The Phnom Penh Post Search

Search form




Logo of Phnom Penh Post newspaper Phnom Penh Post - ស្លាក​សញ្ញា​ផលិតផល​ក្នុង​ស្រុក​ចាប់​ផ្តើម​មាន​ការ​គាំទ្រ

ស្លាក​សញ្ញា​ផលិតផល​ក្នុង​ស្រុក​ចាប់​ផ្តើម​មាន​ការ​គាំទ្រ

ស្លាក​សញ្ញា​ផលិតផល​ក្នុង​ស្រុក​ចាប់​ផ្តើម​មាន​ការ​គាំទ្រ

20140402_13
តែទឹកដោះគោ នស២រ ដែលកំពុងពេញនិយម ម៉ៃ វីរៈ

ភ្នំពេញ: ភេសជ្ជៈ​តែ​បៃតង​ទឹក​ដោះគោ​និង​កាហ្វេ​កំពុង​ទទួល​បាន​ការ​ពេញ​និយម​ខ្លាំង​ក្នុង​ចំណោម​ប្រជាជន​កម្ពុជា។ យើង​សង្កេត​ឃើញ​មាន​ស្លាក​សញ្ញា (Brand) លំដាប់​អន្តរជាតិ​ហូរ​ចូល​មក កម្ពុជា ច្រើន​ក្នុង​រយៈ​ពេល ២​ឆ្នាំ ចុង​ក្រោយ​នេះ ដែល​មាន​ដូចជា Cha Time Gong Cha Coffee Bean និង Costa Coffee ជាដើម។

អ្នក​ដែល​នៅ​ក្នុង​វិស័យ​ភេសជ្ជៈ​និង​ម្ហួប​អាហារ​នេះ​និយាយ​ថា សហគ្រិន​ក្នុង​ស្រុក​គួរ​តែ​យក​ចិត្ត​ទុក​ដាក់​លើ​ការ​កសាង​ស្លាក​សញ្ញា​អាជីវកម្ម​របស់​ខ្លួន​ដើម្បី​ឈរ​ជើង​ក្នុង​ទីផ្សារ​និង​ទទួល​បាន​ការ​ទទួល​ស្គាល់​ខណៈ​ការ​ប្រកួត​ប្រជែង​ពីស្លាក​សញ្ញា​របស់​ហាង​ភេសជ្ជៈ​តែ​ទឹក​ដោះ​គោ និង​កាហ្វេ​ក្រៅ​ស្រុក​កាន់​តែ​មាន​ច្រើន។

លោក ម៉ម ចាន់​រតនៈ ម្ចាស់​ហាង​ភេសជ្ជៈ​តែ​ទឹក​ដោះ​គោ​បៃតង នស២រ និយាយ​ថា ការ​យក​ចិត្ត​ទុក​ដាក់​ក្នុង​ការ​កសាង​ស្លាក​សញ្ញា​បាន​ធ្វើ​ឲ្យ​ហាង​របស់​លោក​ទទួល​បាន​ជោគជ័យ​ដូច​សព្វ​ថ្ងៃ​នេះ។ ទើប​តែ​ដំណើរការ​បាន​រយៈ​ពេល​ជាង ៣​ឆ្នាំ នស២រ បាន​ពង្រីក​ខ្លួន​រហូត​ដល់ ៨ ទីតាំង​ហើយ​បាន​លក់​ស្លាក​សញ្ញា​របស់​ខ្លួន​ឲ្យ​ទៅ​ដៃគូ​ដែល​ចាប់​អារម្មណ៍​គំរូ​អាជីវកម្ម​របស់​លោក។

លោក​ថ្លែង​ថា៖ «ពេល​បើក​ដំបូងៗ​មាន​គេ​ចាប់​អារម្មណ៍​ទាក់​ទង​សុំ​យក​ទៅ​លក់​បន្ត​ឬ​រៀន​ធ្វើ​តាម​ជាដើម ខ្ញុំ​ថា​ទេ ព្រោះ​ពេល​នោះ​ការ​គ្រប់​គ្រង​យើង​នៅ មិន​ទាន់​រឹង​មាំ។ តែ​ពេល​នេះ យើង​បាន​លក់​ស្លាក​សញ្ញា​ឲ្យ​ដៃ​គូ​ចំនួន ៣​នាក់ ហើយ ហើយ​មាន​ហាង ៤ ទៀត​ដែល​យក​ផលិតផល​យើង​ទៅ​លក់​បន្ត»។

លោក​ថា ស្លាក​សញ្ញា​ធ្វើ​ឲ្យ​អតិថិជន​ទុក​ចិត្ត​ចំពោះ​ផលិតផល​ហើយ​ក៏​ផ្តល់​តម្លៃ​បន្ថែម​ដល់​ផលិតផល​ដែរ។ លោក​ថ្លែង​ថា៖ «អ្វី​ដែល​សំខាន់​គឺ​យើង​មាន​ផលិតផល​ល្អ​និង​មាន​គុណភាព។ ស្លាក​សញ្ញា​ជួយ​ឲ្យ​អតិថិជន​ចំណាំ​ពី​គុណភាព​ផលិតផល​ហើយ​អ្នក​ផ្សេង​មិន​អាច​បន្លំ​បាន​ទាំង​គុណភាព​និង​រសជាតិ»។

លោក​បន្ថែម​ថា៖ «ការ​ដែល​របស់​យើង​មាន​ស្លាក​សញ្ញា​អតិថិជន​គាត់​ស្គាល់​គាត់​ចង​ចាំ​ឈ្មោះ​យើង​គ្រប់​ពេល ធ្វើ​ឲ្យ​អាជីវកម្ម​យើង​អាច​ស្ថិត​ស្ថេរ​ជាង​អាជីវកម្ម​ដែល​អត់​ស្លាក​សញ្ញា»។

លោក​បន្ត​ឲ្យ​ដឹង​ថា សហគ្រិន​ភាគ​ច្រើន​មិន​ទាន់​បាន​យល់​ដឹង​ពី​សារៈ​សំខាន់​នៃ​ការ​កសាង ស្លាក​សញ្ញា​ផលិតផល​របស់​ខ្លួន​នៅ​ឡើយ​ទេ​ហើយ​អ្នក​ទាំង​នោះ​ប្រឈម​នឹង​ហានិភ័យ​នៃ​ការ​ដួល​រលំ​នៅ​ពេល​ដែល​អាជីវកម្ម ស្រដៀង​គាត់​ដែល​ស្លាក​សញ្ញា​ទទួល​ស្គាល់​ជា​អន្តរជាតិ​ចូល​មក​ទីផ្សារ​កាន់​តែ​ច្រើន។

ចំណែក លោក ចាន់ ស៊ី នាយក​គ្រប់​គ្រង​ទូទៅ​នៃ​ក្រុមហ៊ុន​ម្ហូប​អាហារ​និង​ភេសជ្ជៈ​ផាក កាហ្វេ​ដែល​បាន​ដំណើរការ​រយៈ​ពេល ១០​ឆ្នាំ មក​ហើយ​នោះ​ក៏​បាន​និយាយ​ដែរ​ថា ការ​កសាង​ស្លាក​សញ្ញា​ទាមទារ​ពេល​វេលា​ដើម​ទុន និង​ធនធាន​មនុស្ស ដែល​សហគ្រិន​ភាគ​ច្រើន​នៅ​មើល​រំលង តែ​ផាក​កាហ្វេ​បាន​គិត​ដល់​ចំណុច​នេះ​ចាប់​តាំង​ពី​ដំណើរការ​ដំបូង​ក្នុង ឆ្នាំ​២០០៤។

លោក​ថា អាជីវកម្ម​ដែល​មិន​បាន​យក​ចិត្ត​ទុក​ដាក់​ចំពោះ​ស្លាក​សញ្ញា​មាន​ទំនោរ​ទៅ​រក​ការ​បិទ​ទ្វារ​ព្រោះ​នេះ​បង្ហាញ​ថា អ្នក​គ្រប់​គ្រង​គំរូ​អាជីវកម្ម​បែប​នេះ​មិន​មាន​គម្រោង​វែង​ឆ្ងាយ​សម្រាប់​អាជីវកម្ម​របស់​ខ្លួន​ឡើយ។

លោក​និយាយ​ថា៖ «ការ​ទិញ​ស្លាក​សញ្ញា​ធ្វើ​ឲ្យ​អ្នក​វិនិយោគ​ដែល​មាន​ទុន​តិច​អាច​ប្រកប​អាជីវកម្ម​បាន។ គាត់​អាច​រក​ចំណូល​បាន​ភ្លាម​ដោយ​ប្រើ​ស្លាក​សញ្ញា​ដែល​ល្បី​ស្រាប់។ យើង​ទទួល​បាន​សំណើ​ទិញ​ស្លាក​សញ្ញា​ពី​យើង​ច្រើន​តែ​រហូត​មក​ទល់​ពេល​នេះ​យើង​ទើប​តែ​យល់​ព្រម​ឲ្យ​ហាង​មួយ​លើក​ស្លាក​សញ្ញា​របស់​យើង​ប៉ុណ្ណោះ»។

លោក ជី សីលា ម្ចាស់​ហាង​កាហ្វេ T&C ជា​ហាង​កាហ្វេ​ទំនើប​ដែល​មាន​វត្តមាន​មុន​គេ​នៅ ទីក្រុង​ភ្នំពេញ បាន​បញ្ជាក់​ថា កេរ្តិ៍​ឈ្មោះ​ស្លាក​សញ្ញា T&C បាន​ធ្វើ​ឲ្យ​ហាង​កាហ្វេ​ដែល​ដំណើរការ​តាំង​ពី ឆ្នាំ​២០០៣ អាច​ឈរ​ឈ្មោះ​នៅ​ក្នុង​ទីផ្សារ​បាន​រហូត​មក​ដល់​ពេល​នេះ​ខណៈ​ដែល​កាហ្វេ​កំពុង​រីក​ដូច​ផ្សិត​នៅ​ក្នុង​ទីក្រុង។

លោក​ថា៖ «ពេល​ណា​គេ​នឹក​ដល់​ម្ហូប​អាស៊ី និង​បរិយាកាស​បែប​អ្នក​ជំនួញ​គេ​នឹក​ដល់ T&C។ យើង​ផ្តល់​អ្វី​ដែល​អតិថិជន​ត្រូវ​ការ ដូច្នេះ យើង​មិន​បារម្ភ​ពី​ការ​ប្រកួត​ប្រជែង​នោះ​ទេ។ បច្ចុប្បន្ន T&C មាន ៤ សាខា​នៅ​តែ​បន្ត​កើន​ឡើង»។

ពាក់ព័ន្ធ​នឹង​និន្នាការ​សហគ្រិនភាព លោក ឱម សេងបូរ៉ា នាយក​ប្រតិបត្តិ​នៃ​គម្រោង​ករុណា​បាន​ឲ្យ​ដឹង​ថា ការ​កសាង​ស្លាក​សញ្ញា​នា​ពេល​នេះ​គឺជា​ចំណុច​ចាប់​ផ្តើម​ដ៏​ល្អ​មួយ​សម្រាប់​សហគ្រិន​កម្ពុជា។ លោក​ថ្លែង​ថា៖ «គាត់​មាន​ស្លាក​សញ្ញា​របស់​ខ្លួន​ហើយ​គាត់​អាច​លក់​បាន​ទៀត​នោះ​គឺជា​រឿង​ល្អ។ ការ​ចាប់​ផ្តើម​គិត​ដល់​ការ​លក់​ស្លាក​សញ្ញា​របស់​សហគ្រិន​យើង គឺ​ជា​ចំណុច​ចាប់​ផ្តើម​មួយ​ដើម្បី​ត្រៀម​ខ្លួន​ប្រជែង​ជាមួយ​ស្លាក​សញ្ញា​អន្តរជាតិ​ចូល​ក្នុង​ទីផ្សារ​កាន់​តែ​ច្រើន​ពេល​សមាហរណកម្ម​សេដ្ឋកិច្ច​អាស៊ាន»។

លោក​បន្ថែម​ថា ការ​ទិញ​ស្លាក​សញ្ញា​ដែល​មាន​ការ​ទទួល​ស្គាល់​ស្រាប់​កាត់​បន្ថយ​ហានិភ័យ​នៅ​ពេល​ដែល​អាជីវកម្ម​ចាប់​ផ្តើម​ដំបូង។ លោក​បាន​ក្រើន​រំឭក​ដល់​សហគ្រិន​ក្នុង​ស្រុក​ដូច្នេះ​ថា៖ «មិន​ថា​គាត់ ទិញ​ដាក់​ស្លាក​សញ្ញា​ពី​ក្នុង​ស្រុក​ឬ​ក្រៅ​ស្រុក​នោះ​ទេ។ គាត់​គួរ​ពង្រឹង​សមត្ថភាព​ដឹក​នាំ​និង​គ្រប់​គ្រង​ព្រម​ទាំង​បន្ត​អភិវឌ្ឍ​សមត្ថភាព​បុគ្គលិក​ផង​ដែរ​ដើម្បី​បាន​ជោគជ័យ»៕

អត្ថបទគួរចាប់អារម្មណ៍