.jpg)
ស្ករត្នោត GI របស់កម្ពុជានៅតែទទួលបានការគាំទ្រច្រើននៅលើទីផ្សារអន្តរជាតិ ទោះបីជំងឺកូវីដ ១៩ កំពុងបន្តការរីករាលដាលក្នុងតំបន់។ រូបថត ភ្នំពេញ ប៉ុស្តិ៍
ភ្នំពេញៈ ទោះបីជំងឺកូវីដ ១៩ កំពុងបន្តការរីករាលដាលក្នុងតំបន់ និងសកលលោកក៏ទីផ្សារស្ករត្នោត GI របស់កម្ពុជាមិនធ្លាក់ចុះនោះទេ។ នេះបើតាមប្រធានសមាគមលើកកម្ពស់ស្ករត្នោតខេត្តកំពង់ស្ពឺ។
លោក សំ សារឿន ប្រធានសមាគមលើកកម្ពស់ស្ករត្នោត ខេត្តកំពង់ស្ពឺបានប្រាប់ ភ្នំពេញ ប៉ុស្តិ៍ថា ការរាតត្បាតជំងឺកូវីដ ១៩ បានធ្វើឱ្យប៉ះពាល់ដល់ចង្វាក់ផលិតកម្មស្ករត្នោត GI បន្តិចបន្តួច ប៉ុន្តែសម្រាប់ទីផ្សារគឺនៅតែល្អ។
លោកបន្តថា ជាក់ស្តែងកាលពីថ្មីៗនេះមានក្រុមហ៊ុនឥណ្ឌាមួយបានមកបញ្ជាទិញស្ករត្នោតចំនួន ៥០០ គីឡូក្រាមសម្រាប់នាំចេញទៅឥណ្ឌា។
លោកនិយាយថា៖ «ឥឡូវគេចង់បានស្ករត្នោត ១០ តោនទៀត ប៉ុន្តែយើងមិនទាន់មានទេដោយសារបញ្ហាជំងឺកូវីដបានធ្វើឱ្យយើងពិបាកចុះទៅផ្ទាល់ដើម្បីជំរុញការផលិត យើងមិនទាន់ឆ្លើយតបតាមសំណើរបស់គេទេ តែបើត្រូវការ ២-៣ តោន យើងអាចមានលទ្ធភាពផ្តល់ឱ្យបានភ្លាមៗ»។
លោក សារឿន ប៉ាន់ប្រមាណថា ស្ករត្នោតប្រមាណ ៥០ តោនហើយដែលត្រូវបានសមាជិកសមាគមបញ្ជាទិញពីក្រុមអ្នកផលិតសម្រាប់នាំចេញ។
លោកនិយាយថា៖ «ខ្ញុំឃើញថា ស្ករត្នោតមានទីផ្សារល្អជាងមុន ក៏ប៉ុន្តែផលិតកម្មយើងប្រឈមបន្តិចដោយសារជំងឺកូវីដ ១៩ ធ្វើឱ្យពិបាកក្នុងការជំរុញការផលិត»។
លោក Sebastien Lesieur អគ្គនាយកក្រុមហ៊ុន Farm Link Ltd ដែលជាក្រុមហ៊ុននាំចេញស្ករត្នោតបានប្រាប់ ភ្នំពេញ ប៉ុស្តិ៍ កាលពីខែធ្នូថា ការនាំចេញស្ករត្នោតនឹងមានកំណើនល្អក្នុងឆ្នាំ ២០២១។
លោកកត់សម្គាល់ថា ផលិតផលស្ករត្នោត GI កំពុងមានតម្រូវការខ្ពស់នៅទីផ្សារអឺរ៉ុបដោយកើនប្រហែល ១០ ភាគរយ ក្នុង ១ ឆ្នាំៗនារយៈពេល ១ ទសវត្សរ៍មកនេះ។
លោកថ្លែងថា៖ «វាគួរតែល្អប្រសើរជាងឆ្នាំនេះ (២០២០) ព្រោះតម្រូវការក្នុងស្រុកស្ទើរតែមិនមានក្នុងអំឡុងពេលនៃការឆ្លងកូវីដ ១៩។ ជាទូទៅ ២០ ភាគរយនៃផលិតផលសរុបត្រូវបានលក់នៅក្នុងស្រុក»។
លោកប្រាប់ថា៖ «យើងបានរកឃើញអតិថិជនថ្មីមួយចំនួននៅអឺរ៉ុប។ យើងនឹងទិញស្ករត្នោតចន្លោះពី ៥ ទៅ ៨ តោននៅឆ្នាំនេះ»។ លោកបន្តថា នៅទីផ្សារអឺរ៉ុបស្ករត្នោតកំពង់ស្ពឺមានតម្លៃពី ១០-១៥ អឺរ៉ូក្នុង ១ គីឡូក្រាមធៀបនឹងស្ករអំពៅដែលមានតម្លៃ ១ ទៅ ២ អឺរ៉ូ។
ស្ករត្នោតកំពង់ស្ពឺត្រូវបានចុះបញ្ជីផលិតផលការពារដោយសហភាពអឺរ៉ុបកាលពីខែមេសា ឆ្នាំ ២០១៩។ នេះជាផលិតផល GI ទី២ បន្ទាប់ពីម្រេចកំពតត្រូវបានចុះបញ្ជីការពារដោយអឺរ៉ុបកាលពីខែកុម្ភៈ ឆ្នាំ ២០១៦។
បើតាមលោក សារឿន ស្ករត្នោតកំពង់ស្ពឺអាចផលិតបានប្រហែល ២៥០ តោន ក្នុង ១ រដូវដោយចាប់ផ្តើមពីខែធ្នូ ដល់ខែឧសភា។ កាលពីឆ្នាំមុន ការនាំចេញទៅទីផ្សារអន្តរជាតិមានប្រហែល ៧០ តោន៕
វីដេអូ៖
