The Phnom Penh Post Search

Search form




Logo of Phnom Penh Post newspaper Phnom Penh Post - ហ្គ្រិនត្រេដ បាន​ចុះ​កិច្ច​ព្រម​ព្រៀង​នាំ​អង្ករ ១ សែន​តោន

ហ្គ្រិនត្រេដ បាន​ចុះ​កិច្ច​ព្រម​ព្រៀង​នាំ​អង្ករ ១ សែន​តោន

ហ្គ្រិនត្រេដ បាន​ចុះ​កិច្ច​ព្រម​ព្រៀង​នាំ​អង្ករ ១ សែន​តោន

130916_12b
ការលក់អង្ករផ្គត់ផ្គង់តម្រូវការក្នុងស្រុកកន្លងមក

ភ្នំពេញៈ ហ្គ្រិនត្រេដ ជា​ក្រុមហ៊ុន​នាំ​ចេញ​អង្ករ​របស់​រដ្ឋ​បាន​ចុះ​លើ​កិច្ច​ព្រម​ព្រៀង​សហ​ប្រតិបត្តិការ​ជា​យុទ្ធសាស្ដ្រ​ជាមួយ​ក្រុមហ៊ុន Meijing Rice Co.,Ltd នៅ​ខេត្ត សានតុង របស់​ចិន​ពី​ការ​នាំ​ចូល​អង្ករ ១០០ ០០០ តោន​ពី​ប្រទេស​កម្ពុជា។

លោក ធន់ វីរៈ អគ្គ​នាយក​ក្រុមហ៊ុន ហ្គ្រីនត្រេដ បាន​ឲ្យ​ដឹង​ថា កិច្ច​ព្រម​ព្រៀង​នេះ​ត្រូវ​បាន​ធ្វើ​ឡើង​កាល​ពី​ថ្ងៃ​ទី៤​ក្នុង​ខែ កញ្ញា ក្នុង​អំឡុង​កិច្ច​ប្រជុំ​កំពូល​អាស៊ាន-ចិន។ លោក​បន្ត​ថា៖ «អនុលោម​តាម​កិច្ច​ព្រម​ព្រៀង​នេះ​យើង​នឹង​ផ្គត់​ផ្គង់​អង្ករ​ឲ្យ​ពួក​គេ​ចំនួន ១០០ ០០០ តោន​ក្នុង​មួយ​ឆ្នាំ។ ខ្ញុំ​គិត​ថា​យើង​នឹង​មិន​មាន​បញ្ហា​ក្នុង​ការ​ផ្គត់​ផ្គង់​ឲ្យ​ដល់​ពួកគេ​នោះ​ទេ​ដោយ​សារ​តែ​ខ្ញុំ​សហការ​ជាមួយ​នឹង​រោង​ម៉ាស៊ីន​កិន ស្រូវ​ក្នុង​ស្រុក​ចំនួន ៦ ផ្សេង​ទៀត»។

លោក​បន្ត​ថា៖ «ខ្ញុំ​មិន​មាន​ការ​បារម្ភ​លើ​ការ​ស្វែង​រក​អង្ករ​ឲ្យ​បាន​គ្រប់​គ្រាន់​សម្រាប់​ពួក​គេ និង​អំពី​គុណភាព​នោះ​ទេ​ដោយ​សារ​យើង​បាន​ព្រម​ព្រៀង​លើ​តម្លៃ​រួច​ហើយ ហើយ​យើង​អាច​កែច្នៃ​សម្រាប់​ពួក​គេ​បាន​ពួក​គេ​នឹង​ត្រួត​ពិនិត្យ​ពី​គុណភាព​ដោយ​ខ្លួន​គេ​ផ្ទាល់។ ប៉ុន្តែ​ការ​បារម្ភ​របស់​ខ្ញុំ​គឺ​ថា ថា​តើ​ក្រុមហ៊ុន​នេះ​អាច​ស្វែង​រក​កូតា​ពី​ភាគី​របស់​ខ្លួន​ក្នុង​ការ​នាំ​ចូល​ពី​យើង​ដែរ​ឬ​ទេ»។ លោក ធន់ វីរៈ និយាយ​ថា ក្រុមហ៊ុន​នេះ​នឹង​ចាប់ផ្ដើម​នាំ​ចេញ​ទៅ​ក្រុមហ៊ុន​ចិន​នៅ​ដើម​ខែ តុលា ហើយ​រំពឹង​ថា អាច​មាន​លទ្ធភាព​ក្នុង​ការ​នាំ​ចេញ​ប្រហែល ៣០ ០០០ តោន​ត្រឹម​ចុង​ឆ្នាំ​នេះ​។ លោក​និយាយ​ថា គណៈ​ប្រតិភូ​បាន​ជួប​ជាមួយ​ក្រុមហ៊ុន​របស់​លោក​កាល​ពី​ថ្ងៃ​សុក្រ​មុន ដើម្បី​ចរចា​អំពី​កិច្ច​ព្រម​ព្រៀង​នេះ​ឲ្យ​បាន​លម្អិត លោក​បន្ថែម​ថា លោក​នឹង​នាំ​ដៃ​គូ​របស់​លោក​ទៅ​ទស្សនា​ខេត្ត សានតុង ក្នុង​ពេល​ឆាប់ៗ​នេះ។

កាល​ពី​ឆ្នាំ​មុន​ក្រុមហ៊ុន ហ្គ្រីនត្រេដ បាន​ចុះ​ហត្ថលេខា​លើ​កិច្ច​ព្រម​ព្រៀង​នាំ​ចេញ​អង្ករ ១០០ ០០០ តោន​ជាមួយ ឥណ្ឌូនេស៊ី ប៉ុន្តែ​មក​ដល់​ពេល​នេះ​មិន​ទាន់​បាន​នាំ​ចេញ​ទេ៕ PB

អត្ថបទគួរចាប់អារម្មណ៍