សិង្ហបុរីៈ ហាងមាសជួបប្រទះនូវការធ្លាក់ចុះអតិថិជនយ៉ាងហោចណាស់ ៣០ ភាគរយក្នុងពេលថ្មីៗនេះ ពេលតម្លៃមាសកើនឡើងខ្ពស់មិនធ្លាប់មាន។
អ្នកលក់គ្រឿងអលង្ការក្នុងហាងឥណ្ឌាមួយបាននិយាយថា ពេលនេះជាចំនួនអតិថិជនទាបបំផុតសម្រាប់ហាងលក់គ្រឿងអលង្ការក្នុង ២៥ ឆ្នាំ។
លោក Ramanathan Palaniappan ប្រធាននៃហាងគ្រឿងអលង្ការ APJ Abiraame បាននិយាយថា «ចំនួនអតិថិជនដើរចូលមើលបានធ្លាក់ច្រើនណាស់ ហើយសូម្បីតែពួកគេដើរចូលមើលហើយ គេទិញមាសតិចតួចឧទាហរណ៍ត្រឹម ៥ ជី»។
លោកបន្ថែមថា៖ «តម្លៃមាសហក់ឡើងខ្ពស់ខ្លាំងណាស់ ដូចនេះអតិថិជនទិញអ្វីដែលគេត្រូវការប៉ុណ្ណោះ សម្រាប់រៀបការ ឬក៏ប្រើប្រាស់តាមតម្រូវការជាក់ស្តែង»។
តម្លៃមាសបានកើនឡើងខ្ពស់ជាលើកដំបូងក្នុងប្រវត្តិសាស្ត្រគិតត្រឹមថ្ងៃទី ៤ សីហាកន្លងទៅ ពេលមានការកើនឡើងកូវីដ១៩ ក្នុងសហរដ្ឋអាមេរិកដែលបំផ្លាញក្តីសង្ឃឹមចំពោះការងើបឡើងវិញផ្នែកសេដ្ឋកិច្ចអាមេរិកដ៏ឆាប់រហ័សនោះ។
តម្លៃមាសខ្ពស់ក្នុងកំណត់ត្រានេះបានជំរុញដោយក្តីព្រួយបារម្ភចំពោះភាពតានតឹងរវាងចិន និងអាមេរិក។
តាំងពីបុរាណរៀងមកមាសត្រូវបានគេចាត់ទុកជាទ្រព្យសម្បត្តិមានសុវត្ថិភាពដោយអ្នកវិនិយោគក្នុងពេលនៃភាពមិនច្បាស់លាស់ និងវិបត្តិដូចជាការរីករាលដាលដែលនៅតែបន្តនេះជាដើម។
ប៉ុន្តែលោក Palaniappan និយាយថា៖ «ក្រុមអ្នកវិនិយោគប្រហែលជាទិញមាសច្រើនជាង ប៉ុន្តែអ្នកដើរផ្សារធម្មតា យល់ថាមាសកំពុងឡើងថ្លៃខ្ពស់។ សម្រាប់យើងជាម្ចាស់អាជីវកម្ម វាជាការប្រឈមផងដែរ ព្រោះតម្លៃមាសកើនឡើងភ្លាមៗ ដែលវាលំបាកក្នុងការធ្វើគម្រោងអាជីវកម្ម។ វាលំបាកក្នុងការប្រាប់ថាតើត្រូវទិញស្តុកប៉ុន្មាន»។
លោក Dheeraj Gottimukkala ប្រធានអភិវឌ្ឍន៍អាជីវកម្មសម្រាប់ហាង the Malabar Gold & Diamonds នៅប្រទេសសិង្ហបុរីបាននិយាយថា ហាងទាំង ២ របស់ខ្លួនទទួលបានអតិថិជនប្រហែលត្រឹមតែ ១ ភាគ ៣ នៃចំនួនធម្មតាពេលមុនកើតមានកូវីដ ១៩។
លោកនិយាយថា៖ «ពិតណាស់ សេដ្ឋកិច្ចមិនដំណើរការល្អទេ ដូចនេះប្រជាជនមិនចេញក្រៅ និងដើរផ្សារនោះទេ ហើយពេលនេះតម្លៃមាសក៏ឡើងខ្ពស់ខ្លាំងទៀត។ អតិថិជនស្ទើរតែ ១០០ ភាគរយ រអ៊ូរទាំថា មាសថ្លៃណាស់»។
លោកបន្ថែម៖ «ពិតណាស់អ្នកដែលមានមាសពេលនេះអាចដើរតួនាទីជាអ្នកកំណត់តម្លៃនៅហាងបញ្ចាំនានា»។ Straitstimes_ANN/RR