The Phnom Penh Post Search

Search form

Logo of Phnom Penh Post newspaper Phnom Penh Post - ហ៊ុន សែន៖ វិស័យ​ទេសចរណ៍ និង​វប្បធម៌​ត្រូវ​ផ្សារ​ភ្ជាប់​នឹង​គ្នា

ហ៊ុន សែន៖ វិស័យ​ទេសចរណ៍ និង​វប្បធម៌​ត្រូវ​ផ្សារ​ភ្ជាប់​នឹង​គ្នា

លោក​នាយក​រដ្ឋ​មន្ត្រី ហ៊ុន សែន ថ្លែង​ក្នុង​ឱកាស​បើក​ពិធី​សន្និសីទ​អន្តរជាតិ​លើក ទី១ អំពី​វប្បធម៌ និង​ទេសចរណ៍​កាល​ពី​ម្សិល​មិញ។
លោក​នាយក​រដ្ឋ​មន្ត្រី ហ៊ុន សែន ថ្លែង​ក្នុង​ឱកាស​បើក​ពិធី​សន្និសីទ​អន្តរជាតិ​លើក ទី១ អំពី​វប្បធម៌ និង​ទេសចរណ៍​កាល​ពី​ម្សិល​មិញ។ ធិក កល្បាណ

ហ៊ុន សែន៖ វិស័យ​ទេសចរណ៍ និង​វប្បធម៌​ត្រូវ​ផ្សារ​ភ្ជាប់​នឹង​គ្នា

ក្រុង​សៀមរាប: លោក​នាយក​រដ្ឋ​មន្ត្រី ហ៊ុន សែន កាលពី​ថ្ងៃ​ពុធ​បាន​ធ្វើ​ការ​អំពាវនាវ​ដល់​ដៃ​គូ​អភិវឌ្ឍន៍ ជាពិសេស​អង្គការ​ទេសចរណ៍​ពិភពលោក និង​អង្គការ​យូណេស្កូ បន្ត​ខិតខំ​ប្រឹង​ប្រែង​ក្នុង​ការ​រួម​គ្នា​ដោះស្រាយ​នូវ​បញ្ហា​ប្រឈម​នានា​ដើម្បី​ពង្រឹង​និង អភិវឌ្ឍ​វិស័យ​ទេសចរណ៍​និង​វប្បធម៌​ក្នុង​បំណង​អភិវឌ្ឍ​កំណើន​សេដ្ឋកិច្ច និង​កាត់​បន្ថយ​ភាព​ក្រីក្រ​ក្នុង​កម្រិត​ថ្នាក់​ជាតិ តំបន់ និង​ពិភពលោក។

ការ​ថ្លែង​របស់​លោក​នាយក​រដ្ឋ​មន្ត្រី​បាន​ធ្វើ​ឡើង​ក្នុង​ឱកាស​នៃ​ការ​បើក​ពិធី​សន្និសីទ​ទេសចរណ៍​និង​វប្បធម៌​ពិភពលោក​លើក​ទីមួយ​ដែល​ត្រូវ​ប្រារព្ធ​ឡើង​ក្នុង​ទឹកដី​អង្គរ​ដែល​មាន​ការ​ចូល​រួម​ពី ៩៩ ប្រទេស​ជុំវិញ​ពិភពលោក​សម្រាប់​រយៈ​ពេល​បី​ថ្ងៃ។

លោក ថ្លែង​ថា «សន្និសីទ​ដែល​ត្រូវ​បាន​ប្រារព្ធ​ឡើង​ជា​ប្រវត្តិសាស្ត្រ​លើក​ដំបូង​របស់​ខ្លួន​នា​ពេល​នេះ​មិន​ត្រឹម​តែ​បាន​ឆ្លុះ​បញ្ចាំង​ពី​ការ​អភិវឌ្ឍ​វប្បធម៌​ផ្សារ​ភ្ជាប់​ជាមួយ​នឹង​វិស័យ​ទេសចរណ៍​ប៉ុណ្ណោះ​ទេ ប៉ុន្តែ​ថែម​ទាំង​បាន​ឆ្លុះ​បញ្ចាំង​ពី​កិច្ច​សហ​ប្រតិបត្តិ​ការ​យ៉ាង​ជិត​ស្និទ្ធ​រវាង​អង្គការ​ទេសចរណ៍​ពិភពលោក និង​អង្គការ​យូណេស្កូ ក្នុង​បុព្វហេតុ​រួម​តែ​មួយ​គត់​គឺ​រួម​គ្នា​សម្រេច​ឲ្យ​បាន​នូវ​គោល​ដៅ​អភិវឌ្ឍន៍​សហស្សវត្សរ៍ និង​ត្រៀម​ខ្លួន​សម្រេច​ឲ្យ​បាន​នូវ​គោលដៅ​ក្រោយ ឆ្នាំ​២០១៥ របស់​អង្គការ​សហ​ប្រជាជាតិ​តាម​រយៈ​ការ​ផ្សារ​ភ្ជាប់​វប្បធម៌ និង​ការ​អភិវឌ្ឍ​វិស័យ​ទេសចរណ៍​នេះ»។

លោក​ស្រី Irina Bokavo អគ្គ​នាយក​អង្គការ​យូណេស្កូ បាន​ថ្លែង​ថា អង្គការ​យូណេស្កូ​ប្ដេជា្ញ​ចិត្ត​យ៉ាង​ខ្លាំង​ថា នឹង​ពង្រឹង​ការ​ភ្ជាប់​ទំនាក់​ទំនង​រវាង​វប្បធម៌​និង​ទេសចរណ៍។ គោល​បំណង​របស់​អង្គការ​នឹង​បង្កើត​ថាមពល​វិជ្ជមាន​រវាង​ថាមពល​ទាំង​ពីរ​ដែល​កំពុង​ពង្រឹង​ទៅ​វិញ​ទៅ​មក​ដែល​ធ្វើ​ការងារ​សម្រាប់​និរន្តរភាព​និង​អត្ថ​ប្រយោជន៍​សហគមន៍​មូលដ្ឋាន។

លោក​ស្រី​និយាយ​ថា កំណើន​ទេសចរណ៍​បាន​បង្ក​ឲ្យ​មាន​បញ្ហា​មួយ​ចំនួន​ដូច​ជា ការ​រត់​ពន្ធ​វត្ថុ​បុរាណ​ដែល​ចាំបាច់​ត្រូវ​តែ​មាន​ការ​ដោះស្រាយ។

លោក​ស្រី​លើក​ឡើង​ថា៖ «ខ្ញុំ​សង្ឃឹម​ថា អ្នក​ទាំង​អស់​គ្នា​នឹង​ធ្វើ​ការងារ​ជាមួយ​គ្នា​លើ​បញ្ហា​នេះ»។

លោក ហ៊ុន សែន ក៏បាន​លើក​ឡើង​នូវ​ការ​ប្រឈម​មួយ​ចំនួន​ដែល​បង្ក​ការ​រាំង​ស្ទះ​ដល់​ការ​អភិវឌ្ឍ​ប្រកប​ដោយ​ចីរភាព​ក្នុង​វិស័យ​ទេសចរណ៍​វប្បធម៌​នេះ ក្នុង​នោះ​រួម​មាន កង្វះ​នៃ​កិច្ចសហការ និង​ការ​សម្រប​សម្រួល​រវាង​ស្ថាប័ន​ពាក់ព័ន្ធ ដៃគូ​ពាក់ព័ន្ធ និង​ប្រជា​ពលរដ្ឋ​ដែល​រស់​នៅ​មូលដ្ឋាន កង្វះ​នូវ​ការ​រៀបចំ​ផែនការ​អភិវឌ្ឍន៍ និង​ការ​គ្រប់​គ្រង​ដោយ​ហ្មត់ចត់ កង្វះ​ធនធាន​វប្បធម៌ ធនធាន​មនុស្ស កង្វះ​នូវ​ការ​យល់​ដឹង​ជា​សាធារណៈ​អំពី​វិស័យ​ទេសចរណ៍ និង​វប្បធម៌​ជាដើម។

លោក​ថ្លែង​ថា «ចំពោះ​មុខ​ដើម្បី​ឲ្យ​មាន​ការ​ផ្សារ​ភ្ជាប់​រវាង​វប្បធម៌ និង​ទេសចរណ៍​ដើម្បី​កសាង​ឲ្យ​បាន​ក្លាយ​ទៅ​ជា​ដៃ​គូ​ថ្មី​មួយ​និង​ក្លាយ​ទៅ​ជា​សសរស្តម្ភ​ចូល​រួម​សម្រេច​ឲ្យ​បាន​នូវ​គោលដៅ​អភិវឌ្ឍន៍​ក្រោយ ឆ្នាំ​២០១៥ របស់​អង្គការ​សហ​ប្រជាជាតិ​នោះ យើង​ត្រូវ​មាន​គោល​ការណ៍​សំខាន់​ពីរ​ដែល​ត្រូវ​ដើរ​ទន្ទឹម​គ្នា​គឺ ការ​បង្កើន​ឧត្តមភាព​ប្រកួត​ប្រជែង​នៃ​គោលដៅ​ទេសចរណ៍​វប្បធម៌ និង​ការ​ធានា​ឲ្យ​បាន​នៃ​ចីរភាព​ដែល​កើត​ចេញ​ពី​ការ​អភិវឌ្ឍ​វិស័យ​ទេសចរណ៍​វប្បធម៌​នេះ»។

លោក​បន្ត​ថា៖ «ដើម្បី​សម្រេច​បាន​នូវ​គោលដៅ​នេះ យើង​ត្រូវ​ស្វែង​យល់​អំពី​កាលានុវត្តភាព និង​បញ្ហា​ប្រឈម​រវាង​វប្បធម៌ និង​ទេសចរណ៍ ការ​បង្កើត​គំរូ​ថ្មីៗ​នៃ​ភាព​ជា​ដៃគូ និង​អភិបាល​កិច្ច និង​ការ​ដាក់​ចេញ​នូវ​អនុសាសន៍​កម្រិត​នយោបាយ ក្នុង​ក្របខ័ណ្ឌ​អន្តរ​វិស័យ​ដើម្បី​ជំរុញ​ការ​អភិវឌ្ឍ​វិស័យ​វប្បធម៌ និង​ទេសចរណ៍​ដែល​ជា​កម្មវត្ថុ​នៃ​អង្គ​សន្និសីទ​របស់​យើង​នា​ពេល​នេះ»។

ក្នុង ឆ្នាំ​២០១៤ កម្ពុជា​ទទួល​បាន​កំណើន​ភ្ញៀវ​ទេសចរ​ក្នុង​អត្រា ៥,២ ភាគរយ កើន​មក​ដល់​ប្រមាណ​ជា ៤,៥ លាន​នាក់ និង​នាំ​មក​នូវ​ប្រាក់​ចំណូល​ប្រមាណ​ជាង ៣ ពាន់​លាន​ដុល្លារ។ តាម​ការ​ព្យាករ​កំណើន​ភ្ញៀវ​ទេសចរ​អន្តរជាតិ​នឹង​បន្ត​កើន​ឡើង​រហូត​ដល់ ៥ លាន​នាក់​ក្នុង ២០១៥ និង​ប្រមាណ​ជា ៧,៥ លាន​នាក់ ឆ្នាំ​២០២០ នឹង​នាំ​មក​នូវ​ចំណូល​សរុប​ប្រមាណ ៥ ពាន់​លាន​ដុល្លារ ដែល​អាច​បង្កើត​នូវ​ឱកាស​ការងារ​ប្រមាណ ៨០០ ០០០ នាក់៕

អត្ថបទគួរចាប់អារម្មណ៍