថា ការធ្លាក់ថ្លៃរូបិយប័ណ្ណក្នុងស្រុក នឹងល្អសម្រាប់ការនាំចេញ និងផលិតផលកសិកម្ម។
លោកបន្ថែមថា លោកនៅមានសុទិដ្ឋិនិយមពីកំណើនការនាំចេញ ៨ ភាគរយឆ្នាំនេះ។
ថៃ បានបង្ហាញកំណើនដ៏រឹងមាំរបស់ខ្លួនក្នុងរយៈពេល ៥ ឆ្នាំក្នុងចំនួន ៣,៩ភាគរយធៀបនឹងរយៈពេលដូចគ្នា កាលពីឆ្នាំ ២០១៧ ដែលបានជំរុញដោយការនាំចេញ និងទេសចរណ៍ដ៏រឹងមាំ។ កំណើន GDP បានកត់ត្រាក្នុងចំនួន ៣,៣ ភាគរយធៀបនឹងរយៈពេលដូចគ្នា កាលពីឆ្នាំ ២០១៦ ។
លោកស្រី Jingyan Chen សេដ្ឋវិទូនៅក្រុមហ៊ុនបានថ្លែងថា ប៉ុន្តែការរួមបញ្ចូលគ្នា នៃកំណើនប្រាក់ចំណូលខ្សោយ និងគ្រួសារមានប្រាក់ចំណូលទាប បានបង្កើនការពឹងផ្អែកលើបំណុល ធ្វើឲ្យការកាត់បន្ថយបំណុលគ្រួសារពិបាកក្នុងរយៈពេលខ្លី។
លោកស្រី Jingyan Chen ថ្លែងថា៖ «បន្ទុកបំណុលកាន់តែខ្ពស់ នឹងទំនងជាបន្តធ្វើឲ្យប្រើប្រាស់ឯកជនចុះខ្សោយ។ ខណៈការបង្កើនប្រាក់ឈ្នួលអប្បបរមាទូទាំងប្រទេស កាលពីខែមេសា ពី ២ ទៅ ៧ ភាគរយ គឺជាព័ត៌មានគួរឲ្យស្វាគមន៍ ដែលយើងសង្ស័យថា ចំណែកដ៏ច្រើននេះ នឹងសងបំណុលបាន ដូច្នេះវាបានកម្រិតផលប៉ះពាល់លើការចំណាយ និងសេដ្ឋកិច្ចពិត»។
លោក Somkid Jatusripitak ថ្លែងថា ទោះបីជាកំណើន GDP របស់ប្រទេស ថៃ នឹងកើនឡើងដល់ ៤ ភាគរយនៅឆ្នាំនេះ ក៏ដោយ ក៏មានបញ្ហាប្រឈមមួយចំនួនសម្រាប់ប្រទេសនេះផងដែរ ដូចជា ការទទួលយកជាអន្តរជាតិ សមត្ថភាពប្រកួតប្រជែង និងការប្រែប្រួលទៅតាមសម័យឌីជីថល ទាក់ទងនឹងធនាគាការធានារ៉ាប់រង និងទីផ្សារមូលធន៕LA
