.jpg)
ផ្ទាំងផ្សាយពាណិជ្ជកម្មពីការលក់ម៉ាស់ប្រភេទ FFP2 ដែលគេប្រើប្រឆាំងនឹងវីរុសកូរ៉ូណា។ រូបថត AFP
ក្រុងហាកៈ ក្រសួងសុខាភិបាលបានឲ្យដឹងកាលពីថ្ងៃសៅរ៍ថា ក្រុមមន្ដ្រីប្រទេស ហូឡង់ បានប្រមូលយកមកវិញនូវម៉ាស់រាប់ម៉ឺនដែលបាននាំចូលមកពីប្រទេសចិនដែលត្រូវបានគេចែកចាយដល់មន្ទីរពេទ្យជាច្រើន ដោយសារម៉ាស់ទាំងនោះមិនឆ្លើយតបតាមស្ដង់ដាគុណភាពក្នុងការប្រយុទ្ធប្រឆាំងនឹងការរីករាលដាលវីរុសកូរ៉ូណា។
ក្រសួងនេះបានឲ្យដឹងនៅក្នុងសេចក្ដីប្រកាសព័ត៌មានមួយផ្ញើទៅទីភ្នាក់ងារព័ត៌មាន AFP ថា មន្ទីរពេទ្យទាំងនោះទទួលបានការចែកចាយម៉ាស់ពីក្រុមហ៊ុនផលិតរបស់ប្រទេសចិនកាលពីថ្ងៃទី ២១ ខែមីនា។
ពួកគេទទួលបានការចង្អុលបង្ហាញជាលើកដំបូងថា ម៉ាស់ទាំងនោះមិនបានឆ្លើយតបទៅតាមស្ដង់ដារបស់ពួកគេនោះទេ នៅពេលម៉ាស់ទាំងនោះត្រូវបានត្រួតពិនិត្យ។
សេចក្ដីប្រកាសព័ត៌មាននេះបានបន្តថា ផ្នែកមួយនៃការដឹកជញ្ជូនត្រូវបានចែកចាយដល់ក្រុមអ្នកជំនាញសុខាភិបាលរួចហើយ ចំណែកផ្នែកនៅសល់ពីការដឹកជញ្ជូននេះភា្លមៗត្រូវបានផ្អាក និងមិនត្រូវបានចែកចាយនោះទេ។
សេចក្ដីប្រកាសព័ត៌មាននេះឲ្យដឹងថា៖ «ការធ្វើតេស្ដលើកទី ២ ក៏បានបង្ហាញថា ម៉ាស់ទាំងនេះមិនបានឆ្លើយតបតាមបទដ្ឋានគុណភាពទេ។ នៅពេលនេះប្រទេសហូឡង់ត្រូវបានសម្រេចចិត្តមិនប្រើប្រាស់ការដឹកជញ្ជូនណាមួយនោះទេ»។
សេចក្ដីប្រកាសព័ត៌មានបានបន្ថែមថា ការដឹកជញ្ជូននៅពេលអនាគតនឹងអនុវត្តការធ្វើតេស្ដបន្ថែមទៀត។
ទូរទស្សន៍ NOS បានរាយការណ៍ថា ការប្រមូលយកមកវិញនេះជាប់ពាក់ព័ន្ធជិតពាក់កណ្ដាលនៃការដឹកជញ្ជូនម៉ាស់ចំនួន ១,៣ លាន ដែលគេស្គាល់ថា ជា FFP2។
បណ្ដាញទូរទស្សន៍នេះបានបន្ថែមថា បញ្ហាជាមួយម៉ាស់នេះគឺថា ម៉ាស់ទាំងនេះមិនបិទផ្ទៃមុខត្រឹមត្រូវទេ ឬមានតម្រងច្រោះមិនត្រឹមត្រូវ។
លោក Olivier Veran រដ្ឋមន្ដ្រីក្រសួងសុខាភិបាលបារាំងបានប្រកាសថា លោកបានបញ្ជាទិញម៉ាស់ជាង ១ ពាន់លាន ភាគច្រើនមកពីប្រទេស ចិន ដើម្បីជួយប្រទេសនេះប្រយុទ្ធប្រឆាំងនឹងការរីករាលដាលវីរុសកូរ៉ូណា៕ LA
