.jpg)
ទិដ្ឋភាពកាណូតចតរង់ចាំអ្នកដំណើរនៅស្ថានីយក្រុងតាខ្មៅកាលពីថ្ងៃចន្ទ។ រូបថត ហ៊ឹន ពិសី
ភ្នំពេញៈ ចំនួនភ្ញៀវធ្វើដំណើរតាមកាណូតសាធារណៈបានធ្លាក់ចុះប្រមាណ ៥ ភាគរយ នាដើមឆ្នាំ ២០២០ នេះធៀបនឹងរយៈពេលដូចគ្នាកាលពីឆ្នាំមុន បើទោះបីរដ្ឋាភិបាលបានប្រកាសបន្តមិនយកប្រាក់ពីកម្មកររហូតដល់ដើមខែកញ្ញា ឆ្នាំ ២០២១ ក៏ដោយ។ នេះបើតាមថ្នាក់ដឹកនាំនៃរដ្ឋាករស្វយ័តដឹកជញ្ជូនសាធារណៈរាជធានីភ្នំពេញ។
ដើម្បីសម្រួលដល់ការធ្វើដំណើរ សាលារាជធានីភ្នំពេញកាលពីឆ្នាំ ២០១៨ បានបង្កើតសេវាកាណូតសាធារណៈមួយដែលចេញដំណើរពីស្ថានីយឫស្សីកែវឆ្ពោះទៅក្រុងតាខ្មៅ ខេត្តកណ្តាល ដោយប្រើប្រាស់កាណូតចំនួន ៤ គ្រឿង និងត្រូវចំណាយពេល ៤៥ នាទី ក្នុងការធ្វើដំណើរ។
លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈបានប្រាប់ភ្នំពេញប៉ុស្តិ៍កាលពីម្សិលមិញថា ចំនួនភ្ញៀវធ្វើដំណើរតាមកាណូតសាធារណៈ ពីស្ថានីយឫស្សីកែវទៅកាន់ក្រុងតាខ្មៅក្នុង ១ ថ្ងៃ អាចមានប្រមាណ ២០០ នាក់ ដោយធ្លាក់ចុះប្រមាណ ៥ ភាគរយ បើធៀបនឹងដើមឆ្នាំ ២០១៩។ លោកបន្តថា ចំនួនភ្ញៀវធ្វើដំណើរតាមកាណូតធ្លាក់ចុះអាចបណ្តាលមកពីកត្តាច្រើនយ៉ាង។
លោកថ្លែងថា៖ «មូលហេតុចម្បងដែលធ្វើឲ្យសេវាកម្មកាណូតសាធារណៈមិនមានភ្ញៀវច្រើនគឺអាចបណ្តាលមកពីបច្ចុប្បន្នយើងមានសេវាកម្មរថយន្តក្រុងច្រើន ស្របពេលការធ្វើដំណើរតាមផ្លូវគោកពីតាខ្មៅមកភ្នំពេញក៏មានភាពល្អប្រសើរដែរ»។ បើតាមលោក សុឃីម ក្នុងចំណោមភ្ញៀវទាំងអស់នោះគឺមានជាង ៥០ ភាគរយ គឺជាអ្នកជិះលេងកម្សាន្ត។
សេចក្តីជូនដំណឹងរបស់រដ្ឋបាលរាជធានីភ្នំពេញពីចុងខែសីហា ឆ្នាំ ២០១៩ បានឲ្យដឹងថា រដ្ឋបាលរាជធានីភ្នំពេញសម្រេចបន្តមិនយកកម្រៃសេវាចំពោះកម្មករ-កម្មការិនីទាំងអស់ដែលធ្វើដំណើរតាមកាណូតសាធារណៈដោយគ្រាន់តែបង្ហាញកាតធ្វើការងារទៅភ្នាក់ងារបម្រើសេវារបស់រដ្ឋាករ។
ជាមួយនឹងចំនួនអ្នកជិះកាណូតដែលមានចំនួនជាមធ្យមប្រហែល ២០០ នាក់ ក្នុង ១ ថ្ងៃលោក សុខឃីម បានប្រាប់ថាជាង ៥០ ភាគរយ គឺជាអ្នកជិះដោយមិនមានបង់ប្រាក់ ហេតុនេះចំណូលគឺមិនមានចំនួនច្រើននោះទេ។
ទោះយ៉ាងណាលោក សុខឃីម មិនបានប្រាប់ឲ្យដឹងពីចំណូលដែលទទួលបានកាលពីឆ្នាំ ២០១៩ នោះទេ។
អ្នកស្រី ប៊ុន ចាន់ អាជីវករលក់ភេសជ្ជៈនៅក្បែរកាណូតសាធារណៈនៅស្ថានីយតាខ្មៅបាននិយាយថា ក្រៅពីថ្ងៃសោរ៍-អាទិត្យចំនួនអ្នកធ្វើដំណើរតាមកាណូតក្នុង ១ ថ្ងៃ អាចមានចំនួនក្រោម ១០ នាក់តែប៉ុណ្ណោះ ហើយថ្ងៃខ្លះស្ទើរតែមិនមានតែម្តង។ អ្នកស្រីបន្តថា ទោះដឹងថាការធ្វើដំណើរតាមកាណូតមានភាពងាយស្រួលឆាប់រហ័ស និងមិនបង់ប្រាក់សម្រាប់កម្មករ-កម្មការិនី តែហាក់មិនមាននរណាចាប់អារម្មណ៍សោះ។
អ្នកស្រីបន្តថា៖ «ថ្ងៃខ្លះខ្ញុំមិនឃើញមានអ្នកធ្វើដំណើរសោះតែម្តង ដោយអ្នកដែលមកក្បែរស្ថានីយក្រុងតាខ្មៅ គឺគ្រាន់តែជាអ្នកមកអង្គុយលេងប៉ុណ្ណោះ»។
បើតាមអ្នកស្រី ប៊ុន ចាន់ ថ្ងៃសោរ៍ អាទិត្យ ឬថ្ងៃបុណ្យអាចមានអ្នកជិះកាណូតច្រើន ហើយបើតាមការសង្កេតពីភាគច្រើនជាការជិះកម្សាន្ត។
បច្ចុប្បន្នពេលវេលានៃការចេញដំណើររបស់កាណូតក៏ត្រូវបានកែសម្រួលផងដែរ។ នេះបើតាមអ្នកស្រី ប៊ុន ចាន់។
បុគ្គលិកផ្នែកលក់សំបុត្រនៅស្ថានីយកាណូតសាធារណៈមួយកន្លែងបាននិយាយថា មានភ្ញៀវតិចតួចបំផុតដែលធ្វើដំណើរតាមរយៈកាណូតដោយអ្នកខ្លះគិតថា មិនមានសុវត្ថិភាព ហើយនៅពេលទៅដល់ស្ថានីយឈប់ គេត្រូវចំណាយបន្ថែមទៀតទៅលើការធ្វើដំណើរតាមរយៈម៉ូតូឌុបបន្តទៅទៀត។ លោកបានលើកឡើងថា៖ «ជិះកាណូតលឿន តែគេត្រូវរង់ចាំយូរ ព្រោះមិនមានជើងចេញច្រើននោះទេ ខណៈមានកាណូតតែ ៤ ប៉ុណ្ណោះដំណើរការ»។
បើតាមបុគ្គលិកខាងលើ សំបុត្រធ្វើដំណើរមានតម្លៃ ២ ០០០ រៀល សម្រាប់ការធ្វើដំណើរ ១ លើក៕ LA
