.jpg)
ភាគច្រើននៃសេដ្ឋវិទូរំពឹងថា អាមេរិកនឹងជួបប្រទះការដើរថយក្រោយនៃសេដ្ឋកិច្ចក្នុងពេល ២ ឆ្នាំខាងមុខ។ AFP
ក្រុងវ៉ាស៊ីនតោនៈ ភាគច្រើននៃសេដ្ឋវិទូរំពឹងថា អាមេរិកនឹងជួបប្រទះការដើរថយក្រោយនៃសេដ្ឋកិច្ចក្នុងពេល ២ ឆ្នាំខាងមុខ។ នេះបើយោងតាមការអង្កេតមួយដែលបានចេញផ្សាយកាលពីថ្ងៃចន្ទ។
សមាគមជាតិសម្រាប់សេដ្ឋវិទូធុរកិច្ច (NABE) បានរកឃើញថា ឥឡូវមានអ្នកជំនាញតិចតួចណាស់ដែលគិតថា ការដើរថយក្រោយនៃសេដ្ឋកិច្ចបន្ទាប់នឹងចាប់ផ្តើមនៅឆ្នាំនេះធៀបនឹងការអង្កេតមួយដែលបានធ្វើឡើងកាលពីខែកុម្ភៈ។
សមាគម NABE បានអនុវត្តការស្ទង់មតិគោលនយោបាយរបស់ខ្លួន ខណៈលោកប្រធានាធិបតី ដូណាល់ ត្រាំ បានវាយប្រហារធនាគារកណ្តាលអាមេរិក ដោយទាមទារឲ្យធនាគារកណ្តាលដាក់ចេញគោលនយោបាយជំរុញសេដ្ឋកិច្ចថែមទៀតមុនពេលមានការទម្លាក់អត្រាការប្រាក់គោលកាលពីថ្ងៃទី ៣១ ខែកក្កដា។
លោក Constance Hunter ដែលជាប្រធានសេដ្ឋវិទូប្រចាំក្រុមហ៊ុន KPMG និងជាប្រធាន NABE ថ្លែងថា៖ «ការឆ្លើយតបការអង្កេតបង្ហាញថា កំណើនសេដ្ឋកិច្ចនឹងបន្តកើតមានឡើងតាមរយៈការផ្លាស់ប្តូរគោលនយោបាយរូបិយវត្ថុ»។
NABE បានឲ្យដឹងថាមានតែ ២ ភាគរយប៉ុណ្ណោះនៃអ្នកឆ្លើយសំណួរចំនួន ២២៦ បច្ចុប្បន្នបានមើលឃើញការដើរថយក្រោយនៃសេដ្ឋកិច្ចនៅឆ្នាំនេះ ធៀបនឹង ១០ ភាគរយក្នុងការអង្កេតនៅខែកុម្ភៈ។
លោក Hunter បានឲ្យដឹងក្នុងសេចក្តីសង្ខេបនៃការអង្កេតនេះថា ទោះជាយ៉ាងណា អ្នកឆ្លើយសំណួរយល់ឃើញផ្សេងគ្នាទាក់ទងនឹងថា តើការធ្លាក់ចុះសេដ្ឋកិច្ចនឹងកើតមាននៅឆ្នាំ ២០២០ ឬ ២០២១? ការអង្កេតនេះបង្ហាញថា ៣៨ ភាគរយរំពឹងថានឹងមានការធ្លាក់ចុះសេដ្ឋកិច្ចនៅឆ្នាំក្រោយ ខណៈ ៣៤ ភាគរយរំពឹងថានឹងមិនកើតមានឡើយរហូតដល់ឆ្នាំ ២០២១។
សេដ្ឋវិទូកាន់តែច្រើនបានប្តូរការទស្សន៍ទាយពីការដើរថយក្រោយនៃសេដ្ឋកិច្ចរបស់ខ្លួនទៅឆ្នាំ ២០២១ វិញ។
អង្កេតនេះបានបង្ហាញថា ៤៦ ភាគរយរំពឹងថាយ៉ាងហោចណាស់ ធនាគារកណ្តាលនឹងមានការទម្លាក់ការប្រាក់ម្តងទៀតនៅឆ្នាំនេះខណៈ ១ ភាគ ៣ មើលឃើញថាការប្រាក់នេះនឹងរក្សានៅកម្រិតដដែលក្នុងឆ្នាំនេះ៕ KC
