.jpg)
ផលិតផលស្ករត្នោតកំពង់ស្អឺដែលដាក់តាំងលក់នៅហាងសេដាក នាពេលកន្លងមក។ ភ្នំពេញ ប៉ុសិ៍្ត
ភ្នំពេញៈ សមាគមលើកកម្ពស់ស្ករត្នោតបានបង្ហាញពីសុទិដិ្ឋនិយមថា ការទទួលស្គាល់ស្ករត្នោតកំពង់ស្ពឺជាផលិតផលត្រូវបានការពារ ដោយសហភាពអឺរ៉ុប នឹងពង្រឹងទីផ្សារស្ករត្នោតរបស់កម្ពុជា ខណៈវានឹងនាំយកអត្ថប្រយោជន៍កាន់តែច្រើនសម្រាប់កសិករ។
លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ បានឲ្យដឹងថា ការទទួលស្គាល់ដោយអន្តរជាតិនៃផលិតផលសម្គាល់ភូមិសាស្ដ្រកម្ពុជា នឹងជួយបង្កើនតម្លៃផលិតផលនេះ ហើយនឹងធានាគុណភាព និងសុវត្ថិភាពអាហារសម្រាប់អ្នកប្រើប្រាស់ ព្រមទាំងបង្កើនប្រាក់ចំណូលសម្រាប់កសិករផងដែរ។
ស្ករត្នោតខេត្តកំពង់ស្ពឺ ត្រូវបានចុះបញ្ជីជាផលិតផលការពារដោយ EU កាលពីដើមខែមេសា កន្លងមកនេះ។ កម្ពុជាបានដាក់សំណើសុំចុះបញ្ជីឈ្មោះស្ករត្នោតកំពង់ស្ពឺ ជាផលិតផលសម្គាល់ភូមិសាស្ដ្រ (GI) ដែលមានការការពារទៅគណៈកម្មការអឺរ៉ុប កាលពីថ្ងៃទី ៣ ខែតុលាឆ្នាំ ២០១៧។ នេះបើយោងតាមកាសែត Official Journal របស់ EU។ នេះជាផលិតផល GI របស់កម្ពុជាទី ២ ហើយ បន្ទាប់ពីម្រេចខេត្តកំពតត្រូវបានចុះបញ្ជីការពារកាលពីខែកុម្ភៈឆ្នាំ ២០១៦ មក។
លោក សំ សារឿន បានថ្លែងថា៖ «ការទទួលស្គាល់ដោយ EU នឹងការពារស្ករត្នោតរបស់យើងនៅលើទីផ្សារ EU ហើយវានឹងបង្កើនទំនុកចិត្តដល់អតិថិជនសម្រាប់សុវត្ថិភាពអាហារ»។
លោកបន្តថា៖ «ឈ្មោះរបស់យើងនឹងត្រូវរក្សាដោយ EU ហើយកសិករមានមោទនភាព ក្នុងការផលិតស្ករត្នោត»។
លោកបន្តថា កសិករអាចរកប្រាក់បានយ៉ាងហោចណាស់ ៣ ០០០ ដុល្លារក្នុងមួយឆ្នាំពីស្ករត្នោត GI ដែលអាចលក់បានតម្លៃដល់ទៅ ៥ ០០០ រៀលក្នុង ១ គីឡូក្រាម។
សមាគមលើកកម្ពស់ស្ករត្នោតកំពង់ស្ពឺមានសមាជិក ១៦៨ នាក់ ហើយរំពឹងថា នឹងផលិតស្ករត្នោតបាន ២៥០ តោននៅក្នុងឆ្នាំនេះ។
បច្ចុប្បន្នមានក្រុមហ៊ុននាំចេញស្ករត្នោត ១០ ដែលនាំចេញផលិតផលនេះទៅ ២០ ប្រទេស ហើយទិសដៅសំខាន់ៗ គឺទីផ្សារជប៉ុន កោះតៃវ៉ាន់ កូរ៉េខាងត្បូង និង EU។ នេះបើយោងតាមសមាគម។ ផលិតផលនេះក៏ផ្គត់ផ្គង់ទីផ្សារក្នុងស្រុកផងដែរ។
លោក ហុង ហឺន ប្រធានសហគមកសិកម្មត្នោតកំពង់ស្ពឺ បានឲ្យដឹងថា ការទទួលស្គាល់ពីទីផ្សារ EU នឹងធ្វើឲ្យកសិករកាន់តែមានឆន្ទៈចង់ផលិតបន្ថែមទៀត។
លោកបានថ្លែងថា៖ «យើងគឺជាអ្នកផលិតស្ករត្នោត យើងមានមោទនភាពដោយសារការផលិតស្ករត្នោតរបស់យើងត្រូវបានទទួលស្គាល់ដោយទីផ្សារ EU ហើយវានឹងបន្ថែមតម្លៃដល់ការផលិតរបស់យើង»៕
