ក្រុងម៉ានីលៈ ក្រុមហ៊ុនហៅតាក់ស៊ីជិះ Go-Jek របស់ប្រទេស ឥណ្ឌូនេស៊ី កាលពីថ្ងៃអង្គារបានចាញ់ក្តីនៅតុលាការឧទ្ធរណ៍ហ្វីលីពីនប្រឆាំងនឹងសេចក្ដីសម្រេចរបស់ប្រទេស ហ្វីលីពីន ដែលបដិសេធផ្ដល់អាជ្ញាប័ណ្ណអាជីវកម្មដល់ក្រុមហ៊ុនខ្លួន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ការបដិសេធមិនផ្តល់អាជ្ញាប័ណ្ណរបស់ហ្វីលីពីនបានធ្វើឡើងដោយឈរលើមូលដ្ឋានថា ក្រុមហ៊ុន Go-Jek បានបរាជ័យក្នុងការឆ្លើយតបតាមលក្ខណវិនិច្ឆ័យស្តីពីភាពជាម្ចាស់កម្មសិទ្ធិក្រុមហ៊ុនរបស់ហ្វីលីពីន ដែលជាការវាយប្រហារដ៏ខ្លាំងមួយចំពោះផែនការពង្រីកអាជីវកម្មក្នុងតំបន់អាស៊ីអាគ្នេយ៍របស់ខ្លួន។
ក្រុមហ៊ុន Go-Jek ដែលទទួលបានការគាំទ្រដោយវិនិយោគិនធំៗរួមទាំងក្រុមហ៊ុន Google ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Alphabet Inc និងក្រុមហ៊ុន Tencent Holdings Ltd របស់ប្រទេស ចិន ធ្លាប់មានក្តីសង្ឃឹមថា នឹងប្រកួតប្រជែងជាមួយក្រុមហ៊ុន Grab ដែលមានមូលដ្ឋាននៅប្រទេស សិង្ហបុរី និងជាក្រុមហ៊ុនឈានមុខគេក្នុងវិស័យហៅតាក់ស៊ីជិះនៅប្រទេស ហ្វីលីពីន។
យោងតាម Reuters ក្រុមហ៊ុនផ្តល់សេវាហៅតាក់ស៊ីជិះនេះបានដាក់ពាក្យសុំអាជ្ញាប័ណ្ណ ដើម្បីប្រតិបត្តិការនៅក្នុងទីក្រុងម៉ានីលកាលពីខែសីហា តាមរយៈក្រុមហ៊ុន Velox ដែលជាក្រុមហ៊ុនបុត្រសម្ព័ន្ធដែលគ្រប់គ្រងភាគហ៊ុនទាំងស្រុងរបស់ខ្លួន ប៉ុន្តែត្រូវបានបដិសេធកាលពីខែមករា បន្ទាប់ពីសេវាហៅតាក់ស៊ីជិះត្រូវដាក់បញ្ចូលក្នុងបញ្ជីឧស្សាហកម្មមួយ ដែលចែងថា កម្មសិទ្ធិបរទេសត្រូវបានកម្រិតមកនៅត្រឹម ៤០ ភាគរយ។
លោក Martin Delgra ប្រធានក្រុមប្រឹក្សាសិទ្ធិអាជីវកម្មពិសេស និងបទប្បញ្ញត្តិដឹកជញ្ជូនផ្លូវគោក (LTFRB) បានប្រាប់ទីភ្នាក់ងារព័ត៌មាន Reuters ថា៖ «ពួកគេបានដាក់ញត្តិ ១ ដោយស្នើសុំឲ្យមានការពិចារណាឡើងវិញ ប៉ុន្តែបានរងបរាជ័យក្នុងការកែប្រែលក្ខខណ្ឌតម្រូវស្តីពីភាពជាម្ចាស់កម្មសិទ្ធិក្នុងប្រទេស ហ្វីលីពីន»។
អ្នកនាំពាក្យរបស់ក្រុមហ៊ុន Go-Jek បានឲ្យដឹងថា ក្រុមហ៊ុនមានការខកចិត្ត ហើយ «នៅពេលនេះនឹងស្វែងរកជម្រើសរបស់យើង»។
ក្រុមហ៊ុនផ្តល់សេវាហៅតាក់ស៊ីជិះមួយចំនួនរបស់ប្រទេស ហ្វីលីពីន បានចាប់ផ្ដើមប្រតិបត្តិការក្នុងទីក្រុងម៉ានីល និងតាមខេត្តធំៗជាច្រើនទៀតក្នុងរយៈពេល ២ ឆ្នាំកន្លងមកហើយ ប៉ុន្តែភាពជោគជ័យនៅមានកម្រិតដោយសារចំណែកទីផ្សារក្នុងស្រុកដ៏ធំរបស់ក្រុមហ៊ុន Grab ដែលមានជាង ៩០ ភាគរយ៕ LA