ភ្នំពេញៈ ក្រុមហ៊ុនរោងចក្រកាត់ដេរសម្លៀកបំពាក់ ហ្គ្រេនធ្វីន របស់តៃវ៉ាន់ ដែលចុះបញ្ជីក្នុងផ្សារហ៊ុនកម្ពុជាបានបង្ហាញពីកំណើនប្រាក់ចំណូលសរុបដល់ជាង ១២០ លានដុល្លារនៅឆ្នាំ ២០១៨ កើនឡើង ៤៨,៧៨ ភាគរយបើធៀបនឹងឆ្នាំ ២០១៧។ នេះបើយោងតាមរបាយការណ៍ ដែលបានបង្ហាញនៅលើផ្សារហ៊ុនកាលពីថ្ងៃម្សិលមិញ។
របាយការណ៍បង្ហាញថា ក្នុងរយៈពេល ១២ ខែ ឆ្នាំ ២០១៨ ក្រុមហ៊ុនទទួលបានកំណើនប្រាក់ចំណេញរហូតជាង ១១៨ ភាគរយ បើធៀបនឹងឆ្នាំ ២០១៧។ របាយការណ៍បង្ហាញសម្រាប់រយៈពេល ១២ ខែ ឆ្នាំ២០១៨ ក្រុមហ៊ុនហ្គ្រេនធ្វីន ទទួលបានប្រាក់ចំណេញសុទ្ធក្រោយបង់ពន្ធជាង ១,៤៤ លានដុល្លារ កើនឡើង ១១៨,៦៦ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៧។
សម្រាប់ត្រីមាសទី៤ ឆ្នាំ ២០១៨ ក្រុមហ៊ុន ហ្គ្រេនធ្វីន ទទួលបានចំណូលសរុបចំនួនជាង ៣៨,៩៤ លានដុល្លារ កើនឡើង ១១៧,៩៧ ភាគរយ ខណៈប្រាក់ចំណេញសុទ្ធនៅក្នុងត្រីមាសទី៤ នេះកើនឡើង ១១៣,៩៨ ភាគរយធៀបនឹងរយៈពេលដូចគ្នាកាលពីឆ្នាំ ២០១៧ ដល់ ២៦៤ ៥៨៧ ដុល្លារ។
លោក យ៉ាង សាវស៊ីន ប្រធានក្រុមប្រឹក្សាភិបាលក្រុមហ៊ុន ហ្គ្រេនធ្វីន បានលើកឡើងនៅក្នុងសេចក្តីថ្លែងការណ៍ ដែលបានផ្ញើទៅកាន់ផ្សារហ៊ុនថា ការកើនឡើងនេះដោយសារតែក្រុមហ៊ុនបានពង្រីកចង្វាក់ផលិតកម្មរបស់ខ្លួនកាន់តែប្រសើរដើម្បីឆ្លើយតបទៅនឹងសេចក្តីត្រូវការរបស់អតិថិជន។
លោកថ្លែងថា៖ «[យើង] នឹងបង្កើនពង្រីកទំនាក់ទំនងជាមួយអតិថិជនរបស់យើង ពិសេសក្រុមហ៊ុន Adidas ក្នុងគោលបំណងទទួលបានការកើនឡើងនៃការបញ្ជាទិញសម្រាប់ឆ្នាំ ២០១៩ នេះ»។
លោកបន្តថា៖ «យើងនឹងសហការជាមួយដៃគូនានាដើម្បីទទួលបានចំណូលបន្ថែម តាមរយៈការទទួលដេរបន្ត និងវេចខ្ចប់»។
ហ្គ្រេនធ្វីន គឺជាក្រុមហ៊ុនរោងចក្រកាត់ដេរតែ ១ គត់នៅកម្ពុជា ដែលបានចុះបញ្ជីក្នុងផ្សារហ៊ុនកម្ពុជា។
គិតត្រឹមថ្ងៃទី ៣១ ខែធ្នូ ឆ្នាំ ២០១៨ ទ្រព្យសកម្មសរុបរបស់ក្រុមហ៊ុន មានជាង ៨៩ លានដុល្លារ ខណៈមូលធនសរុបមានជាង ៦៨ លានដុល្លារ។ នេះបើយោងតាមរបាយការណ៍។
តម្លៃភាគហ៊ុនរបស់ក្រុមហ៊ុន ហ្គ្រេនធ្វីន នៅក្នុងផ្សារមូលបត្រកម្ពុជា គិតត្រឹមថ្ងៃម្សិលមិញមានតម្លៃ ៤ ៣៦០ រៀលក្នុង ១ ភាគហ៊ុន ប៉ុន្តែពុំមានការ ជួញដូរនោះទេ៕ LA