The Phnom Penh Post Search

Search form




Logo of Phnom Penh Post newspaper Phnom Penh Post - ស្ពាន​ជ្រោយចង្វារ ២ នឹង​បើក​ឲ្យ​ដំណើរការ​ចុង​ឆ្នាំ

ស្ពាន​ជ្រោយចង្វារ ២ នឹង​បើក​ឲ្យ​ដំណើរការ​ចុង​ឆ្នាំ

ស្ពាន​ជ្រោយចង្វារ ២ នឹង​បើក​ឲ្យ​ដំណើរការ​ចុង​ឆ្នាំ

20140410_11
ដំណើរការសាងសង់ស្ពានជ្រោយចង្វារទី២ ដែលជាកម្ចីពីប្រទេសចិន ស្ពាននេះនឹងដាក់ឲ្យប្រើប្រាស់នៅចុងឆ្នាំនេះ ហុង មិនា

ភ្នំពេញៈ មន្រ្តី​ជាន់​ខ្ពស់​ក្រសួង សាធារណការ និង​ដឹក​ជញ្ជូន​បាន​ឲ្យ​ដឹង​ថា ស្ពាន ជ្រោយចង្វារ ថ្មី​ដែល​ទទួល​បាន​កម្ចី​ពី ចិន នឹង​ត្រូវ​ដាក់​ឲ្យ​ដំណើរការ​នៅ ខែ​ធ្នូ ឆ្នាំ​២០១៤ គឺ​រយៈ​ពេល​បី​ខែ​បន្ទាប់​ពី​បញ្ចប់​ការ​សាងសង់​នៅ ខែ​កញ្ញា។

ស្ពាន​ដែល​ស្រប​គ្នា​ជាមួយ​នឹង​ស្ពាន់​មិត្តភាព កម្ពុជា ជប៉ុន (ស្ពាន​ជ្រោយចង្វារ​ចាស់) ត្រូវ​បាន​ចាប់​ផ្តើម​ដំណើរការ​សាងសង់​នៅ​ចុង ឆ្នាំ​២០១១។

លោក ត្រាំ អ៊ីវតឹក រដ្ឋ​មន្រ្តី​ក្រសួង សាធារណការ និង​ដឹក​ជញ្ជូន​បាន​ឲ្យ​ដឹង​នៅ​ក្នុង​ពិធី​ចាក់​បេតុង​ត​ភ្ជាប់​ធ្នឹម​ប្រអប់​ស្ពាន​កាល​ពី​ថ្ងៃ​ម្សិលមិញ​ថា៖ «[ស្ពាន​នេះ] គ្រោង​បញ្ចប់​ជា​ស្ថាពរ​នៅ ខែ​កញ្ញា ឆ្នាំ​២០១៤ គឺ​នឹង​ត្រូវ​បញ្ចប់​រួម​គ្នា​ជាមួយ​ការ​សាង​សង់​កំណាត់​ផ្លូវ​តភ្ជាប់​ក្បាល​ស្ពាន​ទាំង​សង​ខាង​ប្រវែង ៥១៩ ម៉ែត្រ»។

ស្ពាន ជ្រោយចង្វារ ថ្មី​នេះ​មាន​ប្រវែង ១ ២៦០ ម៉ែត្រ ត្រូវ​សាងសង់​ឡើង​ដោយ​ចំណាយ​ទឹក​ប្រាក់​ប្រមាណ ២៧,៥ លាន​ដុល្លារ​ក្រោម​ថវិកា​កម្ចី​សម្បទាន​ពី​រដ្ឋាភិបាល​សាធារណរដ្ឋ​ប្រជាមានិត ចិន និង​ថវិកា​បដិភាគ​របស់​រដ្ឋាភិបាល។ ស្ពាន ជ្រោយចង្វារ ថ្មី​នេះ​ធ្វើ​ឡើង​ក្នុង​គោល​បំណង​កាត់​បន្ថយ​ការ​កកស្ទះ​ចរាចរណ៍​នៅ​ក្នុង​ទីក្រុង។

លោក​បន្ត​ថា៖ «ស្ពាន​នេះ ពី​មុន​ពេល​បុណ្យ​ទាន ឃើញ​ថា កក​ស្ទះ​សម្បើម​ណាស់។ ប្រជាជន​ចេញ​ទៅ​ភ្ជុំ អុំទូក​ឬ​ក៏​ពេល​ចូល​ឆ្នាំ​ជាដើម។ វា​ចាំបាច់​ណាស់​ដែល​យើង​ត្រូវ​ពង្រីក​ស្ពាន។ ពេល​វេលា​ឥឡូវ​ដែល​ត្រូវ​គិត​ពី​បញ្ហា​នេះ»។ លោក​ក៏​បាន​ឲ្យ​ដឹង​ដែរ​ថា រង្វង់​មូល​ថ្មី​មួយ​នៅ​ត្រើយ​ខាង​កើត​នឹង​ត្រូវ​សាង​សង់​បន្ថែម ហើយ​ក៏​នឹង​មាន​ការ​កែ​សម្រួល​រង្វង់​មូល​ដែល​មាន​ស្រាប់​នៅ​ត្រើយ​ខាង​លិច​ឲ្យ​ធំ​ទូលាយ​ដើម្បី​កាត់​បន្ថយ​ការ​កក​ស្ទះ​ផង​ដែរ។

ការ​បន្ថែម​ហេដ្ឋា​រចនា​សម្ព័ន្ធ​ថ្មី​នៅ​តំបន់​នេះ​បាន​និង​កំពុង​កែប្រែ​មុខ​មាត់​ថ្មី​ដល់​សេដ្ឋកិច្ច​ប្រជាជន​នៅ​តំបន់​នោះ។ ក្រៅ​ពី​សម្រួល​ចរាចរណ៍​ស្ពាន​នេះ​ក៏​កំពុង​ទាក់ទាញ​ការ​វិនិយោគ​លើ​ផ្ទះ និង​អចនល​ទ្រព្យ​នៅ​តំបន់ ជ្រោយចង្វារ ផង​ដែរ។

លោក តេង រិទ្ធី ប្រធាន​គ្រប់​គ្រង​ទូទៅ​នៃ​គម្រោង បុរី រីវើរ ថោន និយាយ​ថា ការ​ដាក់​ឲ្យ​ដំណើរការ​ស្ពាន​ថ្មី​នេះ​នឹង​បន្ថែម​ភាព​ទាក់ទាញ​ការ​វិនិយោគ​លើ​ផ្ទះ​និង​អចលន​ទ្រព្យ​នៅ​តំបន់ ជ្រោយចង្វារ ខណៈ​ស្ថានភាព​សេដ្ឋកិច្ច​នៅ​តំបន់​នេះ​កំពុង​រីក​ចម្រើន​គួរ​ឲ្យ​កត់​សម្គាល់។

លោក​បាន​ថ្លែង​ថា៖ «ឥឡូវ​នេះ​មាន​អតិថិជន​កាន់​តែ​ច្រើន​ដែល​ចាប់​អារម្មណ៍​ទិញ​ផ្ទះ​នៅ​តំបន់​នេះ»។

លោក​ឲ្យ​ដឹង​ថា ៨០ ភាគរយ​នៃ​ផ្ទះ​ក្នុង​គម្រោង​របស់​លោក​ត្រូវ​បាន​លក់​ចេញ​រួច​ទៅ​ហើយ​ចាប់​តាំង​ពី​ពេល​ដែល​ដំណើរការ​សាងសង់​កាល​ពី​ដើម ឆ្នាំ​២០១៣។ លោក​បន្ត​ថា៖ «តម្លៃ​ផ្ទះ និង​តម្លៃ​ដី​នៅ​តំបន់​នេះ​គឺ​កើន​រាល់​ថ្ងៃ»។

លោក​បន្ត​ថា តម្លៃ​ដី​ដែល​នៅ​ក្បែរ​គម្រោង​សាងសង់​នេះ​មាន​តម្លៃ​ចាប់​ពី ៣០០ ដុល្លារ​ទៅ ១ ០០០ ដុល្លារ​ក្នុង ១ ម៉ែត្រ​ការ៉េ​ទៅ​តាម​តំបន់។

លោក ច្រឹក សុខនីម អនុ​ប្រធាន​ក្រុមហ៊ុន​អចលន​ទ្រព្យ VTRUST ក៏​បាន​និយាយ​ដែរ​ថា តម្លៃ​ដី​នៅ​តំបន់ ជ្រោយចង្វារ ក្នុង​ឆ្នាំ​នេះ​កើន​ក្នុង​ចន្លោះ ១០ ភាគរយ​ធៀប ឆ្នាំ​២០១៣។ លោក​ថ្លែង​ថា៖ «ពេល​ណា​មាន​ស្ពាន គឺ​តម្លៃ​ដី​និង​អចលន​ទ្រព្យ​ឡើង​ស្វ័យប្រវត្តិ​តែ​ម្តង។ ឥឡូវ​យើង​មាន​ស្ពាន។ យើង​ឃើញ​កំណើន​សេដ្ឋកិច្ច»។

លោក​បាន​បន្ថែម​ថា តម្លៃ និង​តម្រូវការ​ដីធ្លី និង​អចលន​ទ្រព្យ​នៅ​តំបន់​នេះ​នឹង​បន្ត​កើន​ឡើង​ទៀត​ពេល​ដែល​គម្រោង​អភិវឌ្ឍន៍​ទីក្រុង​រណប​ធំៗ ដូចជា​គម្រោង​ទីក្រុង​រណប លី យ៉ុងផាត់ និង កាណាឌីយ៉ា ស៊ីធី ជាដើម លេច​ចេញ​ជា​រូបរាង​ឡើង។

កាសែត ភ្នំពេញ ប៉ុស្តិ៍ កាល​ពី ខែ​សីហា ឆ្នាំ​២០១១ បាន​រាយការណ៍​ថា ប្រជា​ពលរដ្ឋ​ចំនួន ២៣០ គ្រួសារ​បាន​រង​ប៉ះពាល់​ដោយសារ​គម្រោង​សាង​សង់​ស្ពាន ជ្រោយចង្វារ ថ្មី​នេះ ហើយ​មាន​តែ ៧ គ្រួសារ​ក្នុង​ចំណោម​នោះ​ដែល​ប៉ះពាល់​នៅ​នឹង​កន្លែង​ហើយ​បាន​ព្រម​ទទួល​យក​សំណង​ទឹក​ប្រាក់ ៥ ០០០ ដុល្លារ​ជា​ថ្នូរ​នឹង​ការ​រើ​ទីតាំង។

លោក ពេជ សារឿន ចៅ​សង្កាត់ ជ្រោយចង្វារ ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា បញ្ហា​ជម្លៀស​ប្រជា​ពលរដ្ឋ​ត្រូវ​បាន​ដោះស្រាយ​រួច​រាល់​ជា​យូរ​ណាស់​មក​ហើយ។

លោក​បន្ត​ថា៖ «រឿង​នេះ​បាន​ដោះស្រាយ​រួច​ហើយ។ ទាំង​អ្នក​ប៉ះពាល់​រឿង​ដី​ហ្នឹង និង​អ្នក​ដែល​ប៉ះពាល់​ដោយ​ការ​ពង្រីក​ផ្លូវ​ហ្នឹង។ អ្នក​ដែល​សល់​ដី​ក៏​រស់​នៅ​កន្លែង​ទៅ​អ្នក​ដែល​មិន​សល់​ដី​ត្រូវ​ប្តូរ​ទីតាំង​។ អន្តរ​ក្រសួង​គេ​ចុះ​មក​វាស់​វែង​និង​វាយតម្លៃ​ដី​ដើម្បី​ផ្តល់​សំណង​សមស្រប»៕

អត្ថបទគួរចាប់អារម្មណ៍