ភ្នំពេញៈ អាជ្ញាធរកម្ពុជាជាថ្មីម្តងទៀតបានព្រមានចាត់វិធានការតាមផ្លូវច្បាប់ប្រឆាំងនឹងការផ្សព្វផ្សាយពីប្រតិបត្តិការ ជួញដូរ និងពាណិជ្ជកម្មកាសអេឡិចត្រូនិក (Cryptocurrencies)។ នេះបើតាមសេចក្តីប្រកាសកាលពីថ្ងៃម្សិលមិញ។
សេចក្តីប្រកាសរួមរវាងស្ថាប័ន ៣ ដែលមានធនាគារជាតិនៃកម្ពុជា (NBC) គណៈកម្មការមូលបត្រកម្ពុជា (SECC) និងអគ្គស្នងការដ្ឋាននគរបាលជាតិបានឲ្យដឹងថា ការឃោសនាផ្សព្វផ្សាយ កៀរគរប្រមូលមូលនិធិ ធ្វើប្រតិបត្តិការ ទិញ លក់ ជួញដូរ ទូទាត់កាសអេឡិចត្រូនិក ដោយមិនមានអាជ្ញាប័ណ្ណពីអាជ្ញាធរមានសមត្ថកិច្ចនឹងត្រូវផ្តន្ទាទោសតាមផ្លូវច្បាប់ជាធរមាន។
សេចក្តីប្រកាសនេះបានបញ្ជាក់ថាការធ្វើសកម្មភាពពាណិជ្ជកម្មកាសអេឡិចត្រូនិក គឺជាសកម្មភាពខុសច្បាប់ និងអំពាវនាវឲ្យសាធារណជនប្រុងប្រយ័ត្នចំពោះសកម្មភាពនេះ។
តាមសេចក្តីប្រកាសរួមបច្ចុប្បន្នមានការផ្សព្វផ្សាយពីការទិញ លក់ ជួញដូរ ទូទាត់កាសអេឡិចត្រូនិក ដូចជា KH Coin, Suncoin, K Coin, One-coin និង Forex coin នៅកម្ពុជាដែលមិនមានការគ្រប់គ្រងពីអាជ្ញាធរនឹងបង្កហានិភ័យធ្ងន់ធ្ងរដល់សាធារណជន និងសង្គម។
ខណៈសាទរចំពោះវិធានការ អាជ្ញាធរ លោក អ៊ិន មាន សហស្ថាបនិកគម្រោងកាសអេឡិចត្រូនិក KH Coin បង្ហាញពីការខកចិត្តនៅពេលឃើញឈ្មោះគម្រោងរបស់លោកស្ថិតក្នុងបញ្ជីហាមឃាត់។ លោកថ្លែងថា៖ «KH Coin របស់យើងមិនដែលបានទៅបោកប្រាស់អ្នកណាម្នាក់ទេ។ វាមិនមែនជាប្រភេទវិនិយោគដែលត្រូវចាញ់បោកលុយទេ»។ លោកបានបន្ថែមថា៖ «រយៈពេល ៣ ឆ្នាំហើយដែលយើងធ្វើការងារនេះ។ យើងខំជួយដើរបង្រៀនណែនាំបងប្អូនយើងកុំឲ្យចាញ់បោកគេ»។
លោកបានថ្លែងថាគម្រោងរបស់លោកត្រូវបានបង្កើតឡើងក្នុងគោលបំណងអប់រំវិនិយោគិន និងសាធារណជនឲ្យយល់ដឹងរវាងគម្រោងកាសអេឡិចត្រូនិកបោកប្រាស់ និងគម្រោងពិតប្រាកដដើម្បីចៀសវាងការខាតបង់ដោយសារការវិនិយោគ។
បើទោះបីជាមានការព្រមានច្រើនលើកច្រើនសាពីការជួញដូររូបិយប័ណ្ណនេះក្នុងទីផ្សារកម្ពុជាក៏ដោយ ក៏កន្លងមកមានជនជាតិចិនមួយក្រុមបានមកផ្សព្វផ្សាយពីគម្រោងជួញដូររូបិយប័ណ្ណអេឡិចត្រូនិកនៅកម្ពុជាដោយមានការចូលរួមជាអធិបតីពីលោកស្រី ឧបនាយករដ្ឋមន្ត្រី ម៉ែន សំអន ផងដែរ៕ LA