.jpg)
ភ្នំពេញៈ ក្រុមហ៊ុនរោងចក្រកាត់ដេរសម្លៀកបំពាក់ ហ្គ្រេនធ្វីនអ៊ីនធើណេសិនណលរបស់តៃវ៉ាន់ ដែលចុះបញ្ជីក្នុងផ្សារហ៊ុនកម្ពុជាបានបង្ហាញពីការខាតបង់ជិត ៩០ ម៉ឺនដុល្លារនៅត្រីមាសទី ២ ឆ្នាំ ២០១៨។ នេះបើតាមរបាយការណ៍ដែលបានចេញផ្សាយនៅក្នុងផ្សារហ៊ុនកាលពីថ្ងៃម្សិលមិញ។
ការខាតបង់នេះត្រូវបានក្រុមហ៊ុនអះអាងថាដោយសារតែការកើនឡើងតម្លៃឈ្នួលពលកម្ម ការនាំចេញសម្លៀកបំពាក់រដូវក្តៅច្រើនដែលមានតម្លៃទាបទៅបណ្តាប្រទេសអាស៊ីច្រើនជាងអឺរ៉ុប និងការកើនឡើងលើការចំណាយរដ្ឋបាល។ នេះបើតាមរបាយការណ៍។
របាយការណ៍បង្ហាញថាក្រុមហ៊ុននេះបានខាតបង់ប្រមាណ ៨៦៧ ១៤៣ ដុល្លារនៅត្រីមាសទី ២ ឆ្នាំ ២០១៨ ធ្លាក់ចុះជិត ២០០ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៧ ដែលទទួលបានប្រាក់ចំណេញ ១,១៧ លានដុល្លារ។ ក្រុមហ៊ុនទទួលបានប្រាក់ចំណេញជិត ១ លានដុល្លារនៅត្រីមាសទី ១ ឆ្នាំ ២០១៨។
ក្នុងត្រីមាសទី ២ ឆ្នាំនេះ ហ្គ្រេនធ្វីនទទួលបានចំណូលសរុប ២៣,៧៧ លានដុល្លារ ខណៈត្រីមាសទី ២ ឆ្នាំ ២០១៧ ទទួលបាន ២៥ លានដុល្លារ។
លោក យ៉ាង សាវស៊ីន ប្រធានក្រុមប្រឹក្សាភិបាលក្រុមហ៊ុន ហ្គ្រេនធ្វីន បានឲ្យដឹងនៅក្នុងរបាយការណ៍ថា លទ្ធផលដែលទទួលបានពីប្រតិបត្តិការនៅត្រីមាសទី ២ ឆ្នាំ ២០១៨ នេះមានការធ្លាក់ចុះជាងត្រីមាសទី ២ នៃឆ្នាំ ២០១៧ ទោះបីជាក្រុមហ៊ុនបានពង្រីកខ្សែចង្វាក់ផលិតកម្មរបស់ខ្លួនកាន់តែប្រសើរឡើងដើម្បីឆ្លើយតបនឹងស្តង់ដាររបស់អតិថិជនក៏ដោយ។ លោកបន្តថា៖ «ហ្គ្រេនធ្វីន នឹងខិតខំរក្សាទំនាក់ទំនងយ៉ាងល្អជាមួយអតិថិជនខ្លួន ពិសេសជាមួយ Adidas»៕LA
