នៅ​ក្នុង ឆ្នាំ​១៩៦២ ក្នុង​ត្រកូល​គ្រួសារ​កសិករ លោក​ស្រី កែ សុវណ្ណរតន៍ ជា​កូន ទី៨ ក្នុង​ចំណោម​បង​ប្អូន ៩ នាក់​បាន​និទាន​ពី​ដំណើរ​ជីវិត​ថា ទម្រាំ​មាន​ជីវិត​ដូច​ពេល​នេះ លោក​ស្រី​ឆ្លង​កាត់​ការ​លំបាក​ជាច្រើន។ លោក​ស្រី​ថា៖ «ខ្ញុំ​ដឹង​ថា ឪពុក​ម្តាយ​ខ្ញុំ​ធ្លាប់​ជា​អ្នក​មាន​ជីវភាព​ធូរធារ​តែ​នៅ​ពេល​ដែល​ខ្ញុំ​កើត​មក ហើយ​បាន​ដឹង​ក្តី​បន្តិច​នោះ ខ្ញុំ​ឃើញ​ឪពុក​ម្តាយ​ខ្ញុំ​ក្រ។ គ្រួសារ​យើង​មាន​ជីវភាព​មិន​ធូរធារ​ឡើយ​ដោយ​សារ​ខ្ញុំ​មាន​បង​ប្អូន​ច្រើន ដូច្នេះ​កូន​ម្នាក់ៗ​ត្រូវ​មាន​ចំណែក​ទទួល​បន្ទុក​ជួយ​គ្រួសារ​តាម​ដែល​អាច​ធ្វើ​ទៅ​បាន»។