.jpg)
ពលរដ្ឋអាមេរិកចូលទិញគ្រឿងបរិភោគនៅផ្សារទំនើប។ AFP
ទីក្រុងញូវយ៉កៈ សេតវិមានកាលពីថ្ងៃអាទិត្យបានផ្លាស់ប្តូរកលល្បិចជាថ្មីលើការជំរុញសេដ្ឋកិច្ចអាមេរិករងការវាយប្រហារដោយការរីករាលដាលជំងឺកូវីដ១៩ ដោយពេលនេះជំរុញតំណាងរាស្ត្រឱ្យគាំទ្រផែនការដើម្បីជួយអាជីវកម្មខ្នាតតូចនៅប៉ុន្មានសប្តាហ៍មុនពេលការបោះឆ្នោតប្រធានាធិបតី។
ការផ្លាស់ប្តូរនេះកើតមានឡើងបន្ទាប់ពីទាំងគណបក្សសាធារណរដ្ឋរបស់លោកប្រធានាធិបតី ដូណាល់ ត្រាំ និងគណបក្សប្រជាធិបតេយ្យបានបដិសេធដោយហេតុផលផ្សេងៗគ្នា ចំពោះការបង្កើនផែនការសង្គ្រោះសេដ្ឋកិច្ចចំនួន ១,៨ ពាន់ពាន់លានដុល្លារដែលស្នើឡើងកាលពីថ្ងៃសុក្រកន្លងទៅ។
ក្នុងលិខិតផ្ញើទៅរដ្ឋសភាកាលពីថ្ងៃអាទិត្យ ប្រធានបុគ្គលិកប្រចាំសេតវិមាន លោក Mark Meadows និងរដ្ឋមន្ត្រីរតនាគារជាតិ លោក Steven Mnuchin បានជំរុញឱ្យគាំទ្រចំពោះច្បាប់នេះដែលអនុញ្ញាតឱ្យប្រើទឹកប្រាក់ ១៣០ពាន់លានដុល្លារពីមូលនិធិមិនបានប្រើប្រាស់ពីផែនការគាំទ្រមុនដែលអាចដាក់ទិសដៅជាថ្មី។
ថវិកាដែលនឹងត្រូវប្រើប្រាស់សម្រាប់អាជីវកម្ម ជាពិសេសក្រុមហ៊ុនសហគ្រាសធុនតូច និងមធ្យមដែលប្រឈមធ្លាក់ចុះចំណូល ខណៈពេលដែលការចរចាសម្រាប់ការគាំទ្រកាន់តែច្រើនឡើងៗ។
លិខិតនោះបានឱ្យដឹងថា៖ «ឥឡូវនេះជាពេលវេលាសម្រាប់ពួកយើង ដើម្បីធ្វើការងាររួមគ្នា និង បោះឆ្នោតបន្ទាន់គាំទ្រច្បាប់ ដើម្បីអនុញ្ញាតឱ្យពួកយើង ចំណាយមូលនិធិពីកម្មវិធីគាំពារការបើកប្រាក់បៀវត្សរ៍ ដែលមិនបានប្រើប្រាស់ ខណៈដែលយើងបន្តធ្វើការងារសំដៅទៅរកកញ្ចប់ថវិកាច្រើនជាងនេះ»។
វាដូចមិនទំនងដែលគណបក្សប្រជាធិបតេយ្យនឹងទទួលយកការស្នើសុំដែលមានរយៈពេលប្រហែល ៣ សប្តាហ៍ទៀត រហូតដល់បោះឆ្នោតនៅថ្ងៃទី ៣ ខែវិច្ឆិកា និងពេលដែលលោក ត្រាំ តាមពីក្រោយគូប្រជែងលោក Joe Biden ក្នុងការបោះឆ្នោតស្ទង់មតិ។
ប្រធានរដ្ឋសភា លោកស្រី Nancy Pelosi ដែលកំពុងចរចាជាមួយរដ្ឋាភិបាល បានបដិសេធរួចទៅហើយនូវគំនិតណាមួយនៃវិធានការដែលបានដៅដោយនិយាយថា លោកស្រី ចង់គាំទ្រសេដ្ឋកិច្ចធំទូលាយដែលលោកស្រីជឿថានឹងជំរុញសកម្មភាព។
យុទ្ធសាស្ត្រថ្មីរបស់សេតវិមានកើតមានឡើងបន្ទាប់ពី ១ សប្តាហ៍ដែលលោក ត្រាំ និងក្រុមរបស់លោកបានប្តូរកលល្បិចរវាងការកាត់បន្ថយការជជែក ត្រឡប់ទៅរកតុចរចា និងវិធានការដែលបានដៅទុក ប៉ុន្តែមិនទទួលបានជោគជ័យច្រើនទេ។
សេតវិមានកាលពីថ្ងៃសុក្របានបន្ថែមការផ្តល់របស់ខ្លួនដោយស្នើនូវកញ្ចប់ទឹកប្រាក់ ១,៨ ពាន់ពាន់លានដុល្លារ ពេលដែលលោក ត្រាំ ខ្លួនឯង និយាយថា លោកពេញចិត្តសូម្បីកញ្ចប់ថវិកាធំជាងនេះ។
វីរុសកូរ៉ូណាបានវាយប្រហារសេដ្ឋកិច្ចអាមេរិកយ៉ាងខ្លាំងដោយប្រជាជនជិត ១១ លាននាក់បាត់បង់ការងារ ហើយប្រជាជនសរុប ២៥ លាននាក់ បើជួបប្រទះនូវការធ្លាក់ចុះប្រាក់ចំណូល និងពឹងផ្អែកលើជំនួយពីវិស័យសាធារណៈ។
អាជីវកម្មធុនតូចជាច្រើនប្រឈមបញ្ហាលំហូរសាច់ប្រាក់ ដែលគំរាមកំហែងដល់ការរស់រាន ខណៈដែលក្រុមហ៊ុនធំៗបានចាប់ផ្តើមកាត់បន្ថយបុគ្គលិក ដែលអ្នកជំនាញយល់ស្របថា នឹងពិបាកគ្រប់គ្រង បើគ្មានការជំរុញពីរដ្ឋាភិបាលសហព័ន្ធ៕ RR
