.jpg)
ការប្រមូលផលរបស់កសិករនៅខេត្តកំពង់ឆ្នាំងកាលពីខែមុន។ ស្ថានទូតអាមេរិកនឹងជួយគាំទ្រក្រុមហ៊ុននាំចេញអង្ករក្នុងការទទួលហិរញ្ញប្បទាន។ អាប់ឌុលរ៉ាស់ហ៊ីម
ភ្នំពេញៈ ឯកអគ្គរដ្ឋទូតអាមេរិកប្រចាំនៅកម្ពុជាលោក W. Patrick Murphy កាលពីថ្ងៃព្រហស្បតិ៍បានបញ្ជាក់ថា លោកនឹងជួយដល់ក្រុមហ៊ុននាំចេញ ក្រុមហ៊ុនផលិតរបស់ប្រទេស កម្ពុជា ដើម្បីមានលទ្ធភាពទទួលបានហិរញ្ញវត្ថុពីគ្រឹះស្ថានអាមេរិក ពិសេសពីធនាគារ អាហរ័ណនីហរ័ណអាមេរិក ដើម្បីបង្កើនការនាំចេញកសិកម្មរបស់ពួកគេទៅទីផ្សារអាមេរិក។
ថ្លែងទៅកាន់ក្រុមអ្នកយកព័ត៌មាននៅក្នុងព្រឹត្តិការណ៍ «ឱកាសពាណិជ្ជកម្មនៅក្នុងព្រឹត្តិការណ៍កសិកម្មពាណិជ្ជកម្មឆ្នាំ ២០២០» នៅទីក្រុងភ្នំពេញកាលពីម្សិលមិញលោក Patrick Murphy បានឲ្យដឹងថា វិស័យកសិកម្មរបស់ប្រទេស កម្ពុជា មានសក្ដានុពលដែលមិនទាន់ប្រើប្រាស់ ប៉ុន្តែលទ្ធភាពទទួលបានហិរញ្ញប្បទាននៅមានកម្រិតដែលរារាំងដល់ការនាំចេញរបស់ពួកគេទៅទីផ្សារអាមេរិក។
ព្រឹត្តិការណ៍រយៈពេល ២ ថ្ងៃនេះត្រូវបានចូលរួមដោយក្រុមហ៊ុនកសិកម្ម ក្រុមហ៊ុនបច្ចេកវិទ្យាអាមេរិកសំខាន់ៗចំនួន ១៥ រួមជាមួយនឹងពាណិជ្ជករក្នុងស្រុកជាច្រើនផ្សេងទៀត។
លោកថ្លែងថា ទាក់ទងនឹងលទ្ធភាពទទួលបានហិរញ្ញប្បទានពីអាមេរិក ស្ថានទូតមានគំនិតផ្តួចផ្ដើមស្ថិតក្រោមទីភ្នាក់ងារមួយចំនួនដូចជាក្រសួងពាណិជ្ជកម្មអាមេរិក ក្រសួងកសិកម្មអាមេរិក ពិសេសរដ្ឋបាលពាណិជ្ជកម្ម និងការអភិវឌ្ឍ និងមានការអភិវឌ្ឍកិច្ចសហប្រតិបត្តិការហិរញ្ញវត្ថុ និងធនាគារអាហរ័ណ-នីហរ័ណអាមេរិក។
លោកលើកឡើងថា៖ «ខ្ញុំមើលឃើញតួនាទីរបស់ខ្ញុំជាឯកអគ្គរដ្ឋទូតអាចព្យាយាម និងជួយអប់រំនៅទីនេះលើឱកាសទាំងនេះ និងជំរុញក្រុមហ៊ុនផលិតរបស់ប្រទេសកម្ពុជា ក្រុមហ៊ុននានា សហគ្រាសធុនតូច និងមធ្យម ដើម្បីចាប់យកឱកាសនេះ»។
លោកឲ្យដឹងថា រហូតមកដល់ពេលនេះក្រុមហ៊ុនផលិត និងក្រុមហ៊ុននាំចេញអង្ករសំខាន់ៗទទួលបានការធានាប្រាក់កម្ចីធនាគារអាហរ័ណ-នីហរ័ណអាមេរិកដែលបានផ្ដល់ដល់ពួកគេនូវលទ្ធភាពទទួលបានកម្ចីមូលធនក្នុងការទិញឡសម្ងួតមានបច្ចេកវិទ្យាខ្ពស់ដើម្បីស្ដុកស្រូវរបស់ពួកគេនៅក្នុងស្ថានភាពល្អប្រសើរ។
លោកបន្ថែមថា៖ «យើងជឿជាក់ថាយើងអាចមើលឃើញក្រុមហ៊ុននាំចេញរបស់កម្ពុជាកាន់តែច្រើនឡើងៗ»។
កាលពីខែឧសភា ឆ្នាំ ២០១៨ ក្រុមហ៊ុន Amru Rice (Cambodia) ជាក្រុមហ៊ុនកែច្នៃ និងនាំចេញអង្ករឈានមុខគេ គឺជាក្រុមហ៊ុននាំចេញរបស់ប្រទេសកម្ពុជាដំបូងគេដែលទទួលបានហិរញ្ញប្បទានមួយចំនួនពីធនាគារអាហរ័ណ-នីហរ័ណអាមេរិក (EXIM) សម្រាប់ការទិញប្រព័ន្ធស្ដុកអង្ករដើម្បីជំរុញការផលិតអង្ករសរីរាង្គសម្រាប់ការនាំចេញ។
លោក សុង សារ៉ន ប្រធានក្រុមហ៊ុន Amru Rice (Cambodia) បានប្រាប់ភ្នំពេញប៉ុស្ដិ៍ កាលពីថ្ងៃព្រហស្បតិ៍ថា កម្ចីនេះត្រូវបានប្រើប្រាស់សម្រាប់ការទិញឡសម្ងួតបច្ចេកវិទ្យាខ្ពស់ ដើម្បីឆ្លើយតបស្ដង់ដាខ្ពស់របស់អាមេរិកសម្រាប់ការនាំចេញ។
លោកថ្លែងថា៖ «ទីផ្សារអាមេរិកគឺជាសក្ដានុពលតែមួយគត់សម្រាប់ពួកយើង នៅពេលនេះនិងនៅពេលអនាគត ខណៈក្រុមហ៊ុនអាមេរិកជាច្រើនផ្សេងទៀតភ្លេចអំពីសក្ដានុពលដែលមិនទាន់ប្រើប្រាស់របស់យើង»។ លោកបន្តថា ខណៈប្រទេស កម្ពុជា ខ្វះការវិនិយោគលើការវេចខ្ចប់ និងការកែច្នៃ។
លោកលើកឡើងថា៖ «ខ្ញុំសង្ឃឹមថា ពាណិជ្ជករអាមេរិកដែលចូលរួមនៅក្នុងព្រឹត្តិការណ៍នេះនឹងមកវិនិយោគនៅទីនេះ នៅពេលអនាគតខាងមុខ បន្ទាប់ពីពួកគេមើលឃើញសក្ដានុពល ខណៈផលិតផលរបស់យើងក៏មានគុណភាពខ្ពស់ដើម្បីឆ្លើយតបនឹងស្ដង់ដាអាមេរិកផងដែរ»។
លោក ប៉ាន សូរស័កិ្ត រដ្ឋមន្ដ្រីក្រសួងពាណិជ្ជកម្មបានឲ្យដឹងថា កម្ពុជាគឺជាប្រទេសមួយមានប្រជាជន ៧៨ ភាគរយ រស់នៅក្នុងតំបន់ជនបទ និងពឹងលើវិស័យកសិកម្ម។ វិស័យកសិកម្មគឺជាវិស័យមួយដ៏សំខាន់របស់ប្រទេសកម្ពុជាដែលបានរួមចំណែក ១ ភាគ ៣ នៃផលិតផលក្នុងស្រុកសរុប និងផ្ដល់ការងារដល់កម្លាំងពលកម្ម ៤០ ភាគរយ។
លោកបញ្ជាក់ថា៖ «អ្នកអាចពិចារណាការធ្វើអាជីវកម្មនៅក្នុងប្រទេស កម្ពុជា ហើយខ្ញុំជំរុញឲ្យអ្នកជួបជាមួយដៃគូកសិកម្មក្នុងស្រុករបស់យើង ដើម្បីពិភាក្សា និងស្វែងរកមធ្យោបាយក្នុងការធ្វើការងាររួមគ្នានៅក្នុងប្រទេស កម្ពុជា។
កាលពីឆ្នាំ ២០១៨ ភាគរយនៃអនុវិស័យរបស់វិស័យកសិកម្មនៅក្នុងផលិតផលក្នុងស្រុកសរុបមានចំនួន ៥៨,១ ភាគរយ នៃដំណាំកសិកម្ម ការផលិតសត្វ ១១,១ ភាគរយ និងនេសាទ ២៤,១ ភាគរយ និងរុក្ខាប្រមាញ់ ចំនួន ៦,៧ ភាគរយ។ នេះបើយោងតាមលោក ប៉ាន សូរស័ក្តិ៕LA
