The Phnom Penh Post Search

Search form

Logo of Phnom Penh Post newspaper Phnom Penh Post - សេដ្ឋកិច្ច​កម្ពុជា​នៅ​តែ​រឹងមាំ ទោះ​មាន​វិបត្តិ​សកល




សេដ្ឋកិច្ច​កម្ពុជា​នៅ​តែ​រឹងមាំ ទោះ​មាន​វិបត្តិ​សកល

សេដ្ឋកិច្ច​កម្ពុជា​នៅ​តែ​រឹងមាំ ទោះ​មាន​វិបត្តិ​សកល

121228_12
កសិករ កំពុងច្រូតស្រូវនៅខណ្ឌពោធិ៍សែនជ័យ រាជធានីភ្នំពេញ ម៉ៃ វីរៈ

ភ្នំពេញៈ ដំណើរ​ការ​ប្រព្រឹត្ត​ទៅ​នៃ​សេដ្ឋកិច្ច​របស់​ប្រទេស​កម្ពុជា​ក្នុង​ឆ្នាំ​២០១២ បាន​បង្ហាញ​ឲ្យ​ឃើញ​ថា មាន​ស្ថានភាព​ល្អ បើ​ទោះ​ជា​សេដ្ឋកិច្ច​សកល​បាន​ធ្លាក់​ចុះ​ជា​ពិសេស​ភាព​វឹក​វរ​តាម​បណ្តា​ប្រទេស​ទាំង​ឡាយ​នៅ​អឺរ៉ុប​ដែល​ជួប​ប្រទះ​វិបត្តិ​បំណុល​រដ្ឋាភិបាល​និង​សន្ទុះ​ងើប​ឡើង​យឺតៗ​នៃ​សេដ្ឋកិច្ច​អាមេរិក​ក៏​ដោយ​។

យោង​តាម​ការ​ព្យាករ​របស់​មូលនិធិ​រូបិយវត្ថុ​អន្តរជាតិ (IMF) កាល​ពីខែ​តុលា​ថា បាន​បង្ហាញ​សេដ្ឋកិច្ច​ពិភពលោក​ត្រូវ​បាន​វាយ​តម្លៃ​ឡើង​វិញ​ថា​នឹង​ស្ទុះ​ងើប​៣,៣​ភាគ​រយ នៅ​ឆ្នាំ​២០១២ ពី​៣,៦​ភាគ​រយ​នៅ​ឆ្នាំ​២០១៣​ដែល​មាន​កម្រិត​ទាប​ជាង​ការ​ព្យាករ​កាល​ពី​ខែ​កក្កដា។​ការ​ព្យាករ​ពី​កំណើន​សេដ្ឋកិច្ច​អាមេរិក​ត្រូវ​បាន​ទម្លាក់​មក​ត្រឹម​៣,៣​ភាគ​រយ​នៅ​ឆ្នាំ​២០១២ និង​៣,៦​ភាគ​រយ​នៅ​ឆ្នាំ​២០១៣។ កំណើន​សេដ្ឋកិច្ច​នៅ​អឺរ៉ុប​ត្រូវ​បាន​ព្យាករ​ថា​នឹង​កើន​ឡើង​០,១​ភាគ​រយ នៅ​ឆ្នាំ​២០១២​និង ០,៨​ភាគរយ​នៅ​ឆ្នាំ​២០១៣​។ ការ​ព្យាករ​ពី​កំណើន​សេដ្ឋកិច្ច​របស់​ប្រទេស​ចិន​ក៏​បាន​ធ្លាក់​ចុះ​ផង​ដែរ គឺ​នៅ​ត្រឹម​៧,៨​ភាគ​រយ​ក្នុង​ឆ្នាំ​២០១២ និង​៨,២​ភាគ​រយ​សម្រាប់​ឆ្នាំ​២០១៣។

កាល​ពី​ខែ​កញ្ញា​មូលនិធិ IMF បាន​ដំឡើង​ការ​ព្យាករ​ចំពោះ​កំណើន​សេដ្ឋកិច្ច​របស់​កម្ពុជា​ដល់​៦,៥​ភាគ​រយ​នៅ​ក្នុង​ឆ្នាំ​២០១២​ពី​៦,៣​ភាគ​រយ​នៃ​ការ​ព្យាករ​នា​ពេល​កន្លង​មក។ បន្ទាប់​ពី​ធ្លាក់​ចុះ​រហូត​ដល់​ពាក់​កណ្តាល​ឆ្នាំ​នេះ​មក​អតិផរណា​ត្រូវ​បាន​ព្យាករ​ថា​នឹង​កើន​ឡើង​ជា​មធ្យម​៣,៥​ភាគ​រយ​ក្នុង​ឆ្នាំ​២០១២ និង ៤​ភាគ​រយ​ក្នុង​ឆ្នាំ​២០១៣​។ រី​ឯ​ធនាគារ​អភិវឌ្ឍ​អាស៊ី (ADB) បាន​ទម្លាក់​ការ​ព្យាករ​របស់​ខ្លួន​ចំពោះ​កំណើន​សេដ្ឋកិច្ច​កម្ពុជា​មក​នៅ​ត្រឹម​៦,៤​ភាគ​រយ​។

យោង​តាម​របាយ​ការណ៍​ដែល​បាន​ចេញ​ផ្សាយ​ដោយ​ក្រសួង​សេដ្ឋកិច្ច និង​ហិរញ្ញវត្ថុ​នា​ពេល​ថ្មីៗ​នេះ​រដ្ឋាភិបាល​ក៏​បាន​ដំឡើង​ការ​ព្យាករ​របស់​ខ្លួន​ដល់​៧​ភាគ​រយ​ផង​ដែរ ពី​អត្រា​៦,៥​ភាគ​រយ ដែល​បាន​ព្យាករ​កាល​ពី​ខែ​កញ្ញា​ក្នុង​ឆ្នាំ​នេះ​ហើយ​អតិផរណា​ស្ថិត​នៅ​ក្រោម​៥​ភាគ​រយ​។

របាយ​ការណ៍​ដដែល បាន​ឲ្យ​ដឹង​ថា៖​«សេដ្ឋកិច្ច​របស់​កម្ពុជា​កំពុង​តែ​បង្ហាញ​ពី​ភាព​រឹង​មាំ​ឆ្ពោះ​ទៅ​រក​ការ​ព្យាករ​កំណើន​របស់​ខ្លួន​៧​ភាគ​រយ​ប្រចាំ​ឆ្នាំ​បើ​ទោះ​ជា​ចក្ខុ​វិស័យ​សេដ្ឋកិច្ច​ពិភពលោក​នៅ​ចុង​ឆ្នាំ​២០១២ និង​នៅ​ឆ្នាំ​២០១៣​នៅ​តែ​បន្ត​ជួប​ហានិភ័យ​ខ្ពស់​ដោយ​សារ​វិបត្តិ​បំណុល​អឺរ៉ុប និង​ការ​ងើប​យឺតៗ​របស់​សេដ្ឋកិច្ច​អាមេរិក​ក៏​ដោយ​»។

របាយ​ការណ៍​នេះ​ក៏​បាន​បង្ហាញ​ពី​ភាព​ល្អ​ប្រសើរ​នៃ​សសរ​ស្តម្ភ​ទាំង​បួន​ដែល​ជួយ​ជំរុញ​សេដ្ឋកិច្ច​កម្ពុជា​ផង​ដែរ ដូច​ជា​ឧស្សាហកម្ម​កសិកម្ម​វិស័យ​កាត់​ដេរ និង​វាយ​នភ័ណ្ឌ វិស័យ​សំណង់ និង​អលនទ្រព្យ និង​វិស័យ​ទេសចរណ៍​។

ទិន្នន័យ​ពី​ក្រសួង​ពាណិជ្ជកម្ម​បាន​បង្ហាញ​ថា ការ​នាំ​ចេញ​សរុប​បាន​កើន​ឡើង​ជិត​១១​ភាគ​រយ​សម្រាប់​រយៈ​ពេល​១០​ខែ​ដំបូង​ក្នុង​ឆ្នាំ​នេះ​រហូត​ដល់​៤,៤៩៩​ពាន់​លាន​ដុល្លារ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ ដោយ​ក្នុង​នោះ​ឧស្សាហកម្ម​កាត់​ដេរ និង​វាយនភ័ណ្ឌ​មាន​ប្រហែល​៨០​ភាគ​រយ​នៃ​ការ​នាំ​ចេញ​សរុប ដោយ​បាន​កើន​ឡើង​ប្រហែល​៩​ភាគ​រយ​រហូត​ដល់​៣,៨២៦​ពាន់​លាន​ដុល្លារ​។ តម្លៃ​ផលិត​ផល​កសិកម្ម​មាន​ប្រហែល​១០​ភាគ​រយ​ដោយ​បាន​ធ្លាក់​ចុះ​ប្រហែល ១០​ភាគរយ នៅ​ត្រឹម​ចំនួន​៣១២​លាន​ដុល្លារ​។

យោង​តាម​ស្ថិតិ​របស់​ក្រសួង​ទេសចរណ៍ បាន​ឲ្យ​ដឹង​ថា ការ​មក​ដល់​របស់​ភ្ញៀវ​ទេសចរ​បរទេស បាន​កើន​ឡើង​ជិត ២៤​ភាគរយ​ក្នុង​រយៈ​ពេល​១០​ខែ​នេះ រហូត​ដល់ ២ ៨៥៨ ៥០០​នាក់ ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ ទិន្នន័យ​ពី​ក្រសួង​ដែន​ដី​នគ​រូបនីយ​កម្ម និង​សំណង់ បាន​បង្ហាញ​ថា តម្លៃ​គម្រោង​សាង​សង់​ដែល​បាន​អនុម័ត​បាន​កើន​ឡើង ៧៣,៣​ភាគរយ​ក្នុង​រយៈ​ពេល​ដូច​គ្នា​នេះ ដែល​មាន​ចំនួន ១,៩២៣​ពាន់​លាន​ដុល្លារ ស្មើ​នឹង​១ ៤៩៤​គម្រោង។

លោក គង់ ពុទ្ធារ៉ា អ្នក​នាំ​ពាក្យ​ក្រសួង​ពាណិជ្ជកម្ម​បាន​អះ​អាង​ថា​ការ​នាំ​ចេញ​របស់​កម្ពុជា​មិន​មាន​ទទួល​រង​ផល​ប៉ះ​ពាល់​ពី​វិបត្តិ​សេដ្ឋកិច្ច​ពិភពលោក​ទេ។ លោក​ថ្លែង​ថា៖​«ខ្ញុំ​មើល​មិន​ឃើញ​ការ​ធ្លាក់​ចុះ​ណា​មួយ​នៃ​ការ​នាំ​ចេញ​នោះ​ទេ​រហូត​មក​ដល់​ពេល​នេះ។ យើង​នៅ​តែ​នាំ​ចេញ​ទៅ​កាន់​ទី​ផ្សារ​ធំ​ទំាង​ពីរ​បាន​យ៉ាង​ល្អ​គឺ​សហរដ្ឋ​អាមេរិក និង​អឺរ៉ុប​។ នៅ​ជាមួយ​គ្នា​នេះ​ដែរ យើង​ក៏​កំពុង​តែ​សម្លឹង​ស្វែង​រក​ទី​ផ្សារ​នៅ​តាម​បណ្តា​ប្រទេស​អាស៊ី​មួយ​ចំនួន​ដែរ ពី​ព្រោះ​យើង​ចង់​ធ្វើ​ពិពិធកម្ម​ទី​ផ្សារ​របស់​យើង​»។

លោក Faisal Ahmed ប្រធាន​IMF ប្រចាំ​ប្រទេស​កម្ពុជា​ក៏​បាន​ទទួល​ស្គាល់​ផង​ដែរ​ចំពោះ​ផល​ប៉ះ​ពាល់​នៃ​វិបត្តិ​សេដ្ឋកិច្ច​ពិភពលោក​មក​លើ​សេដ្ឋកិច្ច​កម្ពុជា​។ លោក​បាន​ថ្លែង​ថា៖ «​បើ​ទោះ​ជា​សេដ្ឋកិច្ច​សកល​បាន​ធ្លាក់​ចុះ​យ៉ាង​ណា​ក៏​ដោយ ក៏​សេដ្ឋកិច្ច​របស់​កម្ពុជា​នៅ​តែ​មាន​ដំណើរ​ការ​ល្អ ដោយ​សារ​ការ​នាំ​ចេញ​ខ្លាំង​ វិស័យ​ទេសចរណ៍​រឹង​មាំ​និង​វិស័យ​សំណង​ល្អ​ប្រសើរ​និង​ការ​កើន​ឡើង​សញ្ញា​ពិពិធកម្ម​សេដ្ឋកិច្ច​»។

លោក​បាន​មាន​ប្រសាសន៍​ថា៖​«យើង​ស្វាគមន៍​ចំពោះ​ការ​ដំឡើង​ទុន​បម្រុង​កាតព្វកិច្ច ដែល​ជា​ជំហាន​ដំបូង​ដ៏​មាន​សារៈ​សំខាន់​ដើម្បី​ឈាន​ឆ្ពោះ​ទៅ​រក​ស្ថិរភាព​ហិរញ្ញវត្ថុ​និង​ភាព​ល្អ​ប្រសើរ​ទូទៅ​របស់​ធនាគារ​ជាតិ​នៃ​កម្ពុជា​ក្នុង​ការ​គ្រប់​គ្រង​វិស័យ​ធនាគារ​។ ដូច​ក្នុង​ប្រព័ន្ធ​ហិរញ្ញវត្ថុ​ដែល​កំពុង​លូត​លាស់​ដ៏​ឆាប់​រហ័ស​នៅ​តាម​បណ្តា​ប្រទេស​កំពុង​អភិវឌ្ឍ​ផ្សេងៗ​ទៀត​ដែរ ការ​គ្រប់​គ្រង​ហិរញ្ញវត្ថុ​កាន់​តែ​ស៊ី​ជម្រៅ រួម​ទាំង​តាម​រយៈ​ការ​ទប់​ស្កាត់​កំណើន​ឥណទាន និង​ការ​បន្ត​ពង្រឹង​ការ​គ្រប់​គ្រង​លើ​វិស័យ​ហិរញ្ញវត្ថុ​នឹង​កាន់​តែ​មាន​សារៈ​សំខាន់​»។

លោក Hiroshi Suzuki សេដ្ឋវិទូ​នៅ​វិទ្យាស្ថាន​ស្រាវ​ជ្រាវ​អាជីវកម្ម​នៅ​កម្ពុជា បាន​លើក​ឡើង​ថា ឆ្នាំ​នេះ​កម្ពុជា​នៅ​ជា​ទី​កន្លែង ដែល​ទាក់​ទាញ​វិនិយោគិន​បរទេស​។ លោក​ថ្លែង​ថា៖​«យើង​កំពុង​មើល​ឃើញ​និន្នាការ​ដ៏​ល្អ​នៃ​ការ​វិនិយោគ​ផ្ទាល់​ពី​បរទេស​មក​កម្ពុជា។ កត្តា​ជំរុញ​ដ៏​ពិត​ប្រាកដ​នោះ គឺ​ការ​វិនិយោគ​ផ្ទាល់​ពី​បរទេស ជា​ពិសេស​គឺ​ក្រុមហ៊ុន​ជប៉ុន​។ និន្នាការ​បែប​នេះ​នឹង​ផ្តល់​នូវ​ផល​វិជ្ជមាន​ចំពោះ​ការ​នាំ​ចេញ​របស់​កម្ពុជា និង​ការងារ​ខ្ញុំ​ជឿ​ថា លំហូ​ចូល​នេះ​នឹង​នៅ​តែ​បន្ត​មាន​ទៀត ពី​ព្រោះ​តម្លៃ​ពលកម្ម​នៅ​បណ្តា​ប្រទេស​ជិត​ខាង​កំពុង​តែ​កើន​ឡើង​»។ លោក​បន្ថែម​ថា វិស័យ​ថាមពល​នៅ​តែ​ជា​ចំណុច​ខ្សោយ​របស់​កម្ពុជា​។

នៅ​ឆ្នាំ​នេះ ក៏​ជា​ពេល​វេលា​មួយ​ដ៏​ល្អ​ដែល​ត្រូវ​បាន​គេ​មើល​ឃើញ​ថា សកម្មភាព​សេដ្ឋកិច្ច​កម្ពុជា​មាន​លក្ខណៈ​ល្អ​ប្រសើរ តាម​រយៈ​ការ​បើក​ទីផ្សារ​មូលធន​កាល​ពីពាក់​កណ្តាល​ខែ​មេសា​និង​ក្រុម​ហ៊ុន​ធានា​រ៉ាប់រង់​អាយុ​ជីវិត​កាល​ពី​ខែមីនា​។ ការ​ធ្វើ​ជា​ប្រធាន​កិច្ច​ប្រជុំ​កំពូល​អាស៊ាន​ក៏​ជា​ព្រឹត្តិការណ៍​មួយ​ដ៏​មាន​សារៈ​សំខាន់​ផង​ដែរ​សម្រាប់​កម្ពុជា​ក្នុង​ការ​បង្ហាញ​ខ្លួន​ទៅ​កាន់​ពិភពលោក​ពី​លក្ខណៈ​ល្អ​ប្រសើរ​របស់​ខ្លួន​។

លោក Faisal Ahmed បាន​ថ្លែង​បន្ត​ថា៖​«ភាព​ជា​ប្រធាន​អាស៊ាន​លើក​ទី​ពីរ​របស់​កម្ពុជា​ឆ្នាំ​នេះ​បាន​ផ្តល់​ឲ្យ​នូវ​កាលា​នុវត្តភាព​ទាន់​ពេល​វេលា​ក្នុង​ការ​បង្ហា​ញ​ពី​ភាព​វិវត្ត​សេដ្ឋកិច្ច​ដែល​សម្រេច​បាន​ក្នុង​រយៈ​ពេល​មួយ​ទសវត្សរ៍​ចុង​ក្រោយ​នេះ រួម​ទាំង​កំណើន​ដ៏​រឹង​មាំ​របស់​ខ្លួន​និង​ការ​កាត់​បន្ថយ​ភាព​ក្រី​ក្រ​ដ៏​គួរ​ឲ្យ​កោត​សរសើរ​»។

មូលនិធិ​រូបិយ​វត្ថុ​អន្តរជាតិ បាន​ព្យាករ​ថា សេដ្ឋកិច្ច​របស់​ប្រទេស​កម្ពុជា​សម្រាប់​ឆ្នាំ​២០១៣ នឹង​មាន​កំណើន​៦,៧​ភាគរយ ខណៈ​ពេល​អតិផរណា​ជា​មធ្យម​មាន​ប្រហែល​៤​ភាគរយ​៕ CC​​

អត្ថបទគួរចាប់អារម្មណ៍