ភ្នំពេញៈ គ្រឹះស្ថានមីក្រូហិរញ្ញវត្ថុស្ថាបនាលីមីតធីត និងធនាគារ ម៉ារូហាន់ ជប៉ុន ភីអិលស៊ី នឹងរួមគ្នាបង្កើតធនាគារពាណិជ្ជថ្មីមួយ ដែលគេរំពឹងថានឹងចាប់ផ្តើមនៅឆ្នាំក្រោយ។
សេចក្តីប្រកាសរួមកាលពីម្សិលមិញឲ្យដឹងថា ស្ថាប័នទាំងពីរបានចុះហត្ថលេខាលើអនុស្សរណៈនៃការយោគយល់គ្នាស្តីពីការរួមបញ្ចូលគ្នាដើម្បីក្លាយខ្លួនទៅជាធនាគារពាណិជ្ជថ្មីនៅដើមឆ្នាំក្រោយ។
ជាមួយនឹងទុនចុះបញ្ជីជាង១០០លានដុល្លារ ធនាគារពាណិជ្ជដែលកើតចេញពីការរួមបញ្ចូលគ្នានេះ នឹងត្រូវឲ្យឈ្មោះថា ធនាគារស្ថាបនា ភីអិលស៊ី ស្ថិតនៅក្រោមសាជីវកម្ម ម៉ារ៉ូហាន់ (Maruhan Japan Group)។
លោក ប៊ុន មុនី ប្រធានអគ្គនាយក គ្រឹះស្ថានមីក្រូហិរញ្ញវត្ថុ ស្ថាបនា ថ្លែងនៅក្នុងសន្និសីទកាសែតអំពីការរួមបញ្ចូលគ្នា រវាងធនាគារជប៉ុន ម៉ារូហាន់ និងគ្រឹះស្ថានមីក្រូហរិញ្ញវត្ថុស្ថាបនាថា ការពិភាក្សាគ្នារវាងស្ថាប័នទាំងពីរនេះ ពាក់ព័ន្ធនឹងការរួមបញ្ចូលគ្នានៃរចនាសម្ព័ន្ធ ធនធានមនុស្ស និងផលិតផលនឹងត្រូវបញ្ចប់នៅចុងឆ្នាំនេះ ដើម្បីស្នើសុំអាជ្ញាប័ណ្ណសម្រាប់ធនាគារពាណិជ្ជថ្មីនេះពីធនាគារជាតិកម្ពុជា។
លោកថ្លែងថា៖ «នៅដំណាច់ឆ្នាំ២០១៥នេះ កិច្ចការងាររួមបញ្ចូលគ្នានេះនឹងបានចប់សព្វគ្រប់។ ក្រោយកិច្ចការងាររួមបញ្ចូលគ្នានេះ យើងនឹងដាក់ស្នើសុំទៅធនាគារជាតិនៃកម្ពុជាដើម្បីទទួលស្គាល់ជាផ្លូវការ ហើយរំពឹងថានឹងទទួលបានអាជ្ញាប័ណ្ណមិនហួសពីត្រីមាសទីមួយឆ្នាំ២០១៦នោះទេ។ យើងចង់បានអាជ្ញាប័ណ្ណនៅខែ ធ្នូ ២០១៥ នេះ តែម្តងបើសិនជាអាចធ្វើទៅបាន»។
លោកបញ្ជាក់ថា ធនាគារពាណិជ្ជថ្មីនេះនឹងបន្តផ្តោតលើកម្ចីតូចៗសម្រាប់អតិថិជននៅជនបទ។
ធនាគារ ម៉ារូហាន់ ជប៉ុន កាលពីឆ្នាំ ២០១២ បានទិញភាគហ៊ុន ស្ថាបនាលីមីតធីត៩៥,១ភាគរយ ហើយរំពឹងថានឹងទិញយកភាគហ៊ុនដែលនៅសល់ ៤,៩ ភាគរយនៅក្នុងឆ្នាំនេះ។ រហូតដល់ខែមករា ឆ្នាំ២០១៥ ទ្រព្យសកម្មសរុបបញ្ចូលគ្នារបស់ធនាគារ ម៉ារូហាន់ និងស្ថាបនា មានចំនួន ៥២៧ លានដុល្លារ មានការិយាល័យ ១៤០ បុគ្គលិក ២៦៥២ នាក់ មានអ្នកដាក់ប្រាក់បញ្ញើជាង ៩០ ០០០នាក់ និងអ្នកខ្ចីប្រាក់ ១០៥ ០០០ នាក់។
លោក Yabe Yoshikazu នាយកគ្រប់គ្រងទូទៅនៃធនាគារ ម៉ារូហាន់ ជប៉ុន ភីអិលស៊ី ថ្លែងថា មានការប្រកួតប្រជែងខ្លាំងក្នុងចំណោមធនាគារពាណិជ្ជនៅកម្ពុជា។
លោកថា ការរួមបញ្ចូលគ្នាជាមួយ គ្រឹះស្ថានមីក្រូហិរញ្ញវត្ថុ ស្ថាបនា នឹងអាចឲ្យស្ថាប័នទាំងពីរពង្រីកចំណែកទីផ្សាររបស់ខ្លួនក្នុងទីផ្សារហិរញ្ញវត្ថុ។
លោកថ្លែងថា៖ «ការប្រកួតប្រជែងគឺខ្លាំងណាស់។ បច្ចុប្បន្នយើងមានការិយាល័យកណ្ដាលតែមួយនៅទីក្រុងភ្នំពេញ។ ទំហំប្រតិបត្តិការរបស់យើងនៅមិនទាន់ធំនៅឡើយទេនៅពេលនេះ ប៉ុន្តែ យើងទទួលបានប្រាក់ចំណេញរួចហើយក្នុងពេលពីរឆ្នាំនេះ។ អនាគតយើងទទួលបានលទ្ធផលល្អទាក់ទងនឹងផ្នែកធនាគារលក់ដុំ ធនាគារឯកជន និងធនាគារតំបន់ផងដែរ»។
លោកបន្ថែមថា៖ «ប៉ុន្តែយើងខុសនឹងទុនបម្រុងធម្មតា ដូច្នេះយើងស្វែងរកសាខាឬបណ្ដាញម៉ាស៊ីនអេធីអឹមបន្ថែមដើម្បី ពង្រីកបណ្តាញ។ ដូច្នេះការបញ្ចូលគ្នានេះ ជាមួយ គ្រឹះស្ថានមីក្រូហិរញ្ញវត្ថុ ស្ថាបនា នឹងបម្រើដល់ពួកយើង»។
គ្រឹះស្ថានមីក្រូហិរញ្ញវត្ថុប្រាសាក់នឹងក្លាយជាធនាគារពាណិជ្ជផងដែរ។ កាលពីឆ្នាំ២០១៣ ប្រាសាក់បានដាក់ឯកសារទៅ ធនាគារជាតិនៃ កម្ពុជា (NBC) សុំអាជ្ញាប័ណ្ណក្លាយជាធនាគារពាណិជ្ជ ហើយពេលនេះកំពុងរង់ចាំការយល់ព្រមពី NBC។
លោក ស៊ីម សេនាជាតិ អគ្គនាយកប្រាសាក់បានស្វាគមន៍ដល់ការបញ្ជូលគ្នានេះដោយលើកឡើងថាវានឹងអនុញ្ញាតឲ្យគ្រឹះស្ថានហិរញ្ញវត្ថុបង្កើនមូលធននៅពេលជាមួយគ្នានេះដើម្បីធ្វើឲ្យប្រតិបត្តិការកាន់តែមានប្រសិទ្ធភាពថែមទៀត។
លោកថា៖«ទីផ្សារមានការប្រកួតប្រជែងរួចហើយ។ ខ្ញុំគិតថាការបញ្ជូលគ្នានេះគឺជាចំណុចដ៏ល្អដោយសារតែវាអនុញ្ញាតឲ្យប្រតិបត្តិករកាន់តែមានប្រសិទ្ធភាព និងបង្កើនទុនរបស់ពួកគេដែលល្អសម្រាប់អតិថិជន»។
លោក Stephen Higgins នាយកគ្រប់គ្រងនៃស្ថាប័នប្រឹក្សាយោបល់ Cambodia-based investment firm Mekong Strategic Partners កាលពីម្សិលមិញបង្ហាញសុទិដ្ឋិនិយមចំពោះការរួមបញ្ចូលគ្នានេះ។
លោកបន្តថា៖ «ផលចំណេញនឹងមិនមានច្រើនទេ បើស្ថាប័នពីរនៅដាច់ដោយឡែកពីគ្នា ដូច្នេះគិតទៅវាសមហេតុផលនៅពេលស្ថាប័នទាំងពីរសម្រេចរួមបញ្ចូលគ្នាតែមួយហើយខ្ញុំជឿជាក់ថា ធនាគារជាតិនៃកម្ពុជានឹងរីករាយចំពោះការរួមបញ្ចូលគ្នានេះ»។
លោក គឹម វ៉ាដា អគ្គនាយកត្រួតពិនិត្យ ធនាគារជាតិនៃកម្ពុជាដែលបានចូលរួមជាអធិបតីក្នុងពិធីចុះហត្ថលេខាកាលពីម្សិលមិញក៏សាទរនឹងចរន្តថ្មីនេះដែរ ហើយបានស្នើឲ្យមានការពិភាក្សា និងសិក្សាឲ្យបានល្អិតល្អន់រវាងស្ថាប័នទាំងពីរ។
លោកបានមានប្រសាសន៍ថា៖ «ខ្ញុំមានជំនឿជឿជាក់ថាធនាគារ នឹងសិក្សាលម្អិតអំពីការរួមបញ្ចូលគ្នាយ៉ាងហ្មត់ចត់និងគ្រប់ជ្រុងជ្រោយ»៕PB
