.jpg)
ការដ្ឋានសាងសង់ស្ថានីយផលិតថាមពលពីពន្លឺព្រះអាទិត្យ កម្លាំង ៣០ មេហ្គាវ៉ាត់ក្នុងខេត្តបន្ទាយមានជ័យ។ រូបថត ហ៊ឹន ពិសី
ភ្នំពេញៈ ស្ថានីយផលិតថាមពលអគ្គិសនីពីពន្លឺព្រះអាទិត្យមានអានុភាព ៣០ មេហ្គាវ៉ាត់ ស្ថិតក្នុងស្រុកក្រគរ ខេត្តពោធិ៍សាត់ និងត្រូវបានរដ្ឋាភិបាលអនុម័តឱ្យសាងសង់កាលពីខែកក្កដា ឆ្នាំ ២០១៩ នោះត្រូវបានដាក់បញ្ចូលក្នុងបណ្តាញជាតិសាកល្បងហើយ ខណៈនេះគឺជាផ្នែកមួយនៃផែនការតភ្ជាប់ថាមពលស្អាតទៅក្នុងបណ្តាញជាតិឱ្យបាន ៤៥០ មេហ្គាវ៉ាត់ នៅមុនដំណាច់ឆ្នាំ ២០២២។
អគ្គនាយកអគ្គិសនីកម្ពុជាលោក កែវ រតនៈ កាលពីថ្ងៃអង្គារបានប្រាប់សារព័ត៌មានក្នុងស្រុក Fresh News ថា ស្ថានីយផលិតថាមពលអគ្គិសនីពីពន្លឺព្រះអាទិត្យកម្លាំង ៣០ មេហ្គាវ៉ាត់នេះ ត្រូវបានដាក់ឱ្យដំណើរការដោយភ្ជាប់ជាមួយបណ្តាញជាតិដែលស្ថិតក្នុងឃុំស្នាអន្សា ស្រុកក្រគរ។
លោកបានថ្លែងថា៖ «ស្ថានីយថាមពលអគ្គិសនីដើរដោយពន្លឺព្រះអាទិត្យ ៣០ មេហ្គាវ៉ាត់ថ្មីនេះ ស្ថិតក្នុងចំណោមថាមពលពីពន្លឺព្រះអាទិត្យ ២០០ មេហ្គាវ៉ាត់ ដែលនឹងត្រូវដាក់ឱ្យដំណើរការពីឆ្នាំ ២០២០ ដល់ទៅឆ្នាំ ២០២២។ នេះជាផែនការដែលត្រៀមផលិតថាមពលឱ្យបានច្រើនថែមទៀតសម្រាប់ផ្គត់ផ្គង់នៅឆ្នាំខាងមុខ ជាពិសេសក្នុងរដូវប្រាំង ហើយក៏ជាផ្នែកមួយក្នុងការប្តេជ្ញាចិត្តរបស់រាជរដ្ឋាភិបាលក៏ដូចជាអគ្គិសនីកម្ពុជាក្នុងការបង្កើនភាគរយថាមពលកកើតឡើងវិញ និងថាមពលស្អាត (ពន្លឺព្រះអាទិត្យ) ឱ្យដល់យ៉ាងតិច ៤៥០ មេហ្គាវ៉ាត់មុនដាច់ឆ្នាំ ២០២២»។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលក្រសួងរ៉ែ និងថាមពលបានប្រាប់ភ្នំពេញប៉ុស្តិ៍នាថ្ងៃអង្គារថា ការដាក់បញ្ចូលទៅក្នុងបណ្តាញជាតិនៅពេលនេះ (ក្នុងសប្តាហ៍នេះ) គឺស្ថិតក្នុងដំណាក់កាលសាកល្បងតែប៉ុណ្ណោះ ខណៈការសាងសង់ទើបបញ្ចប់កាលពីពាក់កណ្តាលខែកញ្ញានេះ។
លោកបានថ្លែងថា៖ «ការដាក់បញ្ចូលនូវថាមពលអគ្គិសនីពីពន្លឺព្រះអាទិត្យថ្មីបន្ថែមទៅក្នុងបណ្តាញជាតិ និងផ្តល់ឱ្យអគ្គិសនីកម្ពុជានូវឧត្តមភាពកាន់តែខ្លាំងក្នុងវិស័យថាមពល»។
លោកបន្ថែមទៀតថា ជាមួយនឹងកិច្ចខិតខំរបស់អាជ្ញាធរពាក់ព័ន្ធនៅពេលនេះ លោករំពឹងថា នឹងមានស្ថានីយផលិតថាមពលអគ្គិសនីពីពន្លឺព្រះអាទិត្យថ្មីៗបន្ថែមទៀតដាក់ឱ្យដំណើរការនៅពេលខាងមុខដែលមានដូចជា ស្ថានីយផលិតថាមពលអគ្គិសនីពីពន្លឺព្រះអាទិត្យនៅកំពង់ឆ្នាំង បាត់ដំបង ពោធិ៍សាត់ និងបន្ទាយមានជ័យ។
តម្រូវការប្រើប្រាស់ថាមពលអគ្គិសនីនៅកម្ពុជាមានកំណើនជាមធ្យមចន្លោះពី ១៦ ទៅ ១៨ ភាគរយ ក្នុង ១ ឆ្នាំ លើកលែងតែនៅក្នុងឆ្នាំ ២០១៨-២០១៩ ដែលមានកំណើនជាគំហុករហូតទៅដល់ ២៥ ភាគរយ។ បច្ចុប្បន្នកម្ពុជាអាចផលិតថាមពលអគ្គិសនីបានចន្លោះពី ៧០ ទៅ ៨០ ភាគរយនៃតម្រូវការប្រើប្រាស់សរុប ខណៈចំណែកនៅសល់ត្រូវបានបំពេញដោយការទិញពីប្រទេសជិតខាង។ នេះបើយោងតាមរបាយការណ៍របស់ក្រសួងរ៉ែ និងថាមពល។
របាយការណ៍ឱ្យដឹងទៀតថា ចាប់ពីឆ្នាំ ២០០៦ ដល់ដំណាច់ឆ្នាំ ២០១៩ ការវិនិយោគលើវិស័យអគ្គិសនីមានតម្លៃសរុប ៦,១ ពាន់លានដុល្លារ ដែលឆ្លុះបញ្ចាំងពីតម្រូវការកើនឡើងនៃវិស័យថាមពលក្នុងរយៈពេលប៉ុន្មានឆ្នាំចុងក្រោយនេះ។
របាយការណ៍ប្រចាំឆ្នាំ ២០១៨ របស់អាជ្ញាធរអគ្គិសនីកម្ពុជា (EAC) បង្ហាញឱ្យឃើញថា ប្រទេសកម្ពុជាបានបង្កើនការផ្គត់ផ្គង់ថាមពលអគ្គិសនីដល់ ២ ៨៧០, ៦៥ មេហ្គាវ៉ាត់ នៅឆ្នាំ ២០១៩ កើនឡើងពី ២ ៦៥០,២៦ មេហ្គាវ៉ាត់នៅក្នុងឆ្នាំ ២០១៨៕ LA
