.jpg)
ក្រុងសិង្ហបុរីៈ សេដ្ឋកិច្ចរបស់សិង្ហបុរីទំនងជាកំពុងថមថយសម្ទុះនៅឆ្នាំនេះ ដោយនៅត្រីមាសទី ២ សេដ្ឋកិច្ចបានកើនឡើងទាបជាងត្រីមាសមុន ហើយមានការរំពឹងទុកនឹងមានឧបសគ្គធំៗបន្ថែមទៀតនៅឆមាសទី ២ ឆ្នាំនេះ ខណៈដែលវិស័យផលិតកម្មនៅតែស្ថិតក្នុងស្ថានភាពខ្លាំង។
សេដ្ឋកិច្ចរបស់ប្រទេសស្ថិតក្នុងតំបន់អាស៊ីអាគេ្នយ៍មួយនេះបានកើនឡើង ៣,៦ ភាគរយធៀបនឹងរយៈពេលដូចគ្នាកាលពីឆ្នាំមុនដែលទាបជាងកំណើន ៤,៥ ភាគរយដែលទទួលបាននៅត្រីមាសទី ១។ នេះបើយោងតាមតួលេខចុងក្រោយរបស់ក្រសួងពាណិជ្ជកម្ម និងឧស្សាហកម្ម (MTI) ដែលចេញផ្សាយពីថ្ងៃពុធ។
តួលេខនេះមិនត្រូវគ្នានឹងការរំពឹងទុករបស់ទីផ្សារនោះឡើយដោយក្រុមសេដ្ឋវិទូបានព្យាករថានឹងទទួលបានកំណើន ៤,១ ភាគរយ។
ដោយទប់ទល់នឹងស្ថានភាពទូទៅនៃភាពតានតឹងផ្នែកពាណិជ្ជកម្មក្រសួងពាណិជ្ជកម្មបានរក្សាការព្យាករកំណើនផលិតផលក្នុងស្រុកសរុប (ផ.ស.ស) របស់ខ្លួនពី ២,៥ ភាគរយដល់ ៣,៥ ភាគរយនៅឆ្នាំនេះ។ ការព្យាករនេះធ្វើឡើងបន្ទាប់ពីទទួលបានកំណើន ៣,៦ ភាគរយកាលពីឆ្នាំមុន។
ប៉ុន្តែកំណើនសេដ្ឋកិច្ចត្រូវបានរំពឹងថានឹងធ្លាក់ចុះនៅឆមាសទី ២ ឆ្នាំនេះដោយក្រសួងពាណិជ្ជកម្មបានកត់សម្គាល់ថា ហានិភ័យនៃការធ្លាក់ចុះ និងភាពមិនច្បាស់លាស់បានកើនឡើងនៅក្នុងសេដ្ឋកិច្ចពិភពលោក។
លោក Loh Khum Yean លេខាធិការអចិន្រៃ្តយ៍នៃក្រសួងពាណិជ្ជកម្មបានថ្លែងថា៖ «មានហានិភ័យនៃការកើនឡើងជម្លោះពាណិជ្ជកម្មបន្ថែមទៀត ដែលអាចឈានទៅរកវដ្ដដ៏អាក្រក់នៃវិធានការសងសឹកទៅវិញទៅមករវាងអាមេរិក និងប្រទេសដែលមានសេដ្ឋកិច្ចធំៗផ្សេងទៀត»៕ ANN/LA
