The Phnom Penh Post Search

Search form

Logo of Phnom Penh Post newspaper Phnom Penh Post - ហ៊ុន សែន៖ ឯកជន​ជា​អ្នក​សូក​មន្ត្រី




ហ៊ុន សែន៖ ឯកជន​ជា​អ្នក​សូក​មន្ត្រី

លោក​នាយក​រដ្ឋ​មន្រ្តី ហ៊ុន សែន ថ្លែង​នៅ​ក្នុង​សន្និសីទ​ប្រចាំ​តំបន់​លើក ទី៨ ស្តី​ពី​ការ​ប្រឆាំង​អំពើ​ពុក​រលួយ​កាល​ពី​ម្សិល​មិញ។
លោក​នាយក​រដ្ឋ​មន្រ្តី ហ៊ុន សែន ថ្លែង​នៅ​ក្នុង​សន្និសីទ​ប្រចាំ​តំបន់​លើក ទី៨ ស្តី​ពី​ការ​ប្រឆាំង​អំពើ​ពុក​រលួយ​កាល​ពី​ម្សិល​មិញ។ ភ្នំពេញ ប៉ុស្តិ៍

ហ៊ុន សែន៖ ឯកជន​ជា​អ្នក​សូក​មន្ត្រី

ភ្នំពេញៈ លោក​នាយក​រដ្ឋ​មន្រ្តី ហ៊ុន សែន កាល​ពី​ម្សិល​មិញ​បាន​ការពារ​កេរ្តិ៍​ឈ្មោះ​មន្ត្រី​រដ្ឋាភិបាល​ពី​ការ​ពាក់​ព័ន្ធ​នឹង​ការ​ប្រព្រឹត្ត​អំពើ​ពុក​រលួយ​ដោយ​បាន​លើក​ឡើង​ថា វិស័យ​ឯកជន​ជា​អ្នក​សូក​ប៉ាន់​ដល់​មន្ត្រី​ពាក់​ព័ន្ធ​ដើម្បី​ទទួល​បាន​សារ​ប្រយោជន៍​ដល់​ពាណិជ្ជកម្ម​របស់​ខ្លួន ហើយ​បាន​ចោទ​សួរ​ដៃគូ​អភិវឌ្ឍន៍​អន្តរជាតិ​អំពី​ការ​ធ្វើ​ចំណាត់​ថ្នាក់​អំពើ​ពុក​រលួយ​ដល់ ប្រទេស​កម្ពុជា។

ថ្លែង​នៅ​ក្នុង​សន្និសីទ​ប្រចាំ​តំបន់​លើក ទី៨ ស្តី​ពី​ការ​ប្រឆាំង​អំពើ​ពុក​រលួយ​ប្រព្រឹត្ត​ទៅ​នៅ​រាជធានី​ភ្នំពេញ លោក​នាយក​រដ្ឋ​មន្ដ្រី ហ៊ុន សែន ទទួល​ស្គាល់​ពី​អំពើ​ពុក​រលួយ​ក្នុង​វិស័យ​សាធារណៈ​អាច​កើត​មាន​តាម​រយៈ​ការ​ប្រើ​ប្រាស់​ថវិកា​ជាតិ​មិន​ចំ​គោលដៅ​ឬ​មិន​មាន​ប្រសិទ្ធភាព ប៉ុន្តែ​ពេល​និយាយ​អំពី​វិស័យ​ធុរកិច្ច លោក​បាន​ដាក់​ចំណែក​នៃ​ការ​ទទួល​ខុស​ត្រូវ​ដល់​វិស័យ​ឯកជន​ចំពោះ​ការ​សូក​ប៉ាន់​មន្ដ្រី​ដើម្បី​ទទួល​បាន​ផល​ប្រយោជន៍​ពាណិជ្ជកម្ម។

លោក​ថ្លែង​ដូច្នេះ​ថា៖ «អ្នក​ណា​ជា​អ្នក​សូក​ប៉ាន់​ពិត​ប្រាកដ? ពិត​ណាស់​ហើយ​ក្នុង​វិស័យ​សាធារណៈ ដូច​ជា​ការ​ប្រើ​ប្រាស់​ថវិកា​ជាតិ​មិន​ចំ​គោល​ដៅ ឬ​ក៏​ប្រើ​ប្រាស់​មិន​មាន​ប្រសិទ្ធភាព ឬ ក៏​មាន​ការ​លួច​លាក់​ថវិកា​ជាតិ។ ប៉ុន្តែ​ពេល​ធ្វើ​ធុរកិច្ច​ក៏​កុំ​ភ្លេច​ថា វិស័យ​ឯកជន​ជា​អ្នក​សូក។

បើ​វិស័យ​ឯកជន​មិន​សូក​ទេ តើ​អ្នក​មន្ត្រី​រាជការ​បាន​លុយ​មក​ពី​ណា? អ្នក​ដែល​សូក​គឺ​វា​មាន​ការ​ពាក់​ព័ន្ធ​គ្នា​អ៊ីចឹង។ អ៊ឹចឹង​បាន​ជា​ទាមទារ​ឲ្យ​វិស័យ​ឯកជន ចូល​រួម​ធ្វើ​ប្រតិបត្តិការ»។

លោក​បាន​ស្នើ​ឲ្យ​វិស័យ​ឯកជន​ចូល​រួម​ក្នុង​ការ​ប្រឆាំង​អំពើ​ពុក​រលួយ និង​វិនិយោគ​ប្រកប​ដោយ​តម្លាភាព​ជាង​មុន ខណៈ​ជា​ញឹក​ញាប់​មន្ត្រី​រដ្ឋាភិបាល​ត្រូវ​បាន​ចោទ​ប្រកាន់​ថា ជា​អ្នក​ប្រព្រឹត្ត​អំពើ​ពុក​រលួយ។

លោក​ថ្លែង​បន្ត​ថា៖ «មាន​ពេល​ខ្លះ មន្ត្រី​រាជ​រដ្ឋាភិបាល​គ្រាន់​តែ​ជា​អ្នក​ទទួល​បាន​ការ​ស្តី​បន្ទោស​តែ​ប៉ុណ្ណោះ ក៏​ប៉ុន្តែ​ពួក​គេ​មិន​បាន​ទទួល​នូវ​សំណូក​ទេ។ ផ្ទុយ​ទៅ​វិញ បុគ្គលិក​ក្រុម​ហ៊ុន​តែង​ទៅ​ប្រាប់​ថៅកែ​ថា គេ​ត្រូវ​ការ​លុយ​ប៉ុណ្ណេះ យក​ទៅ​កន្លែង​នេះ ឬ កន្លែង​នោះ ប៉ុន្តែ​មន្ត្រី​រដ្ឋាភិបាល​មិន​មាន​ទទួល​សំណូក​នោះ​ទេ គឺ​អ្នក​ដែល​យក​មក​សូក​នោះ​យក​ដាក់​ហោប៉ៅ​ខ្លួន​ឯង។ ឯ​មន្រ្តី​គឺ​បាន​ត្រឹម​តែ​ឈរ​ឈ្មោះ។ អ៊ីចឹង​ឲ្យ​តំណាង​ក្រុម​ហ៊ុន​នីមួយៗ​សម្អាត​ផ្ទៃ​ក្នុង​ខ្លួន​ផង​ដែរ»។

លោក ព្រាប កុល ប្រធាន​អង្គការ​តម្លាភាព​កម្ពុជា បាន​ប្រាប់ ភ្នំពេញ ប៉ុស្តិ៍ ថា បើ​ទោះ​បី​ជា​វិស័យ​ឯកជន​ត្រូវ​បាន​មើល​ឃើញ​ថា បាន​រួម​ចំណែក​ក្នុង​ការ​ប្រព្រឹត្ត​អំពើ​ពុក​រលួយ តែ​វិស័យ​ឯកជន​មិន​មាន​សមត្ថកិច្ច​ក្នុង​ការ​ទប់​ស្កាត់​អំពើ​ពុក​រលួយ​មិន​ឲ្យ​កើត​មាន​នោះ​ទេ នៅ​ពេល​ដែល​ពួក​គេ​ត្រូវ​ការ​សេវា​សាធារណៈ​ពី​មន្ត្រី​ជំនាញ។

លោក​បន្ត​ថា៖ «យើង​មិន​អាច ឬ​គួរ​ទម្លាក់​កំហុស​ទាំង​ស្រុង​ទៅ​លើ​វិស័យ​ឯកជន​នោះ​ទេ ពីព្រោះ​ស្ថាប័ន​រដ្ឋ​ជា​ស្ថាប័ន​ដែល​គ្រប់​គ្រង​ប្រទេស​ក្នុង​នោះ​មាន​ការ​បង្កើត​ឲ្យ​មាន​ច្បាប់ ឲ្យ​មាន​គោល​នយោបាយ ហើយ និង​បង្កើត​ឲ្យ​មាន​បរិយាកាស​ធុរកិច្ច​មួយ​ដែល​មាន​លក្ខណៈ​ស្អាត​ស្អំ ហើយ​បើ​សិន​ជា​រក​ឃើញ​មាន​ការ​ប្រព្រឹត្ត​ខុស សមត្ថកិច្ច​ត្រូវ​តែ​ដាក់​ទោស ឬ លុប​បំបាត់​ទម្លាប់​ដែល​ខុស​ច្បាប់ ឬ ខុស​ឆ្គង។ វិស័យ​ឯកជន​មិន​មាន​សិទិ្ធ ឬ សមត្ថកិច្ច​ក្នុង​ការ​ធ្វើ​ការងារ​នេះ​ទេ»។

ជាមួយ​គ្នា​នេះ​ដែរ​លោក តែ តាំងប៉ ប្រធាន​សម្ព័ន្ធ​សមាគម​សហគ្រាស​ធុន​តូច និង​មធ្យម​កម្ពុជា ឲ្យ​ដឹង​ថា វិស័យ​ឯកជន​ពិបាក​នឹង​ចៀស​ផុត​ពី​ការ​ពាក់​ព័ន្ធ​នឹង​អំពើ​ពុក​រលួយ​ខណៈ​ដំណើរការ​នៃ​ការ​ទទួល​បាន​សេវា​សាធារណៈ​ទាក់​ទង​នឹង​ការ​ធ្វើ​ធុរកិច្ច​នៅ​មាន​ភាព​ស្មុគ​ស្មាញ។

លោក​និយាយ​ថា៖ «នៅ​មិន​ទាន់​មាន​យន្តការ​ដើម្បី​សម្រួល​ដល់​ដំណើរ​ការ​ក្នុង​ការ​ទទួល​បាន​សេវា​សាធារណៈ​នៅ​ឡើយ។ ក្រុម​ហ៊ុន​ត្រូវ​តែ​បង្ខំ​ចិត្ត​ក្នុង​ការ​ចំណាយ​បន្ថែម​ពី​លើ​ថ្លៃ​កំណត់​ក្នុង​ការ​ទទួល​បាន​សេវា​សាធារណៈ​ដើម្បី​អាច​ដឹង​ថា តើ​ឯកសារ ឬ ក៏​ការ​ស្នើ​សុំ​ដែល​ដាក់​ទៅ​ស្ថាប័ន​មួយ​បាន​ឆ្លង​ដល់​ណា​ហើយ បើ​មិន​ដូច្នេះ​ទេ យើង​នឹង​ត្រូវ​ចំណាយ​ពេល​ច្រើន​ណាស់​ទំរាំ​ចប់​ការងារ»។

ក្នុង​ព្រឹត្តិការណ៍​កាល​ពី​ម្សិល​មិញ មិន​ត្រឹម​តែ​វិស័យ​ឯកជន​ទេ​ដែល​ត្រូវ​លោក​នាយក​រដ្ឋ​មន្ត្រី​ស្នើ​ឲ្យ​ពិនិត្យ​តម្លាភាព​នៃ​ការ​ធ្វើ​អាជីវកម្ម​របស់​ខ្លួន លោក​ក៏​បាន​ចោទ​សួរ​អង្គការ​អន្តរជាតិ​អំពី​ការ​ដាក់​ចំណាត់​ថ្នាក់​ឲ្យ​កម្ពុជា ពី​កម្រិត​នៃ​អំពើ​ពុក​រលួយ​ផង​ដែរ។

លោក​នាយក​រដ្ឋ​មន្ដ្រី​បាន​លើក​ឡើង​ពី​ការ​ស៊ើប​អង្កេត​របស់​លោក​ស្រី Christine Lagarde ប្រធាន​មូលនិធិ​រូបិយវត្ថុ​អន្តរជាតិ​ក្នុង​ករណី​ក្លែង​បន្លំ​នៅ​ពេល​លោក​ស្រី​ធ្វើ​ជា​រដ្ឋ​មន្រ្ដី​ហិរញ្ញវត្ថុ​បារាំង និង​ករណី​របស់​លោក Paul Wolfowitz អតីត​ប្រធាន​ធនាគារ​ពិភពលោក​ដែល​បាន​លាលែង​ពី​តំណែង​នៅ​២០០៧ បន្ទាប់​ពី​ការ​ដំឡើង​ប្រាក់​ខែ​ដល់​ស្រី​កំណាន់​របស់​លោក​លើស​ពី​ចំណាត់​ថ្នាក់​ដែល​នាង​សម​នឹង​ទទួល​បាន។

លោក​ក៏​បាន​រំឭក​ដល់​ធនាគារ​អភិវឌ្ឍន៍​អាស៊ី​ការពារ​កេរ្តិ៍​ឈ្មោះ​ស្អាត​ស្អំ​របស់​ស្ថាប័ន​ខ្លួន​ផង​ដែរ​ដោយ​ថ្លែង​ថា៖ «ADB យើង​នៅ​មិន​ទាន់​មាន​ការ​ប្រយ័ត្ន​មាន​នៅ​ក្នុង ADB ខ្លួន​ឯង។ ប្រយ័ត្ន​ខ្លួន​ឯង​ផង។ តិច​ទៅ​ជាប់​ចោទ​ពី​បទ​អំពើ​ពុក​រលួយ។ យើង​ជា​អ្នក​ប្រឆាំង​អំពើ​ពុក​រលួយ​ត្រូវ​តែ​ប្រាកដ​ប្រជា​ខ្លួន​ឯង តែ​ខ្ញុំ​សង្ឃឹម​ថា ADB មិន​ខូច​ឈ្មោះ​ដូច IMF និង​ធនាគារ​ពិភពលោក​ទេ។ ខ្ញុំ​សង្ឃឹម​យ៉ាង​ដូច្នេះ»។

លោក​បាន​ស្នើ​ដល់​ធនាគារ​អភិវឌ្ឍន៍​អាស៊ី​ឲ្យ​ជួយ​បង្កើត​បទដ្ឋាន​វាយ​តម្លៃ​កម្រិត​នៃ​អំពើ​ពុក​រលួយ​ដែល​លោក​ថា មិន​សម​ស្រប​និង​មិន​មាន​មូលដ្ឋាន​ច្បាស់​លាស់។

លោក​ថ្លែង​ថា៖ «ពេល​ខ្លះ​វា​ហួស ធ្វើ​ជា​អង្គការ​អន្តរជាតិ​មួយ មក​និយាយ​បង្ខូច​ឈ្មោះ​ប្រទេស​គេ តើ​គេ​សុខ​ចិត្ត​ទេ។ រដ្ឋ​អធិបតេយ្យ​គេ​មិន​សុខ​ចិត្ត​ទេ»។

លោក សន ជ័យ មន្ត្រី​សម្រប​សម្រួល​បណ្ដាញ​រួប​រួម​ដើម្បី​គណនេយ្យ​ភាព​អាស៊ី​បូព៌ា ប៉ាស៊ីហ្វិក នៅ​កម្ពុជា ថ្លែង​ថា៖ «គេ​មាន​របៀប​វាយតម្លៃ ខ្ញុំ​គិត​ថា ពេល​នេះ​រដ្ឋាភិបាល ពិសេស​អង្គភាព​ប្រឆាំង​អំពើ​ពុក​រលួយ និង​អង្គការ​វាយតម្លៃ​ចំណាត់​ថ្នាក់​អំពើ​ពុក​រលួយ​អន្តរជាតិ​នោះ គួរ​អង្គុយ​ជាមួយ​គ្នា​ដើម្បី​ឲ្យ​យល់​ពី​វិធីសាស្ត្រ​នោះ​ដើម្បី​កុំ​ឲ្យ​រុញ​ដាក់​គ្នា​ទៅ​វិញ​ទៅ​មក»៕

អត្ថបទគួរចាប់អារម្មណ៍