.jpg)
កិច្ចប្រជុំរវាងក្រុមប្រឹក្សាអភិវឌ្ឍន៍កម្ពុជា និងគណៈប្រតិភូពាណិជ្ជកម្ម សេដ្ឋកិច្ចហុងកុងកាលពីថ្ងៃទី ១៩ មីនា ឆ្នាំ ២០១៨។ រូបថត ពីCDC
ភ្នំពេញៈ តំណាងក្រុមពាណិជ្ជករហុងកុង ដែលបានធ្វើទស្សនកិច្ចពាណិជ្ជកម្មរយៈពេលពីរថ្ងៃនៅកម្ពុជា បានអះអាង កាលពីព្រឹកមិញថា កម្ពុជា-ហុងកុង គួរផ្តល់អតិភាពក្នុងការពង្រឹងភាពជាដៃគូរវាងអ្នកឯកទេសលើជំនាញដែលមានសក្តានុពលមួយចំនួន បន្ថែមលើការវិនិយោគ និងពាណិជ្ជកម្មដែលកំពុងកើនឡើង។
ថ្លែងប្រាប់ក្រុមអ្នកយកព័ត៌មានក្នុងពិធីជួបជុំស្វែងយល់ពីឱកាសវិនិយោគដែលមានអ្នកចូលរួមកម្ពុជានិងហុងកុងសរុប ៣០០ នាក់ លោក Edward Yau លេខាធិការពាណិជ្ជកម្ម និងវិនិយោគហុងកុងលើកឡើងថា រោងចក្រផលិតកម្មនៅហុងកុងមួយចំនួនកំពុងស្វែងរកទីតាំងវិនិយោគថ្មី ស្របពេលជាមួយគ្នាពាណិជ្ជករវ័យក្មេងដែលមានគំនិតពាណិជ្ជកម្មថ្មីៗមានសក្តានុពលច្រើនក៏កំពុងស្វែងរកឱកាសពង្រីកការវិនិយោគដែរ។
លោកបន្តថា កម្ពុជាគឺជាទីតាំងល្អមួយ ហើយការធ្វើទស្សនកិច្ចពាណិជ្ជកម្មនៅកម្ពុជានាពេលនេះជាឱកាសសម្រាប់ឲ្យមានកិច្ចសហការដើម្បីបង្កើនការធ្វើពាណិជ្ជកម្មហុងកុងនៅកម្ពុជា និងការធ្វើពាណិជ្ជកម្មរវាងប្រទេសទាំងពីរ។
ខណៈទស្សនកិច្ចពាណិជ្ជកម្មបានបញ្ចាប់ទៅដោយមិនមានកិច្ចព្រមព្រៀងពាណិជ្ជកម្ម ឬ វិនិយោគណាមួយ លោក Edward Yau រំពឹងថាដំណើរទស្សនកិច្ចនាពេលនេះប្រៀបបានជាការបើកទ្វាសម្រាប់វិនិយោគិនសក្តានុពលប្រទេសទាំងពីរ ក្នុងការប្រាស្រ័យទាក់ទងគ្នា។
លោកថ្លែងថា៖ «សេដ្ឋកិច្ចកម្ពុជាបន្តកើនឡើងយ៉ាងខ្លាំងដែលយើងឃើញមានគម្រោងហេដ្ឋារចនាសម្ព័ន្ធកាន់តែច្រើនឡើង។ ដូច្នេះហើយ អ្វីដែលកម្ពុជាត្រូវការគឺមិនមែនគ្រាន់តែលំហូរការវិនិយោគ និងពាណិជ្ជកម្មប៉ុណ្ណោះទេ តែគឺត្រូវការជាចាំបាច់នូវសេវាជំនាញឯកទេស។ ហុងកុងមានធនធានមនុស្សជំនាញឯកទេសទាំងនេះ ដូច្នេះភាគីទាំងពីរអាចពង្រឹងការសហការគ្នាលើផ្នែកនេះផងដែរ»។
កាលពីឆ្នាំ ២០១៧ ទំហំពាណិជ្ជកម្មទ្វេភាគី កម្ពុជា-ហុងកុងសម្រេចបាន ១,២ ពាន់លានដុល្លារ ខណៈកម្ពុជាបានទទួលការវិនិយោគហុងកុង ១៣ គម្រោងដោយមានទឹកប្រាក់វិនិយោគសរុប ៨៥ លានដុល្លារ៕
