ភ្នំពេញៈ ភោជនីយដ្ឋានថ្មីមួយឈ្មោះឡោវ ទីហ្វាង ដែលវិនិយោគអស់ទឹកប្រាក់៤លានដុល្លាររបស់ពាណិជ្ជករចិន បានបើកដំណើរការសាកល្បងកាលពីសប្តាហ៍មុន។
ភោជនីយដ្ឋានដ៏ធំនេះមានទីតាំងស្ថិតនៅទល់មុខស្ថានទូតចិន។
ការវិនិយោគលើភោជនីយដ្ឋានថ្មីនេះមិនមែនជារឿងចៃដន្យនោះទេ ប៉ុន្តែវាកើតមានឡើងស្របគ្នាទៅនឹងកំណើនទេសចរចិនដែលមកទស្សនាប្រទេសកម្ពុជា។
តំណាងភោជនីយដ្ឋាននេះបានឲ្យដឹងថាការបង្កើតឡើងនេះគឺដើម្បីឆ្លើយតបនឹងកំណើនជនជាតិចិននិងកំណើនតម្រូវការម្ហូបអាហារបែបចិននៅកម្ពុជា។
លោក យី ហ្វៃ ដែលជាមេចុងភៅប្រចំាភោជនីយដ្ឋានបានឲ្យដឹងថា៖ «យើងសង្កេតឃើញមានការកើនឡើងចំនួនភ្ញៀវទេសចរ និងវិនិយោគិនជនជាតិចិននៅកម្ពុជាជារៀងរាល់ឆ្នាំ ដូច្នេះហើយទើបយើងមានទំនុកចិត្តក្នុងការវិនិយោគនេះ ហើយសង្ឃឹមថាវានឹងទទួលបានការគាំទ្រច្រើននៅក្នុងប្រទេសកម្ពុជា»។
តួលេខឆ្នាំ២០១២បានបង្ហាញថាទេសចរកូរ៉េខាងត្បូងបានមកទស្សនាប្រទេសកម្ពុជាកើនឡើង២៤ភាគរយស្មើនឹង ៦១១០០០នាក់ខណៈដែលទេសចរចិនកើនឡើង៥៦,៥ភាគរយដែលមានចំនួន៣៣៥០០០នាក់ ហើយកំណើនទេសចរជប៉ុនគឺ៨ភាគរយគឺកើនដល់២៤៤ ០០០។
ភោជនីយដ្ឋាន ឡោវ ទីហ្វាង នឹងចាប់ផ្តើមដំណើរការជាផ្លូវការនៅក្នុងខែមីនាឆ្នាំ២០១៣។
បច្ចុប្បន្នភោជនីយដ្ឋាននេះ មានបម្រើជូននូវមុខម្ហូបចិនអាហារសមុទ្រ និង ម្ហូបបែបផ្សេងៗទៀតសរុបប្រមាណជាង២០០មុខ និងបានផ្តល់ការងារ២៥០នាក់ទាំងជនជាតិចិននិងខ្មែរ។
លោក លូ ម៉េង ប្រធានសមាគមសណ្ឋាគារនៅកម្ពុជាដែលមានសមាជិកប្រមាណ៨០សណ្ឋាគារ ហើយដែលលោកខ្លួនឯងផ្ទាល់មានភោជនីយដ្ឋានបែបចិនចំនួន៣នៅក្នុងទីក្រុងភ្នំពេញបានមានប្រសាសន៍ថាការវិនិយោគដែលមានទឹកប្រាក់ច្រើននេះជាការបង្ហាញអំពីភាពរឹងមាំនៃតម្រូវការសេវាកម្មភោជនីយដ្ឋាននិងឱកាសសម្រាប់អាជីវកម្មក្នុងវិស័យនេះ។
លោកបានថ្លែងថា៖«ភោជនីយដ្ឋាននេះប្រាកដជាមានការសិក្សាយ៉ាងច្បាស់លាស់មុននឹងសម្រេចចិត្តវិនិយោគ ដូច្នេះពួកគេប្រាកដជាឃើញមានសក្តានុពលក្នុងវិស័យនេះជាមិនខាន»។
លោក វង្ស សំអាង អ្នកសេដ្ឋកិច្ចមួយរូបនៅកម្ពុជាបានឲ្យដឹងថាការវិនិយោគលើឧស្សាហកម្មភោជនីយដ្ឋាន និងសណ្ឋាគារពីវិនិយោគិនរបស់ប្រទេសណាមួយតែងមានទំនាក់ទំនងយ៉ាងជិតស្និទ្ធទៅនឹងចំនួននៃការវិនិយោគរបស់ប្រទេសនោះនិងចំនួនភ្ញៀវទេសចរ។លោកបានលើកឡើងថា៖ «នៅពេលវិនិយោគិនពីប្រទេសណាមួយចូលមកគេតែងចង់បានការរស់នៅដែលមានវប្បធម៍និងទំនៀមទម្លាប់ស្រដៀងនឹងការរស់នៅនៃប្រទេសកំណើតរបស់ពួគេ។ដូច្នេះ ការមានភោជនីយដ្ឋាន ឬ សណ្ឋាគារជាជនជាតិដូចពួកគេកាន់តែច្រើនវាបានជួយគាំទ្រឲ្យការទាក់ទាញផ្នែកវិនិយោគកាន់តែមានប្រសិទ្ធភាព»។
កាលពីឆ្នាំ២០១២ចិនជាប្រទេសវិនិយោគធំលំដាប់លេខ២នៅក្នុងប្រទេសកម្ពុជាបន្ទាប់ពីកូរ៉េខាងត្បូង។
លោក អាង គឹមអៀងប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា កំណើនចិនជាលក្ខណៈCharter Flight មកកម្ពុជាមានកាន់តែច្រើន៕
