.jpg)
ប្រាក់រៀលជារូបិយបណ្ណជាតិ និងត្រូវបានលើកកម្ពស់ការចរាចរណ៍។ ហុង មិនា
ភ្នំពេញៈ សមាគមមីក្រូហិរញ្ញវត្ថុកម្ពុជា (CMA) បានឲ្យដឹងថា ចំនួនអ្នកស្នើសុំរៀបចំឥណទានឡើងវិញបានថយចុះគួរឲ្យកត់សម្គាល់ក្នុងរយៈពេល ៣ ខែចុងក្រោយនេះដែលជាសញ្ញាវិជ្ជមានបង្ហាញឲ្យឃើញថា ផលប៉ះពាល់ដោយសារកូវីដ ១៩ បានថមថយចុះខ្លះ។ នេះបើយោងតាមការអះអាងរបស់មន្ត្រីសមាគម។
ការរៀបចំឥណទានឡើងវិញជាការអនុវត្តតាមសារាចរណែនាំរបស់ធនាគារជាតិនៃកម្ពុជា (NBC) ដែលបានដាក់ចេញកាលពីខែមីនាឆ្នាំនេះស្ដីពីការរៀបចំឥណទានឡើងវិញ ដែលជាវិធានការឆ្លើយតបកាត់បន្ថយផលប៉ះពាល់ដល់វិស័យសេដ្ឋកិច្ចក្នុងអំឡុងពេលការរាលដាលកូវីដ ១៩។
លោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជាបានឲ្យដឹងថា គិតចាប់ពីខែមីនាដល់ថ្ងៃទី ៩ ខែសីហា មានអតិថិជន ២៦៦ ៨១៨ នាក់ ដែលរងផលប៉ះពាល់ដោយសារកូវីដ ១៩ បានស្នើសុំរៀបចំឥណទានឡើងវិញពីគ្រឹះស្ថានមីក្រូហិរញ្ញវត្ថុ។ ក្នុងនោះអតិថិជន ២៥០ ៩០៥ នាក់ ស្មើនឹង ៩០ ភាគរយ ត្រូវបានគ្រឹះស្ថានមីក្រូហិរញ្ញវត្ថុសម្រេចអនុម័តរៀបចំឥណទានឡើងវិញដែលមានទំហំឥណទានសរុប ១ ២៣២ លានដុល្លារ។
លោកបន្ថែមថា ការស្នើសុំរៀបចំឥណទានឡើងវិញរបស់អតិថិជនមានការធ្លាក់ចុះជាបន្តបន្ទាប់ចាប់តាំងពីខែមិថុនាដោយជាមធ្យមអតិថិជន ២០ ០០០ នាក់ ក្នុង ១ សប្តាហ៍ បានស្នើសុំរៀបចំឥណទានឡើងវិញក្នុងអំឡុងពេលមានការរាតត្បាតខ្លាំងកាលពីខែមេសា និងខែឧសភា ប៉ុន្តែចំនួននេះបានធ្លាក់មកត្រឹម ១០ ០០០ នាក់ កាលពីខែមិថុនា និងបន្តធ្លាក់មកនៅពី ២ ០០០ ទៅ ៣ ០០០ នាក់ គិតត្រឹមចុងសប្តាហ៍ទី ២ ក្នុងខែសីហា នេះ។
លោកថ្លែងថា៖ «យើងអាចសន្និដ្ឋានថា ផលប៉ះពាល់នៃកូវីដ ១៩ មានការថមថយគួរឲ្យកត់សម្គាល់ ហើយអតិថិជនមួយចំនួនក៏បានសុំបង់ទាំងដើម ទាំងការប្រាក់ជាធម្មតាផងដែរ»។
លោក ប៊ុន មុនី អគ្គនាយកគ្រឹះស្ថានមីក្រូហិរញ្ញវត្ថុ វិថី ប្រាប់ភ្នំពេញប៉ុស្តិ៍ថា គ្រឹះស្ថានមីក្រូហិរញ្ញវត្ថុរបស់លោកក៏មានចំនួនថយចុះនៃអ្នកស្នើសុំរៀបចំឥណទានឡើងវិញនៅប៉ុន្មានខែចុងក្រោយនេះ។ លោកបន្តថា គិតចាប់ពីខែកក្កដា មកគ្រឹះស្ថានរបស់លោកបានបញ្ចេញទុនជាមធ្យមពី ១០០ ០០០-១៥០ ០០០ ដុល្លារ ក្នុង ១ ខែ។ អំឡុងពេលមានការផ្ទុះជំងឺកូវីដខ្លាំងគ្រឹះស្ថានរបស់លោកមិនអាចបញ្ចេញទុនបាននោះទេ។
លោកថ្លែងថា៖ «ឥឡូវយើងមានអតិថិជនថ្មីៗជាច្រើនមកខ្ចីប្រាក់ពីគ្រឹះស្ថានរបស់យើងយកទៅពង្រីកអាជីវកម្ម និងចាប់ផ្តើមអាជីវកម្មថ្មី ដូច្នេះយើងអាចបញ្ចេញទុនបានជាហូរហែចាប់ពីពេលនេះទៅ»។
បើយោងតាមលោក តុងងី សព្វថ្ងៃឥណទានដែលប្រឈមហានិភ័យក្នុងវិស័យគ្រឹះស្ថានមីក្រូហិរញ្ញវត្ថុបានកើនឡើងពី ១ ភាគរយ ដល់ ២ ភាគរយក្នុងអំឡុងពេលរាតត្បាតជំងឺកូវីដ ១៩ ប៉ុន្តែវាមិនទាន់ដល់កម្រិតគួរបារម្ភទេ។
របាយការណ៍ CMA បង្ហាញថា ត្រឹមត្រីមាសទី ២ ឆ្នាំ ២០២០ ប្រាក់កម្ចីសរុបរបស់វិស័យនេះរួមមាន គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងប្រតិបត្តិករឥណទានជនបទមានចំនួន ៧ ២៦២ លានដុល្លារជាមួយអតិថិជន ជាង ២,១៨ លាននាក់ ខណៈប្រាក់បញ្ញើសរុបមានចំនួន ៣ ៦១៨ លានដុល្លារដោយមានអ្នកដាក់ប្រាក់បញ្ញើ ចំនួន ២,៨៧ លាននាក់៕ LA
