ភ្នំពេញៈ ក្រុមប្រឹក្សាធុរកិច្ចកម្ពុជាប្រចាំនៅទីក្រុងបាងកក (CBC) និងក្រុមប្រឹក្សាធុរកិច្ចថៃនៅកម្ពុជា (TBCC) បានប្តេជ្ញាសហការរួមគ្នាធ្វើការទាក់ទាញវិនិយោគិនថៃ និងកម្ពុជា ដើម្បីជំរុញសេដ្ឋកិច្ច និងការទូត ជាពិសេសដើម្បីរួមចំណែកពង្រឹងការដោះដូរទំនិញរវាងប្រទេសទាំង ២ ឱ្យសម្រេចតាមផែនការរបស់ថ្នាក់ដឹកនាំប្រទេសទាំង ២ ឱ្យបាន ១៥ ពាន់លានដុល្លារក្នុងរយៈពេលដ៏ខ្លីខាងមុខ។
ជំនួបលើកដំបូងរវាងស្ថាប័នទាំង ២ នេះ ធ្វើឡើងបន្ទាប់ពី CBC បានបើកឱ្យដំណើរការកាលពីថ្ងៃទី ២០ ខែឧសភា នៅទីក្រុងបាងកក ដែលស្ថាប័ននេះនឹងដើរតួនាទីជាស្ពានក្នុងការទាក់ទាញវិនិយោគិន និងអ្នកជំនួញប្រទេសទាំង ២ ឱ្យបណ្តាក់ទុនរួមគ្នា និងជាយន្តការមួយក្នុងការជួយអនុវត្តសេដ្ឋកិច្ច និងការទូតរបស់កម្ពុជានៅលើឆាកអន្តរជាតិ។
ក្នុងកិច្ចប្រជុំកាលពីថ្ងៃទី ២៨ ខែឧសភា លោក សុធា សម្បត្តិ ប្រធាន CBC បានលើកឡើងថា ការបង្កើត CBC គឺជាគំនិតផ្តួចផ្តើមរបស់ស្ថានទូតកម្ពុជាប្រចាំទីក្រុងបាងកក ដើម្បីជំរុញ និងលើកកម្ពស់សេដ្ឋកិច្ចការទូតកម្ពុជានៅលើឆាកអន្តរជាតិ ជាពិសេស គឺការទាក់ទាញវិនិយោគិនបរទេសឱ្យមកវិនិយោគនៅកម្ពុជាបានកាន់តែច្រើន។
លោកថ្លែងថា៖ «កម្ពុជា និងថៃ គឺជាប្រទេសជិតខាងដែលមានវប្បធម៌ និងការរស់នៅប្រហាក់ប្រហែលគ្នា ដូច្នេះតួនាទីរបស់ CBC គឺមិនត្រឹមតែដើម្បីបង្កើនទាក់ទាញការវិនិយោគប៉ុណ្ណោះទេ ប៉ុន្តែយើងចង់ធ្វើការបង្កើនទំនាក់ទំនងវប្បធម៌ទេសចរណ៍ និងប្រជាជនផងដែរ។ យើងសង្ឃឹមថា តាមរយៈកិច្ចសហការជាមួយក្រុមប្រឹក្សាធុរកិច្ចថៃនៅកម្ពុជា វានឹងធ្វើឱ្យសម្រេចបាននូវចក្ខុវិស័យវែងឆ្ងាយ និងជួយចូលរួមអនុវត្តសេដ្ឋកិច្ចការទូតរវាងប្រទេសទាំង ២»។
លោកស្រី ជីរ៉ាណាន់ វង្សមង្គល ប្រធាន TBCC បាននិយាយថា លោកស្រីនឹងចូលរួមសហការជាមួយ CBC ដើម្បីទាក់ទាញធុរជនថៃ និងកៀរគរវិនិយោគិនកម្ពុជាបន្ថែមទៀត។ លោកស្រីថ្លែងថា៖ «ខ្ញុំពិតជារីករាយនឹងកិច្ចសហការរវាងស្ថាប័នទាំង ២ ដែលនឹងក្លាយជាកម្លាំងជំរុញមួយបន្ថែមទៀតដល់ធុរជន និងវិនិយោគិនកម្ពុជា-ថៃកាន់តែមានទំនុកចិត្តមួយកម្រិតទៀតក្នុងការបណ្តាក់ទុនរកស៊ីទៅវិញទៅមក»។
តាមគម្រោងស្ថាប័នទាំង ២ នឹងចុះអនុស្សរណៈយោគយល់គ្នានាពេលខាងមុខដើម្បីពន្លឿនការងាររួមគ្នាទោះបីជំងឺកូវីដ ១៩ កំពុងបន្តរីករាលដាល។
ពាណិជ្ជកម្មទ្វេភាគីកម្ពុជា និងថៃបានកើនដល់ ៧,២៣៦ ពាន់លានដុល្លារ កាលពីឆ្នាំ ២០២០ ធ្លាក់ចុះ ២៣,១៧ ភាគរយ ធៀបនឹងឆ្នាំ ២០១៩ ដែលបណ្តាលមកពីការរំខាននៃជំងឺរាតត្បាតកូវីដ ១៩៕ LA