The Phnom Penh Post Search

Search form




Logo of Phnom Penh Post newspaper Phnom Penh Post - ហុង​កុង​ចង់​​យក​អង្ករ​កម្ពុជា​ជំនួស​ការ​នាំ​ចូល​ពី​ថៃ

ហុង​កុង​ចង់​​យក​អង្ករ​កម្ពុជា​ជំនួស​ការ​នាំ​ចូល​ពី​ថៃ

ហុង​កុង​ចង់​​យក​អង្ករ​កម្ពុជា​ជំនួស​ការ​នាំ​ចូល​ពី​ថៃ

131205_11
កម្មករកំពុងពិនិត្យអង្ករកែច្នៃរួចនៅរោងម៉ាស៊ីនកែច្នៃអង្ករក្នុងស្រុកមួយនាពេលកន្លងមក ផា លីណា

ភ្នំពេញៈ សមាគម​ឈ្មួញ​អង្ករ​ហុងកុង​មាន​បំណង​នាំ​ចូល​អង្ករ​​ផ្កា​ម្លិះ​គុណ​ភាព​ ខ្ពស់​ពី​​កម្ពុជា​ជំនួស​ការ​នាំ​ចូល​ពី​ទីផ្សារ​ប្រទេស​ថៃ។

ការលើក​ឡើង​នេះ​ធ្វើ​ឡើង​នៅ​ក្នុង​ជំនួប​ពិភា​ក្សា​រវាង​ប្រតិភូ​ចំនួន​៣៤ នាក់ មក​ពី​សមាគម​ឈ្មួញ​អង្ករ​ហុង​កុង និង​សម្ព័ន្ធ​អ្នក​ផលិត ​និង​នាំ​ចេញ​អង្ករ​កម្ពុជា​(ARPEC) ក្រោម​ការ​សម្រប​សម្រួល​ដោយ​ ធនា​គារ​អភិវឌ្ឍ​ន៍ជនបទ​នៅ​ភ្នំពេញ​ កាល​ពីម្សិលមិញ។

ការ​ងាក​មក​ចាប់​អារម្មណ៍​អង្ករ​ក្រអូប​​កម្ពុជា​កើត​មាន​បន្ទាប់​ពី ​កម្ពុជា​ទទួល​បាន​ពាន​រង្វាន់​អង្ករ​គុណ​ភាព​​លេខ​១ ​របស់​ពិភព​លោក​​ពីរ​ឆ្នាំ​ជាប់​ៗ​គ្នា។

លោក​ វ៉ាន់ ​ដេវិដ ​អគ្គ​លេខា​ធិការ​រង​សម្ព័ន្ធ​អ្នក​ផលិត ​និង​នាំ​ចេញ​អង្ករ​កម្ពុជា​(​ARPEC) ​បាន​ឲ្យ​ដឹង​ថា នេះ​ជា​លើក​​ទី​មួយ​ហើយ​​ដែល​ប្រតិភូ​ពី​សមាគម​ឈ្មួញ​អង្ករ​ហុងកុង​មក​​​ កម្ពុជា​ក្នុង​បំណង​​សិក្សា​​ស្វែង​យល់​ពី​វិស័យ​អង្ករ​កម្ពុជា​ដើម្បី​នាំ​ ចេញ​ដោយ​ផ្ទាល់​​ទៅ​ហុង​កុង​។

លោក​មាន​ប្រសាសន៍​ថា​៖ «ការ​មក​ដល់ ​របស់​​ប្រតិភូ​ហុង​កុង​លើក​នេះ​គឺ​ដើម្បី​ប្រមូល​ព័ត៌មាន​ពី​គុណ​ភាព​ អង្ករ​ និង​តម្រូវ​ការ​ផ្នែក​ច្បាប់​​ស្ដីពី​ការ​នាំ​ចេញ​អង្ករ​កម្ពុជា។​ ការ​ប្រជុំ​នេះ​ គឺ​ជា​ជំនួប​ដំបូង​ដើម្បី​បង្ហាញ​ពី​វិស័យ​អង្ករ​យើង ​និង​​បង្ក​ភាព​ជិត​ស្និទ្ធសម្រាប់​ឱកាស​ជំនួញ​នា​ពេល​អនាគត»។

ក្នុង ​កិច្ច​ប្រជុំ​នេះ ​តំណាង​សមាគម​ឈ្មួញ​​អង្ករ​ហុង​កុង​ លោក​ Kenneth​ Chan ​បាន​​បង្ហាញ​​សុទិដ្ឋិ​និយម​ចំពោះ​សក្តា​នុពល​ឧស្សាហកម្ម​អង្ករ​នៅ​ កម្ពុជា ​ប៉ុន្តែ​បាន​​ចោទ​សួរ​ពាក់​ព័ន្ធ​នឹង​ការ​ធានា​គុណ​ភាព​ និង​ប្រភព​ដើម​នៃ​អង្ករ​​នៅ​ពេល​ដែល​ការ​ដឹក​ជញ្ជូន​ពី​​កំពង់​ផែ​ភ្នំពេញ​ ត្រូវ​ឆ្លង​កាត់​ផែ​របស់​វៀតណាម​មុន​​នឹង​ទៅ​ដល់​ទី​ក្រុង​ហុង​កុង​។

បើ ​តាម​ការ​ឲ្យ​ដឹង​ពី​លោក វ៉ាន់​ ដេវីដ ​កន្លង​មក​មាន​បញ្ហា​អ្នក​នាំអង្ករ​ចេញខ្លះ​បានប្រើ​អង្ករ​វៀត​ណាម​លាយ​ ជាមួយ​អង្ករ​កម្ពុជា​ដើម្បី​នាំ​ចេញ​ ជា​ហេតុ​នាំ​ឲ្យ​អ្នក​ទិញ​បារម្ភ​ពី​គុណភាព​និង​ប្រភព​​អង្ករ​កម្ពុជា​ដែល​ ត្រូវ​នាំ​ចេញ​។

លោក​ថ្លែង​ថា​៖ «​ការ​ឆ្លង​កាត់​ផែ​វៀត​ណាម​គឺ​ដើម្បី​ផ្ទេរ​កុង​តឺន័រ​ទៅ​ដាក់​កប៉ាល់​ធំ​ រួច​ដឹក​បន្ត​ទៅ​កាន់​ផែ​ទី​ក្រុង​ហុង​កុង​ប៉ុណ្ណោះ ​ហើយ​ឯកសារ​ក៏​បញ្ជាក់​ពី​ប្រភព​ដើម​នៃអ​ង្ករ​កម្ពុជា»។

លោក​បាន​បន្ត​ថា ពាក់​ព័ន្ធ​នឹង​ការ​ធានា​បាន​នូវ​គុណ​​ភាព​អង្ករ​កម្ពុជា​សុទ្ធ ១០០ ភាគរយ​នោះ គឺ​អ្នក​បញ្ជា​ទិញ​ឬអ្នក​នាំ​ចេញ​ (អាស្រ័យ​លើ​ការ​ចរចា​គ្នា​) អាច​យក​គ្រាប់​អង្ករ​ធ្វើ​តេស្តិ៍​វិភាគ ​DNA​ រក​ប្រភព​ដើម​បាន»។

ហុង​កុង​ជា​ទីផ្សារ​ដែល​ត្រូវ​ការ​តែ​អង្ករ​ក្រអូប​ប៉ុណ្ណោះ។

តាម ​ទិន្ន​ន័យ​ពី​ក្រសួង​កសិកម្ម​ រយៈ​ពេល​ ១១​ខែ​ឆ្នាំ​២០១៣​ហុង​កុង​​បាន​នាំ​ចូល​អង្ករ​​ផ្កាម្លិះ​គុណភាព​ លេខ​មួយ​ពី​កម្ពុជា​បាន​តែ ​៨០៤តោន​ប៉ុណ្ណោះ គឺ​ឈរ​នៅ​លេខ​រៀង​ទី ៣២ ក្នុង​ចំណោម​ប្រទេស​នាំ​អង្ករ​ចូល​ពី​កម្ពុជា​។

លោក ​លឹម​ ប៊ុន​ហេង​ អគ្គនា-​យក​​ក្រុម​ហ៊ុន​នាំ​អង្ករ​ចេញ​ ឡូរ៉ង់​ ដែល​ជា​អ្នក​នាំ​ចេញ​អង្ករ​ផ្កាម្លិះ​ទៅ​​ទីផ្សារ​ហុងកុង​ដែរ​នោះ ​បាន​សាទរ​ចំពោះ​ដំណឹង​នៃ​ក្រុម​ឈ្មួញ​អង្ករ​ហុង​កុង​មាន​បំណង​ចង់​បង្កើន ទំនាក់​ទំនង​ពាណិជ្ជ​កម្ម​ជាមួយ​ប្រទេស​កម្ពុជា។

ពាក់​ព័ន្ធ​នឹង​ការ​ធានា​គុណ​ភាព​ និង​ប្រភព​អង្ករ​មិន​គួរ​ជា​ក្តី​បារម្ភ​នោះ​ទេ។​ លោក​ថ្លែងថា​៖ «​មិន​មាន​​អ្នក​ណា​អាច​បន្លំ​ប្រភព​អង្ករ​បាន​​ទេ​។ អង្ករ​របស់​កម្ពុជា​គឺ​ជា​របស់​​កម្ពុជា»។

លោក​បញ្ជាក់​ថា ​ការ​​បញ្ជា​ទិញ​អង្ករ​ពី​​ហុង​កុង​​មាន​ការ​កើន​ឡើង​ បន្ទាប់​ពី​កម្ពុជា​ទទួល​បាន​ពាន​​រង្វាន់​អង្ករ​គុណភាព​​លេខ​១​របស់​ពិភព​លោក​នៅ​ហុងកុង ​កាល​ពី​ពេល​ថ្មី​ៗ​នេះ​។

ក្រោយ​កិច្ច​ប្រជុំ​ លោក​ Kenneth ​Chan អ្នក​តំណាង​សមា-​គម​​ឈ្មួញ​​អង្ករ​ហុង​កុង ​មិន​បាន​បញ្ជាក់​ពី​ទំហំ​នៃ​គម្រោង​នាំ​ចេញ​នោះ​ទេ​។​ លោកថ្លែង​ថា​៖«បន្ទាប់​ពី​ជំនួប​ថ្ងៃ​នេះ ​យើង​​បាន​ព័ត៌មាន​ច្រើន​អំពី​វិស័យ​អង្ករ​កម្ពុជា។ ពួក​យើង​នឹង​បន្ត​ពិភាក្សា​និង​ពិចារ-​ណា​ ហើយ​នឹង​ទាក់​ទង​មក​ខាង​កម្ពុជា​វិញ»។

ក្នុង​រយៈពេល​១១​ខែ ឆ្នាំ​នេះ​ កម្ពុជា​បាន​នាំ​អង្ករ​សរុប ៣៣២ ០០៩ តោន កើន​ឡើង ៩៣,៧១ ភាគរយ ធៀប​នឹង​រយៈ​ពេល​ដូច​គ្នាកាល​ពី​ឆ្នាំ​មុន​ដែល​មាន​ចំនួន​ត្រឹម​តែ ១៧១ ៣៨៩ តោន៕

អត្ថបទគួរចាប់អារម្មណ៍