ភ្នំពេញៈ ប្រាក់ចំណេញសុទ្ធរបស់គ្រឹះស្ថានមីក្រូហិរញ្ញវត្ថុ ហត្ថាកសិករ ដែលចុះបញ្ជីបោះលក់មូលបត្របំណុលនៅផ្សារមូលបត្រកម្ពុជា (CSX) បានបង្ហាញពីកំណើន ៤៩,២៨ ភាគរយ នៅក្នុងត្រីមាសទី១ ឆ្នាំ ២០១៩។ នេះបើយោងតាមរបាយការណ៍ហិរញ្ញវត្ថុដែលបានចេញផ្សាយនៅលើផ្សារហ៊ុនកម្ពុជា។
នេះជាការបង្ហាញរបាយការណ៍ជាសាធារណៈលើកដំបូងរបស់ហត្ថាកសិករចាប់តាំងពីក្រុមហ៊ុននេះបានឡើងផ្សារហ៊ុនកាលពីចុងឆ្នាំ ២០១៨។
របាយការណ៍បង្ហាញថា ហត្ថាកសិករទទួលបានប្រាក់ចំណេញសុទ្ធជាង ៦ លានដុល្លារនៅត្រីមាសទី១ ឆ្នាំ ២០១៩ កើនពីជាង ៤ លានដុល្លារ បើធៀបទៅនឹងរយៈពេលដូចគ្នាកាលពីឆ្នាំ ២០១៨។
លោក ហ៊ឹម វិបុល អគ្គនាយកហិរញ្ញវត្ថុរបស់ហត្ថាកសិករ បានប្រាប់ភ្នំពេញប៉ុស្តិ៍កាលពីម្សិលមិញថា ប្រាក់ចំណេញសុទ្ធកើនឡើងដោយសារកម្ចីរបស់អតិថិជនកើនឡើង និងប្រាក់បញ្ញើសន្សំក៏កើនឡើង។ លោកបញ្ជាក់ថា៖ «និយាយរួមកម្ចីកើនឡើង ប្រាក់សន្សំក៏កើនឡើងដោយអតិថិជនជឿជាក់នេះជាកត្តានំាឲ្យប្រាក់ចំណេញសុទ្ធកើនឡើង»។
របាយការណ៍បង្ហាញថា ប្រាក់ចំណេញមុនបង់ពន្ធក៏កើនឡើងប្រមាណ ៥២,៨០ ភាគរយ ដល់ ៧,៧ លានដុល្លារ នៅត្រីមាសទី១ ឆ្នាំនេះ កើនពី ៥ លានដុល្លារ បើធៀបរយៈពេលដូចគ្នាឆ្នាំ ២០១៨។
ទ្រព្យសកម្មសរុបបានកើនពី ៩២៥ លានដុល្លារ គិតត្រឹមថ្ងៃទី ៣១ ធ្នូ ឆ្នាំ ២០១៨ ដល់ ៩៨៦ លានដុល្លារ គិតត្រឹមថ្ងៃទី ៣១ ខែ មីនា ឆ្នាំ ២០១៩។
ហត្ថាកសិករជាគ្រឹះស្ថានមីក្រូហិរញ្ញវត្ថុដំបូងនៅកម្ពុជាដែលបានបោះលក់មូលបត្របំណុលក្នុងផ្សារហ៊ុនកម្ពុជា៕LA