ភ្នំពេញៈ អគ្គនាយកដ្ឋានគយ និងរដ្ឋាករកម្ពុជានឹងចាប់ផ្តើមសិក្សានីតិវិធីនិងបែបបទគយលើមុខទំនិញនាំចេញខណៈអ្នកជំនាញរំពឹងថា វានឹងជួយកែលម្អប្រសិទ្ធភាព ពាណិជ្ជកម្មឲ្យកាន់តែប្រសើរ។
នីតិវិធីគឺធ្វើឡើងចាប់តាំងពីទំនិញបានមកដល់ រហូតបញ្ចេញពីគយ។
លោក ប៉ែន ស៊ីម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកដ្ឋានគយ និង រដ្ឋាករកម្ពុជាមានប្រសាសន៍ថាការសិក្សានេះនឹងក្លាយជាឧបករណ៍មួយដើម្បីវាស់វែងការសម្រួលពាណិជ្ជកម្ម និងពីកំណែទម្រង់ដែលអគ្គនាយកដ្ឋានគយនិងរដ្ឋាករកម្ពុជាបាននិងកំពុងអនុវត្ត។
លោកបន្តថា៖ «នៅពេលដែលការសម្រួលពាណិជ្ជកម្មបានក្លាយជាអាទិភាពសម្រាប់ប្រទេសការសិក្សាពីរយៈពេលបញ្ចេញទំនិញពីគយបានក្លាយជាឧបករណ៍ចាំបាច់និងល្អបំផុត។ នីតិវិធីនិងបែបបទគយ នឹងត្រូវពិនិត្យមើលលម្អិតដើម្បីស្វែងរកក្នុងករណីមានការរាំងស្ទះក្នុងដំណើរការបញ្ចេញទំនិញនាំចេញនិងទំនិញនំាចូល»។
ការសិក្សារនេះនឹងត្រូវធ្វើឡើងក្រោមជំនួយធនាគាអភិវឌ្ឍន៍អាស៊ី ADB និង អង្គការគយពិភពលោក World Custom Organization ដែលលទ្ធផលនៃការសិក្សារនេះនឹងត្រូវបង្ហាញនៅអំឡុងខែ ឧសភាខាងមុខ។
លោក Peter Brimble នាយករង ធនាគាអភិវឌ្ឍន៍អាស៊ី ADB ប្រចាំប្រទេសកម្ពុជាបានមានប្រសាសន៍ថាខណៈប្រទេសកម្ពុជានឹងក្លាយជាសមាជិកនៃសហគមសេដ្ឋកិច្ចអាស៊ាននៅឆ្នាំ២០១៥ ដូច្នេះការសម្រួលផ្នែកពាណិជ្ជកម្មនិង គយ មានសារៈសំខាន់ណាស់ដើម្បីសម្រេចបានគោលដៅនេះ។លោកបានបន្តថា៖ «ខ្ញុំមានការប្រាកដណាស់ថាការសិក្សានេះនឹងក្លាយជាវិធីមួយដ៏សំខាន់ដើម្បីលើកកម្ពស់ផលិតភាពប្រកួតប្រជែងនៃពាណិជ្ជកម្មកម្ពុជា»។
លោក គឹម សាវុធ ប្រធានសម្ព័ន្ធអ្នកនំាចេញអង្ករកម្ពុជាបានស្វាគមន៍ចំពោះគំនិតសិក្សានេះដែលលោករំពឹងថាវានឹងជួយសម្រួលដល់វិស័យនំាចេញរបស់ប្រទេសឲ្យកាន់តែប្រសើរ។
លោកបន្តថា បែបបទនិងរយៈពេលរត់ឯកសារសម្រាប់នាំចេញអង្ករដែលធ្វើឡើងដោយគយ បច្ចុប្បន្ននេះមានភាពរហ័សដែលមិនសូវជាមានបញ្ហាចោទដល់ការនាំចេញឡើយ។ តែយ៉ាងណាក៏ដោយលោកមិនសូវសប្បាយចិត្តចំពោះនីតិវិធីដែលតម្រូវឲ្យស្កេន Container សម្រាប់ទំនិញនំាចេញ នៅកំពង់ផែដែលនេះគឺជាផលលំបាករបស់លោកក៏ដូចជាអ្នកនំាចេញជាច្រើនផ្សេងទៀត។លោកបន្តថា៖ «វាធ្វើឲ្យខាតពេលវេលា និងថវិកា ដែលចុងក្រោយប៉ះពាល់ដល់ផលិតភាពនៃការនំាចេញ។ យើងលើកទឹកចិត្តឲ្យបន្តនីតិវិធីនេះតែលើទំនិញនាំចូល»៕ PB
