ភ្នំពេញៈ គម្រោងអភិវឌ្ឍន៍អគារភ្លោះកម្ពស់ ៦២ ជាន់ ដែលមានតម្លៃ ២៣០ លានដុល្លារបានចាប់ផ្តើមបើកការដ្ឋានសាងសង់ជាផ្លូវការហើយកាលពីថ្ងៃម្សិលមិញដោយគ្រោងនឹងបញ្ចប់នៅក្នុងឆ្នាំ ២០២៣។
គម្រោងនេះជាវិនិយោគរួមគ្នារវាងក្រុមហ៊ុន Royal One ជាបុត្រសម្ព័ន Royal Group របស់លោក គិត ម៉េង ជាមួយនឹងក្រុមហ៊ុនអចលនទ្រព្យ និងសំណង់មកពីខេត្តស៊ីឈួន ប្រទេស ចិន Huashi Group។
អគារភ្លោះ Royal One ដែលមានទីតាំងស្ថិតនៅចំណុចប្រសព្វរវាងមហាវិថីសហព័ន្ធរុស្ស៊ី និងមហាវិថីព្រះមុនីវង្ស ជាអតីតអគារនគរបាលចរាចរណ៍រាជធានីភ្នំពេញ ត្រូវបានសាងសង់លើផ្ទៃដីទំហំ ៤ ០៣៦ម៉ែត្រការ៉េ និងមានកម្ពស់សរុប ២៣០ ម៉ែត្រ។
លោក គិត ធាង ប្រធានក្រុមហ៊ុន Royal One បានថ្លែងក្នុងឱកាសបើកការដ្ឋានសាងសង់ថា Royal One នឹងក្លាយជាអគារដ៏ខ្ពស់ជាងគេ ស្ថិតនៅកណ្តាលរាជធានីភ្នំពេញ ហើយវានឹងជួយលើកកម្ពស់មុខមាត់របស់កម្ពុជាផងដែរ។
លោកថ្លែងថា៖ «ក្រុមហ៊ុន Royal Group ជឿជាក់ថា វត្តមានអគារដ៏ប្រណីតនេះនឹងក្លាយជាចំណែកនៃមោទនភាពជាតិកម្ពុជា ដែលបង្ហាញឲ្យឃើញពីសមត្ថភាព និងភាពរីកចម្រើនរបស់ប្រទេស កម្ពុជា លើឆាកអន្តរជាតិ»។
អគារដែលមានចំណតរថយន្តក្រោមដីចំនួន ៦ ជាន់នេះ នឹងត្រូវប្រើប្រាស់ជាអគារពាណិជ្ជកម្មចម្រុះដែលរួមមាន ខុនដូ ការិយាល័យធ្វើការ ផ្សារទំនើប ភោជនីយដ្ឋាន សណ្ឋាគារ ក្លិបកម្សាន្ត និងក្លិបហាត់ប្រាណ ជាដើម។
លោក ឡៅ ទិព្វសីហា រដ្ឋលេខាធិការ ក្រសួងរៀបចំដែនដីនគរូបនីយកម្ម និងសំណង់បានប្រាប់ថា ការចាប់ផ្តើមសាងសង់នាពេលនេះ គឺជាសញ្ញាដ៏ល្អសម្រាប់វិស័យសំណង់នៅកម្ពុជា។ នៅពេលមានអគារធំៗបែបនេះកាន់តែច្រើនវាក៏បង្ហាញពីភាពរីកចម្រើន និងកំណើនសេដ្ឋកិច្ចដ៏រឹងមាំនៅកម្ពុជាផងដែរ។
លោកលើកឡើងទៀតថា៖ «អគារនេះមិនត្រឹមតែជួយលើមុខមាត់រាជធានីភ្នំពេញប៉ុណ្ណោះទេ តែតាមរយៈគម្រោងដ៏ធំនេះវាក៏នឹងជួយបង្កើតការងារ និងបទពិសោធការងារល្អៗដល់ប្រជាជនខ្មែរទៀតផង»។
តំណាងក្រុមហ៊ុន Huashi Group ដែលចូលរួមក្នុងពិធីបើកការដ្ឋានសាងសង់បានបដិសេធក្នុងការផ្តល់ព័ត៌មានលម្អិតពីគម្រោងនេះ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបាននិយាយថា ប្រសិនបើគម្រោងនេះបញ្ចប់តាមផែនការនោះ វានឹងចូលរួមចំណែកយ៉ាងច្រើនក្នុងការជួយលើកកម្ពស់វិស័យសំណង់ និងអចលនទ្រព្យនៅកម្ពុជា ខណៈបច្ចុប្បន្នក៏មានគម្រោងមួយចំនួនត្រូវបានពន្យារពេលសាងសង់ផងដែរ។ លោកបន្តថា Royal One ជាគម្រោងមានភាពទាក់ទាញខ្លាំង ដោយសារស្ថិតក្នុងទីតាំងល្អបំផុតក្នុងរាជធានីភ្នំពេញ។
បើតាមលោក សុខនីម ដីនៅទីតាំងរបស់គម្រោង Royal One មានតម្លៃចន្លោះពី ៤ ៥០០ ទៅ ៦ ០០០ ដុល្លារក្នុង ១ ម៉ែត្រការ៉េ។
ខណៈមានមតិមួយចំនួនលើកឡើងថា នៅកម្ពុជាបច្ចុប្បន្នមានអគារធំៗ និងខ្ពស់ជាច្រើនហើយអត្រាប្រើប្រាស់នៅមានកម្រិតតិចតួចនោះ លោក សុខនីម បាននិយាយថា វាមិនមានបញ្ហានោះទេ ព្រោះកម្ពុជាមិនមែនរស់នៅតែឯងទេ។ លោកបញ្ជាក់ថា៖ «កម្ពុជាជាសមាជិកសមាគមអាស៊ាន ដូច្នេះចំនួនអ្នកវិនិយោគ និងអ្នកមកធ្វើការនៅកម្ពុជានឹងមានចំនួនកាន់តែច្រើននៅពេលអនាគត»។
ទិន្នន័យពីក្រសួងរៀបចំដែនដីនគរូបនីយកម្ម និងសំណង់ បានបង្ហាញថា ទុនវិនិយោគវិស័យសំណង់កាលពីឆ្នាំ ២០១៨ មានតម្លៃប្រមាណ ៥ ២២៨ លានដុល្លារថយចុះចំនួន ១៨,៦៦ ភាគរយ បើធៀបនឹងឆ្នាំ ២០១៧ ដែលមានតម្លៃជាង ៦ ៤២៨ លានដុល្លារ។ របាយការណ៍បង្ហាញថា អគារដែលមានកម្ពស់ចាប់ពី ៥ ជាន់ឡើងទៅមានចំនួនជាង ១ ២០០ អគារ។
លោក សេង ឡូត អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់ បានប្រាប់ថា លោកស្វាគមន៍រាល់គម្រោងទាំងអស់ដែលមានច្បាប់អនុញ្ញាតពីក្រសួងរួចហើយ ក្នុងការចាប់ផ្តើមសាងសង់ដើម្បីឲ្យការវិនិយោគកាន់តែមានសម្ទុះខ្លាំងឡើងបន្ថែមទៀត។
លោកថ្លែងថា៖«ការចាប់ផ្តើមសាងសង់នេះគឺជាសញ្ញាល្អបន្ថែមទៀតសម្រាប់សេដ្ឋកិច្ចកម្ពុជា»។
ទោះបីយ៉ាងណាលោកលើកសំណូមពរថា គ្រប់ការដ្ឋានទាំងអស់ត្រូវតែធ្វើដោយគោរពទៅតាមបទដ្ឋានបច្ចេកទេស និងមានវិធានការសុវត្ថិភាពខ្ពស់ ដើម្បីធានាឲ្យការសាងសង់ដំណើរការទៅដោយរលូន៕LA