ភ្នំពេញ: ក្រុមហ៊ុន Pestech International Bhd របស់ម៉ាឡេស៊ីបានសម្រេចកិច្ចសន្យាតបណ្តាញអគ្គិសនីតង់ស្យុងខ្ពស់ ២៣០ គីឡូវ៉ុល ចូលទៅកាន់តំបន់រុករករ៉ែជាមួយក្រុមហ៊ុន Renaissance Minerals (Cambodia)Ltd ដែលជាក្រុមហ៊ុនបានទទួលសិទ្ធិរុករ៉ែនៅតំបន់អូរខ្វាវ ស្រុកមណ្ឌលសីមា ខេត្តមណ្ឌលគិរីនៅភាគខាងឦសានប្រទេសកម្ពុជា។ នេះបើយោងតាមការចុះផ្សាយរបស់ The Edge Market។
សេចក្តីរាយការណ៍បន្តថា ក្រុមហ៊ុន Emerald Resources NL ចុះបញ្ជីនៅប្រទេសអូស្ដ្រាលីជាក្រុមហ៊ុនមេរបស់ក្រុមហ៊ុន Renaissance Minerals (Cambodia) Ltd ដែលរំពឹងថានឹងទាញយករ៉ែមាសពីគម្រោងរ៉ែមាសអូរខ្វាវ នៅក្នុងត្រីមាសទី ២ ឆ្នាំ ២០២០ នេះ។
កិច្ចសន្យាតភ្ជាប់អគ្គិសនីមានតម្លៃ ៧,៣៤ លានដុល្លារក្រោយ Pestech (Cambodia) PLC (PCL) បានចុះហត្ថលេខាជាមួយក្រុមហ៊ុនបុត្រសម្ព័ន្ធដែលបានចុះបញ្ជីនៅផ្សារក្នុងប្រទេសអូស្ត្រាលីគឺក្រុមហ៊ុន Emerald Resources NL កាលពីថ្ងៃទី ១៤ ខែមីនា ឆ្នាំ ២០២០។ នេះបានតាមការចុះផ្សាយរបស់ទីភ្នាក់ងារព័ត៌មានម៉ាឡេស៊ី The Edge Market ដែលបានរាយការណ៍កាលពីថ្ងៃព្រហស្បតិ៍។
ក្រុមហ៊ុន Pestech បានប្រាប់ទីភ្នាក់ងារព័ត៌មាន The Edge Market ថា គម្រោងនេះគឺជាទ្រព្យសកម្មក្នុងការសាងសង់អនុស្ថានីយបញ្ជូនអគ្គិសនីទៅកាន់តំបន់រ៉ែមាសលើកដំបូងដែលត្រូវបានអនុវត្តដោយក្រុមហ៊ុន Pestech (Cambodia) Plc ជាក្រុមហ៊ុនបុត្រសម្ព័ន្ធរបស់ខ្លួន និងបានចាប់ផ្ដើមដំណើរការកាលពីថ្ងៃទី ១ ខែមីនា ហើយនឹងត្រូវបញ្ចប់ក្នុងរយៈពេល ១២ ខែបន្ទាប់ពីចាប់ផ្ដើម។
ក្រុមហ៊ុនឲ្យដឹងថា៖ «គម្រោងនេះនឹងរួមចំណែកជាវិជ្ជមានដល់ប្រាក់ចំណូល និងប្រាក់ចំណេញរបស់ក្រុមហ៊ុន Pestech ទៅតាមដំណាក់កាលនៃការរីកចម្រើន។ គម្រោងនេះត្រូវទទួលស្គាល់នៅឆ្នាំហិរញ្ញវត្ថុដែលគិតត្រឹមថ្ងៃទី ៣០ ខែ មិថុនា ឆ្នាំ ២០២០ ដល់ថ្ងៃទី ៣០ ខែ មិថុនា ឆ្នាំ ២០២១»។
ក្រុមហ៊ុន Pestech បានបន្ថែមថា ខ្លួនបន្តបម្រើតម្រូវការសម្រាប់អគ្គិសនីដែលអាចទុកចិត្តបាននៅក្នុងតំបន់នេះដែលមានសារៈសំខាន់ជាពិសេសចំពេលការរីករាលដាលកូវីដ ១៩ នៅពេលបច្ចុប្បន្ន។
កាលពីសប្តាហ៍មុន ក្រុមហ៊ុន Emerald Resources NL ក៏បានចុះកិច្ចសន្យាក្នុងតម្លៃ ២៣០ លានដុល្លារ ជាមួយក្រុមហ៊ុន Mining and Civil Australia (Maca) លើគម្រោងរ៉ែមាសអូរខ្វាវនៅកម្ពុជា។
ក្រុមហ៊ុននេះបានចុះកិច្ចសន្យាមានរយៈពេលជាង ៧ ឆ្នាំ រួមមានការផ្គត់ផ្គង់ឧបករណ៍ធ្វើរ៉ែ និងសេវាកម្មលើគម្រោងរ៉ែមាសនៅកម្ពុជា។ វិសាលភាពការងារនៃកិច្ចសន្យានេះនឹងគ្របដណ្តប់លើសេវាកម្ម ដឹកជញ្ជូន ការទាញយករ៉ែ ខួង និងការបំផ្ទុះ។
ក្រុមហ៊ុនបានឲ្យដឹងថា ការរៀបចំឧបករណ៍គម្រោងអូរខ្វាវត្រូវរំពឹងថា នឹងចាប់ផ្តើមនៅខែសីហាហើយគ្រោងនឹងប្រតិបត្តិការនៅខែតុលា។
ក្រុមហ៊ុននេះបានចេញផ្សាយការសិក្សាលទ្ធភាពច្បាស់លាស់របស់ខ្លួនកាលពីខែឧសភា ឆ្នាំ ២០១៧ ដែលបង្ហាញថា គម្រោងរ៉ែមាសអូរខ្វាវអាចផលិតបានមាស ១០៦ ០០០ អោនស៍ ក្នុង ១ ឆ្នាំជាមធ្យម។
ក្រុមហ៊ុនបានប៉ាន់ប្រមាណថា ការទាញយករ៉ែដំបូងនឹងមានសកម្មភាពរយៈពេល ៧ ឆ្នាំជាមួយនឹងទុនវិនិយោគ ៩៨ លានដុល្លារអូស្ត្រាលី។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែបានប្រាប់ភ្នំពេញប៉ុស្តិ៍កាលពីខែមុនថា រដ្ឋាភិបាលកម្ពុជាបានផ្តល់អាជ្ញាប័ណ្ណរុករករ៉ែឲ្យក្រុមហ៊ុននេះកាលពីខែកក្កដា ឆ្នាំ ២០១៨ ដែលគ្របដណ្តប់លើផ្ទៃដី ១១,៥ គីឡូម៉ែត្រការ៉េ លើគម្រោងរ៉ែមាសអូរខ្វាវក្នុងស្រុកមណ្ឌលសីមា ខេត្តមណ្ឌលគិរី។
លោកបន្តថា អាជ្ញាប័ណ្ណនេះនឹងមានរយៈពេល ១៥ ឆ្នាំ ហើយអាចនឹងបន្តជាថ្មីបាន ២ ដងទៀតដែលមានរយៈពេល ១០ ឆ្នាំម្តង។
បច្ចុប្បន្នក្រសួងបានផ្តល់អាជ្ញាប័ណ្ណដល់ក្រុមហ៊ុនប្រមាណ ៣៧ កំពុងរុករកនៅខេត្តសំខាន់ៗចំនួន ៤ រួមមានខេត្តមណ្ឌលគិរី រតនគិរី ក្រចេះ និងខេត្តស្ទឹងត្រែង៕ LA