ភ្នំពេញៈ ក្រុមហ៊ុន Papa John''s International ដែលមានមូលដ្ឋានដើមនៅសហរដ្ឋអាមេរិកជាក្រុមហ៊ុនបម្រើសេវាកម្មម្ហូបអាហារទាន់ចិត្តបានអះអាងពីការពង្រីកវត្តមានហាងរបស់ខ្លួនរហូតដល់ ១៥ ក្នុងរយៈពេល ៣ ឆ្នាំខាងមុខនៅកម្ពុជា ស្របពេលហាងតំណាងមួយបានបើកដំណើរការនៅភ្នំពេញកាលពីចុងខែមីនាកន្លងទៅនេះ។
អ្នកប្រកបអាជីវកម្មក្នុងស្រុកមិនបារម្ភអំពីការនាំចូលយីហោម៉ាកល្បីៗអន្តរជាតិនោះទេ ផ្ទុយទៅវិញវានឹងជួយទាក់ទាញវិនិយោគិន និងទេសចរណ៍អន្តរជាតិ។
លោក Peter Xu ជាអ្នកនាំចូលយីហោពាណិជ្ជសញ្ញា Papa John''s Cambodia មកប្រទេសកម្ពុជា បានឲ្យដឹងថា៖ «យើងមានក្ដីរីករាយយ៉ាងខ្លាំង ក្នុងការនាំយកយីហោពិភពលោក Papa John''s មកប្រទេសកម្ពុជា។ ក្រុមការងាររបស់ Papa John''s Cambodia មានការពេញចិត្តនំភីហ្សាខ្លាំងណាស់ដោយសារតែគ្រឿងផ្សំដ៏ឆ្ងាញ់របស់យើង»។
លោក Xu លើកឡើងថា៖ «BETTER PIZZA សន្យាថា យើងនឹងផ្ដល់ដល់អ្នកចូលចិត្តនំភីហ្សាក្នុងស្រុកជាមួយនឹងផលិតផលប្រកបដោយគុណភាព និងសេវាឈានមុខគេ»។
លោក Xu គឺជាអ្នកនាំយកយីហោពាណិជ្ជសញ្ញា Papa John''s ប្រកបដោយជោគជ័យដោយមានភោជនីយដ្ឋាននៅទីក្រុងញូវយ៉កមុនពេលការនាំចូលយីហោពាណិជ្ជសញ្ញាអន្តរជាតិមួយនេះ។ លោកមានអាជីវកម្មផ្សេងទៀតរួចហើយ ដែលវិនិយោគនៅក្នុងប្រទេសកម្ពុជា និងចង់នាំយកបទពិសោធដ៏អស្ចារ្យរបស់លោកជាមួយនឹងយីហោ Papa John''s មកប្រទេសកម្ពុជា។
លោក Jack Swaysland ប្រធានផ្នែកប្រតិបត្តិការអន្តរជាតិបានថ្លែងថា៖ «នេះជាពេលវេលាដ៏រីករាយសម្រាប់យីហោ Papa John''s ។ យើងមានក្ដីរីករាយយ៉ាងខ្លាំងក្នុងការផ្ដល់ភីហ្សា និងអាហារដ៏ឆ្ងាញ់របស់យើងដល់អតិថិជនថ្មីនៅក្នុងប្រទេសកម្ពុជា»។
លោក Swaysland លើកឡើង៖ «បន្ទាប់ពីកំណត់ត្រាការលក់ និងកំណើនរយៈពេល ១ ឆ្នាំមក យីហោ Papa John''s មានទីតាំងល្អប្រសើរជាងគេ ក្នុងការបង្កើនល្បឿនការអភិវឌ្ឍអន្តរជាតិដែលជាសសរស្ដម្ភដ៏សំខាន់មួយ សម្រាប់កំណើនរយៈពេលវែងរបស់យីហោនេះ»។
លោក ហេង សេងលី នាយកគ្រប់គ្រងទូទៅនៃក្រុមហ៊ុន ផាកកាហ្វេ អេនបេវើរីច ដែលជាម៉ាកយីហោអាហារក្នុងស្រុកប្រាប់ ភ្នំពេញ ប៉ុស្តិ៍ថា ការនាំយកសិទ្ធិពាណិជ្ជកម្ម (ហ្វេនឆាយ) ម៉ាកយីហោ Papa John''s មកនឹងមិនប៉ះពាល់ដល់ទីផ្សារសម្រាប់ម៉ាកយីហោក្នុងស្រុកនោះទេ ពួកគេមានអតិថិជនរៀងៗខ្លួន។
លោកបញ្ជាក់៖ «ទីផ្សារវានៅតែល្អសម្រាប់ពាណិជ្ជកម្មនៅប្រទេសកម្ពុជា យើងមើលឃើញថា នៅស្រុកខ្មែរម៉ាកយីហោល្បីៗមិនមានច្រើនប៉ុន្មាននោះទេ បើធៀបនឹងប្រទេសថៃ និងវៀតណាម ដូច្នេះយើងមានឱកាសទីផ្សារច្រើន»។
លោក សេងលី ឲ្យដឹងថា វត្តមានរបស់ម៉ាកយីហោនេះនឹងជួយទាក់ទាញការវិនិយោគ និងភ្ញៀវទេសចរណ៍មកកម្ពុជាបន្ទាប់ពីស្ថានភាពជំងឺកូវីដ ១៩ មានភាពធូរស្រាលឡើងវិញ។
បច្ចុប្បន្នយីហោ Papa John''s មាននៅក្នុងប្រទេស និងតំបន់នានាចំនួន ៤៨ ជុំវិញពិភពលោក។ ថ្មីៗនេះយីហោនេះបានចូលទៅក្នុងប្រទេសថ្មីៗចំនួន ១២ រួមមានបារាំង អេស្ប៉ាញ ទុយនីស៊ី អ៊ីរ៉ាក់ ហូឡង់ កាហ្សាក់ស្ថាន ម៉ារ៉ុក កៀហ្ស៊ីស៊ីស្ថាន ប៉ូឡូញ បាហាម៉ា ប៉ាគីស្ថាន និងព័រទុយហ្គាល់៕ LA