.jpg)
ប្រធានាធិបតិថ្មីរបស់ស្រីលង្កាថ្លែងសុន្ទរកថាបន្ទាប់ពីស្បថចូលកាន់តំណែង។ AFP
ក្រុងកូឡុំបូៈ ប្រទេស ស្រីលង្កា កាលពីថ្ងៃពុធបានកាត់បន្ថយពន្ធជិតពាក់កណ្តាលក្នុងគោលបំណងជំរុញសេដ្ឋកិច្ចដែលនៅតែជួបការលំបាក បន្ទាប់ពីកើតមានករណីបំផ្ទុះគ្រាប់បែកនៅថ្ងៃបុណ្យ Easter Sunday ដែលបានបង្កឲ្យមានស្លាប់យ៉ាងច្រើន និងធ្វើឲ្យប៉ះពាល់ដល់វិស័យទេសចរណ៍របស់ប្រទេសនេះ។
កំណើនសេដ្ឋកិច្ចរបស់ស្រីលង្កាបានថមថយមកនៅត្រឹម ១,៦ ភាគរយ នៅត្រីមាសទី ២ ឆ្នាំនេះបន្ទាប់ពីមានករណីបំផ្ទុះគ្រាប់បែកដែលបានសម្លាប់មនុស្ស ២៦៩ នាក់នេះ។
លោក Gotabaya Rajapaksa ប្រធានាធិបតីថ្មីរបស់ស្រីលង្កាបានប្តេជ្ញាថានឹងលើកស្ទួយកំណើនសេដ្ឋកិច្ចមកវិញតាមរយៈការផ្លាស់ប្តូរពន្ធមុនពេលឈ្នះការបោះឆ្នោតភ្លូកទឹកភ្លូកដីនៅខែនេះ។
លោក Bandula Gunawardena អ្នកនាំពាក្យគណៈរដ្ឋមន្ត្រីស្រីលង្កាបានថ្លែងថា ពន្ធលើតម្លៃបន្ថែម (VAT) ១៥ ភាគរយ ត្រូវបានកាត់បន្ថយមកនៅត្រឹម ៨ ភាគរយ ដោយចូលជាធរមានភ្លាមៗ ខណៈដែលពន្ធមួយផ្សេងទៀតគឺពន្ធលើទំនិញ និងសេវាកម្ម ២ ភាគរយ នឹងត្រូវបានលុបចោលទាំងស្រុង។
ឧស្សាហកម្មសាងសង់ដែលបានធ្លាក់ចុះខ្លាំងនៅឆ្នាំនេះ ក៏នឹងមើលឃើញការកាត់បន្ថយបន្ទុកពន្ធសាជីវកម្មផងដែរពី ២៨ ភាគរយ មកនៅត្រឹម ១៤ ភាគរយ។
លោក Gunawardena បានអះអាងថា វិធានការទាំអស់នេះនឹងមិនប៉ះពាល់ដល់ថវិកាជាតិឡើយ។
លោកមានប្រសាសន៍ថា៖ «យើងរំពឹងថា បរិមាណប្រាក់ចំណូលនឹងកើនឡើងនៅពេលដែលបន្ទុកពន្ធរួមកាន់តែតូច។ មានការអនុវត្តកាន់តែប្រសើរជាងមុន»។
រដ្ឋាភិបាលរបស់ប្រទេស ស្រីលង្កា បានឲ្យដឹងថា វិធានការទាំងនេះត្រូវបានព្យាករថានឹងលើកកម្ពស់សកម្មភាពសេដ្ឋកិច្ចនៅត្រឹមខែមេសា ឆ្នាំក្រោយជាពេលដែលមានការបោះឆ្នោតសភា៕ KC
