The Phnom Penh Post Search

Search form

Logo of Phnom Penh Post newspaper Phnom Penh Post - អគ្គ​នាយកដ្ឋាន​ពន្ធដារ​នៅ​រក្សា​ច្បាប់ ឆ្នាំ​១៩៩៧




អគ្គ​នាយកដ្ឋាន​ពន្ធដារ​នៅ​រក្សា​ច្បាប់ ឆ្នាំ​១៩៩៧

កម្មករ​កំពុង​ធ្វើ​ការ​នៅ​ក្នុង​រោងចក្រ​កាត់​ដេរ​សម្លៀក​បំពាក់​មួយ​នៅ​ភ្នំពេញ នា​ពេល​កន្លង​មក។
កម្មករ​កំពុង​ធ្វើ​ការ​នៅ​ក្នុង​រោងចក្រ​កាត់​ដេរ​សម្លៀក​បំពាក់​មួយ​នៅ​ភ្នំពេញ នា​ពេល​កន្លង​មក។ ម៉ៃ វីរៈ

អគ្គ​នាយកដ្ឋាន​ពន្ធដារ​នៅ​រក្សា​ច្បាប់ ឆ្នាំ​១៩៩៧

ភ្នំពេញៈ មន្ត្រី​អគ្គ​នាយកដ្ឋាន​ពន្ធដារ​កាល​ពី​ម្សិល​មិញ​ថ្លែង​ថា កាតព្វកិច្ច​ពន្ធ​លើ​ប្រាក់​បៀវត្សរ៍​ចែង​នៅ ឆ្នាំ​១៩៩៧ នឹង​រក្សា​ទុក​ដដែល​ខណៈ​តំណាង​រោងចក្រ​កាត់​ដេរ និង​សហជីព​កម្មករ​ស្នើ​ឲ្យ​ពិនិត្យ​ឡើង​វិញ​ក្តី។

កម្រិត​ប្រាក់​បៀវត្សរ៍​ដែល​ជាប់​កាតព្វកិច្ច​ពន្ធ​គឺ​លើស​ពី ៥០ ម៉ឺន​រៀល ឬ ១២៥ ដុល្លារ។

ការ​លើក​ឡើង​នេះ​ធ្វើ​ឡើង​ក្នុង​សិក្ខាសាលា​ស្តី​អំពី​កាតព្វកិច្ច​បង់​ពន្ធ​លើ​ប្រាក់​បៀវត្សរ៍ រៀបចំ​ឡើង​ដោយ​សមាគម​រោងចក្រ​កាត់​ដេរ​កម្ពុជា រួម​នឹង​អគ្គ​នាយកដ្ឋាន​ពន្ធដារ​នៅ​រាជធានី​ភ្នំពេញ​ក្នុង​បំណង​ផ្សព្វ​ផ្សាយ​ពី​កាតព្វ​កិច្ច​បង់​ពន្ធ​លើ​ប្រាក់​បៀវត្សរ៍​របស់​កម្មករ ខណៈ​ប្រាក់​បៀវត្សរ៍​គោល​ត្រូវ​បាន​ដំឡើង​ជា​បន្ត​បន្ទាប់។

លោក គង់ វិបុល អគ្គ​នាយក​នៃ​អគ្គ​នាយកដ្ឋាន​ពន្ធដារ​បាន​ថ្លែង​ថា រដ្ឋាភិបាល​មិន​មាន​គម្រោង​ពន្យារ​ពេល​ឬ​ត្រួត​ពិនិត្យ​ឡើង​វិញ​ចំពោះ​កម្រិត​ប្រាក់​ឈ្នួល​ដែល​កំណត់​នៅ​ក្នុង​ច្បាប់​ពន្ធ ឆ្នាំ​១៩៩៧ ទេ។

លោក​ថា រដ្ឋាភិបាល​ចាំ​បាច់​ត្រូវ​មាន​ប្រាក់​ចំណូល​ក្នុង​ការ​វិនិយោគ​នៅ​ក្នុង​ហេដ្ឋា​រចនា​សម្ព័ន្ធ​សាធារណៈ​សម្រាប់​កំណើន​សេដ្ឋកិច្ច។ លោក​លើក​ឡើង​ថា៖ «ការ​ប្រមូល​ពន្ធ​លើ​ប្រាក់​បៀវត្សរ៍​នេះ​មិន​មែន​ជា​រឿង​ថ្មី​ទេ ព្រោះ​ច្បាប់​បាន​ចែង​តាំង​ពី ឆ្នាំ​១៩៩៧ មក​ម៉្លេះ​តែ​ពេល​នោះ​ប្រាក់​បៀវត្សរ៍​របស់​កម្មករ​នៅ​មិន​ទាន់​ឡើង​ដល់​កម្រិត​ដែល​ត្រូវ​ជាប់​កាតព្វ​កិច្ច​បង់​ពន្ធ​ទេ។ រដ្ឋាភិបាល​ត្រូវ​ការ​ចំណូល​ដើម្បី​វិនិយោគ​បន្ថែម​លើ​ហេដ្ឋា​រចនា​សម្ព័ន្ធ​សាធារណៈ ដែល​កម្ពុជា​នៅ​ខ្វះ​ខាត​ច្រើន​ដើម្បី​ឲ្យ​សេដ្ឋកិច្ច​ដើរ»។

តាម​ការ​ឲ្យ​ដឹង​របស់​លោក វិបុល មាន​តែ​ប្រាក់​ខែ​មូលដ្ឋាន​បូក​នឹង​ប្រាក់​ឈ្នួល​បន្ថែម​ម៉ោង​ប៉ុណ្ណោះ​ទេ​ដែល​នឹង​ត្រូវ​រាប់​បញ្ចូល​ក្នុង​កាតព្វកិច្ច​បង់​ពន្ធ ហើយ​អត្ថ​ប្រយោជន៍​បន្ថែម​ពួក​គេ​ទទួល​បាន​នៅ​ក្នុង​ច្បាប់​ការងារ​រួម​មាន ប្រាក់​អាហារ និង​ការ​ស្នាក់នៅ​និង​មិន​រាប់​បញ្ចូល​ក្នុង​កាតព្វកិច្ច​បង់​ពន្ធ​ទេ។

ច្បាប់​សារពើពន្ធ​ដែល​បាន​អនុម័ត​កាល​ពី ឆ្នាំ​១៩៩៧ ចែង​ថា កម្មករ​រក​ប្រាក់​ចំណូល​ជាង ១២៥ ដុល្លារ​ក្នុង​មួយ​ខែ​នឹង​ត្រូវ​បង់​ពន្ធ ៥ ភាគ​រយ អ្នក​ដែល​រក​បាន​ប្រាក់​ចំណូល​ជាង ២៥០ ដុល្លារ​នឹង​ត្រូវ​បង់​ពន្ធ ១០ ភាគរយ កម្មករ​រក​បាន​ប្រាក់​ចំណូល​ជាង ២ ១២៥ ដុល្លារ​នឹង​ត្រូវ​បង់​ពន្ធ ១៥ ភាគរយ ហើយ​អ្នក​ដែល​រក​ប្រាក់​ចំណូល​ច្រើន​ជាង ៣ ១២៥ ដុល្លារ​នឹង​ត្រូវ​បង់​ពន្ធ ២០ ភាគ​រយ។ នេះ​បើ​តាម​ការ​ពន្យល់​របស់​មន្ដ្រី​ពន្ធដារ​នៅ​ក្នុង​សិក្ខាសាលា​នោះ។

នៅ​ថ្ងៃ ទី១០ ខាង​មុខ​នេះ គណៈកម្មាធិការ​ប្រឹក្សា​ផ្នែក​កម្លាំង​ពលកម្ម​នៃ​ក្រសួង​ការងារ​ត្រូវ​បាន​រំពឹង​ថា នឹង​ចេញ​សេចក្តី​ប្រកាស​ស្តីពី​ប្រាក់​បៀវត្សរ៍​អប្បបរមា​ថ្មី ដែល​បច្ចុប្បន្ន​ឈរ​នៅ ១០០ ដុល្លារ។ សហជីព​តំណាង​កម្មករ​កំពុង​ទាមទារ​សុំ​ឲ្យ​មាន​ការ​ដំឡើង​ដល់ ១៧៧ ដុល្លារ​ខណៈ​តំណាង​រោងចក្រ​និយាយ​ថា ប្រាក់​បៀវត្សរ៍​អប្បបរមា ១១០ ដុល្លារ។

កញ្ញា រុំ ផារី ជា​តំណាង​កម្មករ​មួយ​រូប​ក្នុង​ចំណោម​សហជីព​បាន​ស្នើ​សុំ​ឲ្យ​រដ្ឋាភិបាល​យក​ពន្ធ​តែ​លើ​ប្រាក់​ខែ​មូលដ្ឋាន​ដោយ​សារ​កម្មករ​នៅ​ពេល​នេះ​កំពុង​ប្រឈម​នឹង​អតិផរណា​កំពុង​កើន​ឡើង​នៅ​ក្នុង​ការ​ចំណាយ​លើ​ទំនិញ​និង​ការ​រស់​នៅ។ កញ្ញា​លើក​ឡើង​ថា៖ «ប្រាក់​បៀវត្សរ៍​មិន​ទាន់​ឡើង​ទេ តែ​រដ្ឋាភិបាល​បាន​គិត​រួច​ហើយ​អំពី​ការ​កាត់​ពន្ធ។ តើ​រដ្ឋាភិបាល​អាច​ពិចារណា​កាត់​ពន្ធ​តែ​ប្រាក់​បៀវត្សរ៍​គោល​បាន​ឬ​ទេ? ប្រាក់​ឈ្នួល​មិន​ទាន់​ឡើង​ទេ តែ​ទឹក​ភ្លើង​ផ្ទះ​ជួល​ឡើង​ថ្លៃ​រួច​ហើយ​ចង់​ដឹង​ថា តើ​រដ្ឋាភិបាល​បាន​គិត​គូរ​ពី​បញ្ហា​ប្រឈម​របស់​កម្មករ​ដែរ​ឬ​ទេ?»។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា កាល​ពី​ម្សិល​មិញ​ថ្លែង​ថា រដ្ឋសភា​គួរ​ពិចារណា​ឡើង​វិញ​លើ​ច្បាប់​សារពើពន្ធ​ដែល​កំណត់​កម្រិត​ប្រាក់​ចំណូល​ដែល​ជាប់​កាតព្វកិច្ច​ពន្ធ​ពី ១ លាន​រៀល​ឬ ២៥០ ដុល្លារ​វិញ។ លោក​ថ្លែង​ថា៖ «ច្បាប់​នេះ​ត្រូវ​បាន​បង្កើត​តាំង​ពី​ពេល​ដែល​ប្រាក់​បៀវត្សរ៍​អប្បបរមា​ត្រឹម ៣០ ដុល្លារ​ប៉ុណ្ណោះ ហើយ​ពេល​នេះ​ប្រាក់​បៀវត្សរ៍​អប្បបរមា​បាន​ឡើង​ដល់ ១០០ ដុល្លារ​ហើយ ប៉ុន្តែ​នៅ​តែ​មិន​គ្រប់​សម្រាប់​ចំណាយ​លើ​ការ​រស់​នៅ​របស់​កម្មករ»។

លោក Albert Tan សមាជិក​គណៈកម្មាធិការ​ប្រតិបត្តិ​របស់ GMAC ឲ្យ​ដឹង​ថា៖ «វា​គួរ​តែ​ជា​ការ​សម្រេច​ចិត្ត​របស់​រដ្ឋាភិបាល​ក្នុង​ការ​គិត​ពី​តួលេខ​សមរម្យ​សម្រាប់​ការ​បង់​ពន្ធ​នេះ។ ចំនួន​ខ្លះ​មិន​គួរ​ត្រូវ​បង់​ពន្ធ​នោះ​ទេ។ រដ្ឋាភិបាល​គួរ​តែ​ពិនិត្យ​មើល​ពី​ស្ថានការណ៍​នៅ​កម្ពុជា​ខណៈ​ការ​ចំណាយ​លើ​ជីវភាព​រស់​នៅ​កំពុង​កើន​ឡើង»៕

អត្ថបទគួរចាប់អារម្មណ៍