ភ្នំពេញៈ គ្រឹះស្ថានហិរញ្ញវត្ថុដែលចុះបញ្ជីមូលបត្រសាជីវកម្មចំនួន ៥ នៅលើក្រុមហ៊ុនផ្សារមូលបត្រកម្ពុជា (CSX) បានបង្ហាញកំណើនវិជ្ជមាននៅត្រីមាសទី១ ឆ្នាំនេះ ទោះបីជាប្រទេសកម្ពុជា កំពុងប្រយុទ្ធប្រឆាំងនឹងការរីករាលដាលជំងឺកូវីដ ១៩ នៅក្នុងសហគមន៍ក៏ដោយ។
LOLC (Cambodia) ដែលជាគ្រឹះស្ថានមីក្រូហិរញ្ញវត្ថុ បានឱ្យដឹងនៅក្នុងឯកសារផ្ញើទៅ CSX កាលពីថ្ងៃទី ១៧ ខែឧសភាថា តុល្យភាពប្រាក់បញ្ញើបានកើនឡើងដល់ ២ ២៧២ លានរៀល កើនឡើង ៥ ភាគរយ ធៀបនឹងចុងឆ្នាំ ២០២០។ ផលបត្រកម្ចីដុលបានកើនឡើងដល់ ៣ ៦២៥ លានរៀល កើនឡើង ៥ ភាគរយធៀបចុងឆ្នាំ ២០២០។
លោក សុខ វឿន អគ្គនាយកបានឱ្យដឹងថា ប្រទេសកម្ពុជា កំពុងប្រឈមនឹងការរីករាលដាលជំងឺកូវីដ ១៩ ជាពិសេសការរីករាលដាលក្នុងសហគមន៍ ដែលបានចាប់ផ្ដើមកាលពីខែកុម្ភៈឆ្នាំ ២០២១ រដ្ឋាភិបាលបានឆ្លើយតបយ៉ាងរហ័សចំពោះករណីឆ្លងដែលកើនឡើងនៅពេលថ្មីៗនេះ។
លោកលើកឡើងថា៖ «យើងរំពឹងថា សេដ្ឋកិច្ចនឹងត្រឡប់ទៅរកកំណើនក្នុងឆ្នាំ ២០២១។ ការណ៍នេះនឹងជួយបង្កើនប្រាក់ចំណូលគ្រួសារ ហើយគ្រប់វិស័យ និងតំបន់ទាំងអស់នឹងទទួលបានអត្ថប្រយោជន៍ស្មើគ្នា ដូច្នេះវានឹងមានសារៈសំខាន់ក្នុងការត្រួតពិនិត្យដោយយកចិត្តទុកដាក់លើសុខុមាលភាពគ្រួសារ និងតម្រូវការការគាំទ្របន្ថែម»។
ជាមួយគ្នានេះ ធនាគារ Hattha Bank Plc ក៏បានប្រកាសថា នៅត្រីមាសទី១ ឆ្នាំ ២០២១ នេះ ផលបត្រកម្ចីរបស់ខ្លួនបានកើនឡើង ៧ ភាគរយធៀបនឹងត្រីមាសទី៤ ឆ្នាំ ២០២០ ដល់ ១ ៤១២ លានដុល្លារ។ ប្រាក់បញ្ញើបានកើនឡើងដល់ ៨២១ លានដុល្លារ កើនឡើង ៤ ភាគរយធៀបនឹងត្រីមាសទី៤ ឆ្នាំ ២០២០។
លោក Dan Harsono បានថ្លែងថា៖ «ធនាគារ Krungsri ដែលជាម្ចាស់ភាគហ៊ុនរបស់ខ្លួនគ្រោងនឹងផ្ដល់មូលនិធិបន្ថែម និងដើមទុនដើម្បីពង្រឹងបន្ថែមដល់សន្ទនីយភាពរបស់ធនាគារ Hattha Bank និងមូលដ្ឋានដើមទុននៅត្រីមាសទី២។
ការផ្ដល់នេះនឹងធានាថា ធនាគារនឹងនៅតែបន្តប្រតិបត្តិការយ៉ាងល្អប្រសើរ នៅក្នុងបរិយាកាសផុយស្រួយនេះ»។ គិតត្រឹមចុងត្រីមាសទី១ Hattha Bank បានផ្ដល់ការរៀបចំឥណទានឡើងវិញ ដែលគ្របដណ្ដប់លើអតិថិជនជាង ១៤ ០០០ នាក់ ប្រហែល ១៤០ លានដុល្លារជាកម្ចីសរុប។
ប្រាសាក់ ដែលជាគ្រឹះស្ថានមីក្រូហិរញ្ញវត្ថុឈានមុខគេរបស់ប្រទេសកម្ពុជា បានរាយការណ៍ថា នៅត្រីមាសទី១ ឆ្នាំ ២០២១ ខ្លួនទទួលបានប្រាក់ចំណូលការប្រាក់សរុប ៤៨២ ២៨៤ លានរៀល ដោយបានកើនឡើង ៥៨ ៨៩៩ លានរៀល ស្មើនឹង ១៣,៩១ ភាគរយធៀបនឹងរយៈពេលដូចគ្នាកាលពីឆ្នាំមុននៅត្រីមាសទី១ ឆ្នាំ ២០២០ និងប្រាក់ចំណេញសុទ្ធក្នុងរយៈពេល ៣ ខែបញ្ចប់ត្រឹមត្រីមាសទី ១ ឆ្នាំ ២០២១ មានចំនួន ១៤៥ ៩៧៨ លានរៀល កើនឡើង ៤៦ ៤៨២ លានរៀល ស្មើនឹង ៤៦,៧២ ភាគរយ ធៀបនឹងរយៈពេលដូចគ្នាកាលពីឆ្នាំមុន នៅត្រីមាសទី១ ឆ្នាំ ២០២០។
គិតត្រឹមថ្ងៃទី ៣១ ខែ មីនា ឆ្នាំ ២០២១ ប្រាសាក់មានទ្រព្យសកម្មសរុប ១៥ ១៥៣ ៤២៥ លានរៀល កើនឡើង ៣,៥៩ ភាគរយ និងមូលធនសរុបចំនួន ២ ២៤៤ ១៧៥ លានរៀល កើនឡើង ៦,៩៣ ភាគរយធៀប នឹងថ្ងៃទី ៣១ ខែ ធ្នូ ឆ្នាំ ២០២០។
ជាមួយគ្នានេះដែរ ABA ជាធនាគារមួយក្នុងចំណោមធនាគារពាណិជ្ជឈានមុខគេក៏បានរាយការណ៍កាលពីត្រីមាសទី១ ឆ្នាំ ២០២១ ថា ខ្លួនបានចេញកម្ចីចំនួន ១១ ៤៥៣ មានតម្លៃ ៥០៥,១ លានដុល្លារ ត្រូវបានបញ្ចេញ។ ធនាគារក៏ទទួលបានការកើនឡើងនៃផលបត្រកម្ចីដុលរបស់ខ្លួន ១០ ភាគរយ មានចំនួនសរុប ៤,២ ពាន់លានដុល្លារ។
សម្រាប់ផលបត្រប្រាក់បញ្ញើស្មើនឹង ៥,២ ពាន់លានដុល្លារនៅត្រីមាសទី១ ឆ្នាំ ២០២១ កើនឡើង ៧ ភាគរយធៀបនឹងត្រីមាសមុនកាលពីឆ្នាំ ២០២០។ ធនាគារនេះទទួលបានប្រាក់ចំណេញសុទ្ធចំនួន ៤៧,៥ លានដុល្លារនៅត្រីមាសនេះ។
លោក Yves Jacquot ប្រធានធនាគារ ABA លើកឡើងថា៖ «ដើម្បីដើរតួនាទីដ៏សំខាន់របស់ខ្លួនក្នុងការគាំទ្រដល់អ្នកខ្ចីដែលរងផលប៉ះពាល់ខ្លាំងបំផុតដោយវិបត្តិនៃការរីករាលដាលជំងឺនេះ ធនាគារ ABA បានបន្តរៀបចំឥណទានឡើងវិញ បន្ទាប់ពីគោលការណ៍ណែនាំពីធនាគារជាតិ»។
គិតត្រឹមដំណាច់ត្រីមាសទី១ ឆ្នាំ ២០២១ ធនាគារនេះបានរៀបចំឥណទានឡើងវិញចំនួន ១០ ៤៩៨ ដែលមានតម្លៃ ៥៣៧ លានដុល្លារអាមេរិក។
ខណៈដែលធនាគារ PPCBank របស់កូរ៉េខាងត្បូងក៏បានរាយការណ៍ថា គិតត្រឹមត្រីមាសទី១ ឆ្នាំ ២០២១ ប្រាក់កម្ចីបានកើនឡើងពី ៧២២ លានដុល្លារដល់ ៧២៦ លានដុល្លារ ប្រាក់បញ្ញើបានកើនឡើងដល់ ៨០៦ លានដុល្លារ កើនឡើង ២,១៥ ភាគរយជាមូលធនសរុបកើនឡើងពី ១៥៦ លានដុល្លារដល់ ១៥៩ លានដុល្លាររៀងគ្នា ធៀបនឹងឆ្នាំ ២០២០ ដល់ត្រីមាសទី១ ឆ្នាំ ២០២១៕LA